Read Mizo Lushai HNENA TIRHKOH PAULA LEHKHATHAWN PAKHATNA TIMOTHEA 2 Bible Online

HNENA TIRHKOH PAULA LEHKHATHAWN PAKHATNA TIMOTHEA 2 - Mizo Lushai bible

HNENA TIRHKOH PAULA LEHKHATHAWN PAKHATNA TIMOTHEA 2

¹Ka chah duh hmasak ber che chu thil dîlna te, ṭawngṭaina te, dîlsakna te, lâwmthu hrilhna te mi zawng zawng tân hlân ula,

²Pathian ngaihsak leh zahawma awmin thlamuang taka kan khawsak ho dial dial theih nân lalber leh thuneitu zawng zawng pawh dîlsak rawh u;

³chu chu min chhandamtu Pathian hmuhin a ṭha a, a lâwmzâwng a ni.

⁴Ani chuan mi zawng zawng chhandama awmah leh thutak hria atân a duh si a.

⁵Pathian pakhat chauh a awm a, Pathian leh mihring inkârah palai pakhat chauh a awm bawk, mihring Krista Isua chu.

⁶Mi zawng zawng tlan nân ani chu a inpe a, chhandamna thu chu hun a tih takah a rawn puang ta.

⁷Kei hi, Jentail-te hnêna chu rinna thu chu puang tûr leh thutak zirtîrtu leh tirhkoh atân ruat ka ni; he ka thu sawi hi thutak a ni a, dâwt a ni lo ve.

⁸Tichuan, in inkhâwmna apiangah mipaho chuan tihtakzetin, thinur chung leh ringhlel chunga ti lovin kut thianghlim pharin ṭawngṭai rawh se.

⁹Hmeichhia pawh a mawi tâwk leh inchawih tâwkin inchei sela, sam chei lêrh te, rangkachaka inchei te, tuikeplung ṭhi awrh te, puan man tam inbel te chîng suh se.

¹⁰Pathian ngaihsak hmeichhiate tih âwm rêng, thil tih ṭhatein inthuam zâwk rawh se.

¹¹Hmeichhiate chuan ngawi rengin, thu awih takin thil an zir tûr a ni.

¹²Hmeichhiain an zirtîr te, mipa chunga thu an neih te ka phal lo, ngawih an chuh tûr a ni.

¹³Adama chu Evi ai chuan siam hmasak a ni a,

¹⁴buma awm kha Adama a ni lo va, hmeichhia kha a ni buma awm leh bawhchhetu chu.

¹⁵Amaherawhchu, rinnaah te, hmangaihnaah te, thianghlimnaah te, mawi taka an awm reng phawt chuan fa hrin avângin chhandam an ni ang.