Read Mizo Lushai HNENA TIRHKOH PAULA LEHKHATHAWN PAKHATNA TIMOTHEA 5 Bible Online

HNENA TIRHKOH PAULA LEHKHATHAWN PAKHATNA TIMOTHEA 5 - Mizo Lushai bible

HNENA TIRHKOH PAULA LEHKHATHAWN PAKHATNA TIMOTHEA 5

¹Upa zâwkte chu hau suh la, mahni pa anga enin a ngenin ngên zâwk ang che; naupang zâwkte chu nau angin en la,

²Pitarte chu nu angin en la, nulate chu thianghlim takin farnu angin en ang che.

³Mahni chauhva awm hmeithaite chu zah la;

⁴tu leh fa nei hmeithaite chu, an tu leh fate chuan Pathianin chhûngkaw mawhphurhna a pêk chu hlen chhuah zir phawt sela, anmahni châwm liantu chu châwm ve thung rawh se, chu chu Pathian lâwm zâwng a ni.

⁵Châwmtu nei lo, mahni chauhva hmeithai chuan, Pathian chauh rinchhan tûr a nei a, ṭanpuina dîlin a chhûn a zân a ṭawngṭai ṭhîn.

⁶Hmeithai leplêrh tak erawh chu, a dam lai pawhin mitthi mai a ni.

⁷Hêng kaihhruainate hi hrilh la, sawisêlbovin awm rawh se.

⁸Mahni chhûngte, in khata awmpui ngei châwm duh lo an awm chuan, rinna hi an phatsan ta tihna a ni, ringlo mi aiin an sual zâwk.

⁹Kum sawmruk la tling lo chu hmeithai zîngah ziak tel suh; pasal pakhat chauh nei, thil ṭha tih kawnga fak kai, fate lo enkawl tlei tawh, mikhual chunga ṭha, mi thianghlimte ke sil ṭhîn, mi mangang ṭanpui peih, thil ṭha tih kawnga inpe mi an ni bawk tûr a ni.

¹¹Hmeithai la nula deuhte chu telh suh, an châkna avângin Krista hawisana pasal neih an duh leh si ṭhîn a,

¹²an thu lo tiam tawh an bawhchhiat avângin sawisêl an kai ṭhîn.

¹³Chu lovah pawh, mi ina an lên kualna lamah dâwngdah an zir a, dâwngdah mai pawh ni lovin mi rêl an chîng a, thu veivir an hrât a, an sawi loh tûr tûr an sawi ṭhîn.

¹⁴Chuvângin, hmeithai la nula deuhte chuan pasal nei leh se ka ti a ni, fate neiin chhûngkua enkawl sela, hmêlmaten min sawichhiatna tûr rêng an nei dâwn lo nia.

¹⁵Ṭhenkhat chu Setana zuiin an pêng sual tawh a ni.

¹⁶Ringtu hmeichhiain, an chhûngkaw zîngah hmeithai nei se a châwm tûr a ni; mahnia hmeithaite chauh kohhranin an enkawl theih nân kohhran chu phurrit siamsak suh se.

¹⁷Kohhran upa, mi hruai thiam, thu hril leh zirtîr lama taima bîkte chu a leh hniha chawimawi tlâk an ni.

¹⁸Lehkha Thu-in, “Bâwngpain buh a chîl laiin a hmui phuar suh; hna thawktu chu hlawh hmu tlâk a ni,” a ti a.

¹⁹Upa an hêkna chu thuhretu pahnih emaw, pathum emaw tal an awm loh chuan pawm suh.

²⁰Thil tisual ngeite chu vântlâng hmaah zilh rawh, mi dang pawhin an hlauh theih nân.

²¹Pathian leh Krista Isua leh a vântirhkoh thlante hmaah thu ka pe a che: ngaih dân nei sa lovin, hleih nei lovin hêng thu hi kengkawh ang che.

²²Rawngbâwltu tûr nemngheh hmanhmawh lutuk suh la, mahni invawng thianghlim rawh.

²³Tui chauh in tawh lo la, na i nei fo si a, i pum nawm nân uain tlêm in ṭhîn ang che.

²⁴Mi ṭhenkhat sualna chu a langsâr a, thiam loh chantîr nghâl theih a ni; ṭhenkhat sualna erawh chu rei fe hnuah lo chuan a lang nghâl mai lo.

²⁵Chutiang bawkin thiltih ṭha chu a langsâr a, langsâr lo mah se, thup reng theih a ni chuang lo.