Read Mizo Lushai HNENA TIRHKOH PAULA LEHKHATHAWN PAKHATNA TIMOTHEA 6 Bible Online

HNENA TIRHKOH PAULA LEHKHATHAWN PAKHATNA TIMOTHEA 6 - Mizo Lushai bible

HNENA TIRHKOH PAULA LEHKHATHAWN PAKHATNA TIMOTHEA 6

¹Chhiahhlawh, bawih nghâwngkawl bâtte chuan an pute chu kawng engkimah an zah tûr a ni, chuti lo chu Pathian hming leh kan zirtîrna hi sawichhiat a ni dah ang e.

²Bawih, Kristian pu neite chuan rinnaa unau an nih denchhenin an pute chu an ngainêp tûr a ni lo, ṭha lehzualin rawng an bâwlsak zâwk tûr a ni; an rawngbâwlsakte nên rinna leh hmangaihnaa chhûngkhat an ni si a. Hêng hi i zirtîra, i fuihna tûr chu a ni.

³Tu pawh kan Lalpa Isua Krista thutak leh sakhaw zirtîrna thu dik chu kalha zirtîrna danglam zirtîr chu,

⁴mi â, intivei tak, eng mah hre si lo an ni; sawihnâwm tûr zawn thiam tak, inhnial châk hliah hliah, inîtsîkna te, innghirnghona te, Pathian pawi sawi te leh thu inchuh tâwpintai nei lo chawk chhuaktu an ni;

⁵rilru chhe tawh, thu dik man pha tawh lo, sakhua hi hausak nâna hman tumte an ni.

⁶Mahni ta-a lungawite tân chuan sakhaw mi nih hi a hlâwk êm êm rêng a ni.

⁷Khawvêlah hian eng mah kan luhpui lo va, eng mah kan chhuahpui thei dâwn bawk hek lo.

⁸Ei tûr leh silh tûr kan neih chuan kan tân a tâwk a ni.

⁹Hausak duh mite chu thlêmnaah an lût a, duhâmna âtthlâk, thang hlauhawm takah chuan an âwk a, an chhiat phah a, an boral ṭhîn a ni.

¹⁰Tangka sum ngainat hi sual tinrêng bul a ni, sum ngah an tumna lamah ṭhenkhat chuan rinna hi an pênsan a, lungngaih sawi sên lohvin mahni an intina ta a ni.

¹¹Nang, Pathian mi, chûng chu tlânsan la, dikna te, sakhaw ngaihsakna te, rinna te, hmangaihna te, dawhtheihna te, nunnêmna te neih tum tlat zâwk rawh.

¹²Rinna hlu tak hi ṭanin theihtâwp chhuah ang che; chatuan nun chu vuan tlat la, chumi chang tûr chuan koh i ni a, hretu tam tak hmaah rinna hi i pawm thu i puan kha.

¹³Engkim nunna hnâr, Pathian leh Krista Isua, Pontia Pilata hmaa hlau hlek lova thu dik ṭan tlattu hmaah chuan,

¹⁴i tih tûra ruat chu rinawm taka ti tûrin thu ka pe a che. Kan Lalpa Isua Krista lo lan leh hma chu bawlhhlawh kai lo leh sawisêlbovin awm rawh.

¹⁵Fak tlâk Pathian, engkim chunga thu neitu awm chhun, lalberte Lalber, lalte Lal chuan a hun takah Krista chu a rawn lantîr dâwn si a.

¹⁶Amah chauh hi thi thei lo, hnaih theih rual loh ênga chêng, tu ma la hmuh loh leh hmuh theih loh ni bawk chu a ni, a hnênah chuan chawimawina leh thiltihtheihna chatuanin awm rawh se. Amen.

¹⁷Khawvêl mi hausate chu inchhuang lo tûrin hrilh la, sum rin tlâk loh rin chhan tum lova engkim kan hman atâna min petu Pathianah innghat zâwk tûrin fuih rawh.

¹⁸Thil ṭha ti tûr te, thil ṭha tiha hausa tûr te, phal taka mi dangte sem ve chîng tûr tein fuih bawk rawh.

¹⁹Tichuan, nakin atân ro hlu tak an insiamsak a ni ang a, nunna tak tak chu an chang dâwn nia.

²⁰Aw Timothe, i kova innghat hi vawng fimkhur hle ang che, ‘hriatna dik’ tia an chhâl, dik si lo, thu inkalh si, khawvêl mi tam takin an khûkpui ṭhin lakah khân inthiarfihlîm rawh;

²¹ṭhenkhat chuan an zâwm ve a, rinna kawng aṭangin an bo ta a ni. Pathian khawngaihna in hnênah awm rawh se.