Read Mizo Lushai HNENA TIRHKOH PAULA LEHKHATHAWN PAHNIHNA TIMOTHEA 1 Bible Online

HNENA TIRHKOH PAULA LEHKHATHAWN PAHNIHNA TIMOTHEA 1 - Mizo Lushai bible

HNENA TIRHKOH PAULA LEHKHATHAWN PAHNIHNA TIMOTHEA 1

¹Kei Paula, Kristaa nunna tiam puang tûra Pathian duh zâwnga Krista Isua tirhkoh hian,

²ka fapa duh tak Timothe, chibai ka bûk a che. Pa Pathian leh kan Lalpa Krista Isua hnên ata khawngaihna te, zahngaihna te, remna te i hnênah awm rawh se.

³Min thlahtute tih anga chhia leh ṭha hriatna thiang taka a rawng ka bâwl Pathian hnênah lâwmthu ka sawi a ni. A chhûn a zânin ka ṭawngṭainaah te ka hre reng ṭhîn che a,

⁴i mittuite pawh ka hre reng a, hlim êm êma inhmuh leh ka châk ngei mai.

⁵I rinna takzia pawh ka hre reng ṭhîn, i pi Loisii neih, i nu Euniki pawhin a neih bawk kha nang pawhin i nei ta zêl a ni tih ka hria.

⁶Chumi avâng chuan i chunga kut ka nghah laia Pathian thilpêk i dawn kha chhêm alh reng tûrin hrilh nawn che ka duh a ni.

⁷Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni.

⁸Kan Lalpa thu hi puan zak suh, amah avânga lung in tâng pawh hi min zahpui hek suh; Pathian chakna ringin Chanchin Ṭha avânga hrehawm tuar ve huam zêl zâwk rawh.

⁹Kan thiltih avâng ni lovin, ama tum dân a nih zâwk avângin khawngaihnain min chhandam a, thianghlim taka nung tûrin min ko va ni. Krista Isuaah chuan leilung pian hma daih khân a khawngaihna chu min lo pe tawh a;

¹⁰mahse, tûnah hian, min chhandamtu Krista Isua a lo kal khân, chu chu tihlan a ni ta chauh a ni. Ani chuan thihna chu a hneh ta a, Chanchin Ṭhaah hian nunna leh thih theih lohna a rawn tilang ta a ni.

¹¹Kei hi chumi thu puang tûra tirhkoh leh zirtîrtu atân ruat ka ni.

¹²Chuvâng chuan alâwm tûnah pawh hetianga ka tuar ni; mahse, ka zak lo ve; ka rina chu ka hria, a hnêna ka kawltîr chu, chumi Nî atân chuan a vawng him thei tih ka hre chiang a ni.

¹³Ka hnên aṭanga i hriat ṭhin zirtîrna dik kha zawm berah neih la, Krista Isuaa rinnaah leh hmangaihnaah chuan chêng tlat rawh.

¹⁴I kova innghat, thilpêk ropui tak kha, keimahnia chêng ṭhîn Thlarau Ṭhianghlim hmangin vawng ṭha tlat bawk rawh.

¹⁵Asia rama mite khân, Fugela leh Hermogena te chenin mi hawisan ta tih i hria e.

¹⁶Lalpa chuan Onesifora te chhûng chu khawngaihna pe rawh se; ani chuan mi tihlim êm êm a ni, lung in tâng ka nih hi mi zahpui lo va,

¹⁷Rom khua a lo thlen veleh mi rawn zawng chhuak vang vang a ni. Efesi khuaah pawh min puih nasatzia i hre chiang a,

¹⁸Lalpa chuan chumi Nî-ah chuan a khawngaihna chu dawntîr rawh se.