Read Mizo Lushai HNENA TIRHKOH PAULA LEHKHATHAWN PAKHATNA TIMOTHEA 4 Bible Online

HNENA TIRHKOH PAULA LEHKHATHAWN PAKHATNA TIMOTHEA 4 - Mizo Lushai bible

HNENA TIRHKOH PAULA LEHKHATHAWN PAKHATNA TIMOTHEA 4

¹Hun hnuhnûngah chuan miten rinna thu hi an la hawisan ang a, thlarau dik lo hruai bovin, ramhuai laka chhuak zirtîrna dik lo chu an la awih zâwk dâwn tih thlarauvin chiang takin a sawi.

²Chûng thu theh darhtute chu chhia leh ṭha hriatna del, thîr linga deh châr ang, mi dawthei an ni.

³Inneih te leh thil ṭhenkhat ei te an khap a. Thutak hre tawh ringtute erawh chuan lâwmthu sawi chunga ei atân Pathian siam a ni tih an hria.

⁴Pathian thil siam tinrêngte hi a ṭha a, eng mah duh loh tûr a ni lo;

⁵lâwmthu sawi chunga dawn mai tûr a ni, Pathian thu leh ṭawngṭainaa hlan thianghlim vek a ni tawh si a.

⁶Hêng kaihhruainate hi unaute hrilh la, Krista Isua rawngbâwltu ṭha in ni dâwn nia; rinna thu leh zirtîrna ṭha i zawm ṭhin khân thlarau lamah a ṭhan lentîr zêl bawk ang che.

⁷Thawnthu dukdak lo mai mai chu hawisan la, thlarau lam thilah insawizawi rawh.

⁸Taksaa insawizawi hi a sâwt ngawt mai, thlarau lama insawizawina erawh chu kawng engkimah a ṭangkai a, tûn dam chhûng leh nakin hun atân a sâwt êm êm a ni.

⁹He thu hi a dik a, pawm tlâk a ni.

¹⁰Pathian nung chu kan beisei innghahna a nih tâk avângin kan thawk rim a, kan bei nasa a ni. Ani chu mi zawng zawng tân chhandamtu a ni a, ringtute tân a ni ber nghe nghe.

¹¹Hêng thu hi pe la, zirtîr zui zêl rawh.

¹²I naupan avâng maiin tu man ngainêp che suh se, thu sawiah te, chêtziaah te, hmangaihnaah te, rinnaah te, thianghlimnaah te ringtute entawn tlâkin awm ang che.

¹³Ka lo kal hma chu vântlâng zînga Pathian thu chhiar te, thu hril te, zirtîr te lo uar rawh.

¹⁴Upahovin i chunga kut an nghah laia zâwlneite sawi anga thlarau lam thilpêk i dawnte kha thlahthlam suh.

¹⁵Hmang zui zêl la, tuina berah neih la; tichuan, mi tinin i ṭhan zêlzia an hmu dâwn nia.

¹⁶I thil tih leh i zirtîrah fîmkhur hle la, hêng hi ti zêl la, nangmah leh i thu ngaithlatute i chhandam dâwn nia.