Read Mizo Lushai HNENA TIRHKOH PAULA LEHKHATHAWN PAHNIHNA TIMOTHEA 2 Bible Online

HNENA TIRHKOH PAULA LEHKHATHAWN PAHNIHNA TIMOTHEA 2 - Mizo Lushai bible

HNENA TIRHKOH PAULA LEHKHATHAWN PAHNIHNA TIMOTHEA 2

¹Ka fapa, Krista khawngaihna hian tichak che rawh se.

²Mi tam tak hriata ka zirtîrna i ngaihthlâkte kha zirtîr chhâwng zêl thei tûr nia i mi rin tâwkte hnênah hrilh chhâwng zêl ang che.

³Krista sipai rinawm angin hrehawm mi tuarpui ve rawh.

⁴Sipai chu a hotu tilâwm tûrin khawvêl thil dangah a inhnamhnawih ngai lo.

⁵Intlânsiak mi pawh dân ang taka a tlân loh chuan lâwmman a hmu thei lo vang.

⁶Lo lamah pawh a thawk hahtu chuan rah hmasa a chang tûr a ni.

⁷Ka sawi hi ngaihtuah ngun la, Lalpan kawng engkimah hriatthiamna a pe ang che.

⁸Chanchin Ṭha ka hril ṭhin, Isua Krista, Davida thlaha mi, mitthi zîng ata tholeh ta-a thu kha hre reng rawh.

⁹Chu Chanchin Ṭha avâng chuan hrehawm ka tuar a, mi sual ang maia khaidiata phuar ka ni, Pathian thu erawh chu phuar rual a ni lo.

¹⁰Krista Isuaa awm, chhandamna chu, chatuan ropuina nên an chan theih nân thlante avângin hêng zawng zawng hi ka tuar a ni.

¹¹He thu hi a dik a ni: A thihna kan ṭâwm ve chuan, A nunna pawh kan ṭâwm ve ang.

¹²Kan tuar ve chuan ro kan rêlpui ve ang. Kan phat erawh chuan min phat ve ang.

¹³Rinawm lo mah ila, Ani zawng a rinawm reng a, a thu a sût ve ngai lo.

¹⁴Hêng thu hi hriattîr rawh, Pathian hmingin hrilh la, thu inchuha inhnial ṭhin hi bânsan rawh se, sâwtna a awm lo va, ngaithlatute a tikhawlo mai mai a ni.

¹⁵Nang chuan Pathian lâwmzâwng mi, hna thawktu, mahni hna zahpui lo, thutak chu dik taka hmang thiamtu nih tum tlat ang che.

¹⁶Khawvêl mite thu dukdak lo chu hawisan rawh, chu chuan Pathian ngaihsak lohna lamah mi a hruai si ṭhîn.

¹⁷Pânchhia angin an thu zirtîr chu a darh ṭhîn; an zîngah Humenaia leh Fileta kha a bulpui an ni.

¹⁸Thutak chu an pênsan a, ‘thawhlehna chu a awm daih tawh,’ an ti a, mi ṭhenkhat rinna pawh an pheh chhiatsak tawh a ni.

¹⁹Pathian thutak lungphûm erawh chu a nghîng chuang lo, “Lalpan a mite a hria,” tih leh “Lalpa hming lamtute chuan sual an kalsan tûr a ni,” tih ziak a chuang.

²⁰In ropui taka bungbêlte pawh chu rangkachak leh tangkaruaa siam a ni vek lo va, thinga siam te, hluma siam te pawh a ni a, a ṭhen a hlu deuh va, a ṭhen a hlu lo deuh va.

²¹Hêng thil ṭha lo ka sawite laka inthiarfihlîm mi chu hmanraw hlu, in Neitupa tân hman tlâk, sil fai diam, hna ṭha tinrêng thawh nâna hman mai theih tûra inpeih reng ang hi a lo ni ang.

²²Tleirâwl châkna te hawisan la, thinlung thianghlim taka Lalpa lamtute nên dikna te, rinna te, hmangaihna te, remna te ûm rawh.

²³Hêng inhnialna sâwt lo leh âtthlâk hi hawisan rawh, innghirnghona a tichhuak mai mai a ni.

²⁴Lalpa chhiahhlawh chuan inhau a chîng tûr a ni lo, mi lainat thei, zirtîr thiam, mi dawhthei a ni zâwk tûr a ni;

²⁵amah kalhtute pawh dawhthei takin a kilkawi tûr a ni, thutak hre tûrin Pathianin an rilru a lamlêttîr mai thei a,

²⁶Diabola thanga âwk, a duh zâwng a tihtîr ṭhinte chu lo chhuakin an lo harh leh mahna.