Read Mizo Lushai HNENA TIRHKOH PAULA LEHKHATHAWN PAKHATNA TIMOTHEA 3 Bible Online

HNENA TIRHKOH PAULA LEHKHATHAWN PAKHATNA TIMOTHEA 3 - Mizo Lushai bible

HNENA TIRHKOH PAULA LEHKHATHAWN PAKHATNA TIMOTHEA 3

¹Tu pawh kohhran hotu hnathawh duh chuan hna ṭha thawh a duh a ni tih hi a dik a ni.

²Tichuan, kohhran hotu ni tûr chu sawisêlbo, nupui pakhat nei, insûm thei, rilru fîm, mi zahawm, mi inphal leh zirtîr thiam a ni tûr a ni.

³Zu in chîng lo, kut thlâk mai chîng lo, mi nunnêm, inrem duh mi leh tangka sum ngaina lo mi a ni tûr a ni;

⁴zahawm taka chhûngkaw khawsak rêla, fate kîlkawi thiam mi a ni bawk tûr a ni;

⁵mahni chhûngkaw rêl fel thiam si lo chuan engtin nge Pathian kohhran a enkawl theih ang?

⁶Ring thar mi ni suh se, chuti lo chu a chapo vang a, Diabola angin thiam loh a chang ve dah ang e.

⁷Pâwn lam mite ngaihsân a ni bawk tûr a ni; tichuan, hmingchhiat hlawhin Diabola thangah a âwk dâwn lo nia.

⁸Chutiang bawkin kohhran rawngbâwltute pawh mi zahawm, mi rilru nghet an ni tûr a ni, zu heh leh bawlhhlawh taka hlêp duh mi an ni tûr a ni lo;

⁹chhia leh ṭha hriatna thianga rinna thu ril chelh tlat mi an ni tûr a ni.

¹⁰En fiah hmasak phawt tûr an ni a, mi tling tâwk an nih chuan rawng an bâwl chauh tûr a ni.

¹¹Hmeichhiate pawh chutiang bawkin mi zahawm, mi rêl chîng lo, insûm thei, kawng engkima mi rinawm an ni tûr a ni.

¹²Rawngbâwltute chu nupui pakhat nei, fate leh chhûngkaw enkawl thiam mi an ni tûr a ni.

¹³Rawng bâwl ṭhate chu an chan a ṭha tial tial ang a, Krista Isua rinnaah pawh an huai telh telh ang.

¹⁴He lehkha ka ziak lai hian lo kala hmuh thuai che ka inbeisei reng a;

¹⁵mahse, ka lo tlai palh tâkin Pathian chhûngkua, Pathian nung kohhran, thutak kengkawhtute chu eng anga awm tûr nge an nih i hriat theih nân ka han ziak a nih hi.

¹⁶Kan sakhaw thurûk rilzia hi hnial rual a ni lo ve: Ani chu tisa puin a lo lang a, Thlarauvin a dikzia a tilang a, Vântirhkohte pawhin an hmu a, hnam tin zîngah puan darh a ni a, khawvêl puma miin an ring a, Ropui taka lâk chhoh a ni ta.