Read Mizo Lushai HNENA TIRHKOH PAULA LEHKHATHAWN PAKHATNA TIMOTHEA 1 Bible Online

HNENA TIRHKOH PAULA LEHKHATHAWN PAKHATNA TIMOTHEA 1 - Mizo Lushai bible

HNENA TIRHKOH PAULA LEHKHATHAWN PAKHATNA TIMOTHEA 1

¹Kei Paula, min chhandamtu Pathian leh kan beisei innghahna Krista Isua thupêk anga Krista Isua tirhkoh hian,

²rinnaa ka fa tak tak Timothe, chibai ka bûk a che. Pa Pathian leh Krista Isua kan Lalpa hnên ata khawngaihna te, zahngaihna te, remna te i hnênah awm rawh se.

³Makedonia rama ka kal dâwn laia ka ngen ang che khân Efesi khuaa awm zêl tûrin ka ngên leh a che. Mi ṭhenkhat thurin dik lo zirtîr ṭhînte kha khap la,

⁴khâng thawnthu leh thlahtute chhui vak vak kha bântîr rawh, inhnialna a titam mai mai a, rinna vânga hriat ṭhin, Pathian thiltum chu mi a hriat fiahtîr chuang si lo.

⁵Thinlung thianghlim, chhia leh ṭha hriatna thiang leh rinna dik tak aṭanga chhuak hmangaihna chu a lo pun zâwk theih nân he thu hi ka pe che a ni.

⁶Ṭhenkhat chuan chu chu an pênsan a, inhnialna sâwt lo lamah an lût ta a.

⁷Dân zirtîrtu berah an inngai a, an thu sawi awmzia leh ngam taka an thil sawi ṭhinte chu an hre tak tak si lo.

⁸Dân hi a hmanna tûr taka hman a nih chuan a ṭha tih kan hria,

⁹mi ṭhate chunga lek tûr a ni lo tih hriat tûr a ni: Dân pawisa lo te leh luhlul te, sakhaw ngaihsak lo leh mi sual te, serh leh sâng nei lo leh bawlhhlawh te, nu leh pa thattu te leh tual that te,

¹⁰inngaih chîng te leh mawngkawhur te, mihring rûk chîng te leh dawthei te, dâwta chhechham chîng te leh,

¹¹fak tlâk Pathianin puan tûra mi kawltîr Chanchin Ṭha ropui kalha zirtîr chîng te chunga lek tûr a ni.

¹²Mi tichaktu, rin tlâka mi ngaia he hna atâna mi ruattu Krista Isua, kan Lalpa chu lâwmthu ka hrilh a ni;

¹³tûn hma khân a sawichhetu, tiduhdahtu leh hmusittu lo ni mah ila, ringtu ka la ni lo va; hre lova ti ṭhîn ka nih avângin ka chungah zah a ngai êm êm ṭhîn a,

¹⁴kan Lalpa khawngaihna chuan Krista Isuaa rinna leh hmangaihnain mi vûr khat ta zâwk a.

¹⁵Krista Isua chu mi sualte chhandam tûrin khawvêlah a lo kal tih hi a dikin a va pawm tlâk êm! Kei hi an zînga sual ber ka ni.

¹⁶Mahse, hemi avâng hian khawngaihna ka dawng, Krista Isua chuan ka chunga a dawhtheihzia a tilang hmasa hi, tûn hnu pawha amah ringtu apiangin, chatuan nun an nei thei dâwn tih entîrna a lo ni.

¹⁷Lalber, chatuan mi, thi thei lo, mita hmuh theih loh, Pathian tak chauh hnênah chuan chawimawina leh ropuina chatuanin awm rawh se. Amen.

¹⁸Ka fapa Timothe, hêng thupêk hi ka kawltîr a che; zâwlneiten i chungchâng an sawi lâwk kha hre reng la, chûng thu chu hmangin indona ṭha chu bei rawh;

¹⁹rinna leh chhia leh ṭha hriatna thiang vawng tlat ang che; mi ṭhenkhatten an chhia leh ṭha hriatna an hnâwl a, an rinna chu a keh chhe zo ta.

²⁰Chûng mite zîngah chuan Humenaia leh Aleksandara pawh an tel a, Pathian pawi sawi an sim nân thunun an ngai a, Setana ka pe ta a ni.