Read Mizo Lushai HNENA TIRHKOH PAULA LEHKHATHAWN PAHNIHNA TIMOTHEA 3 Bible Online

HNENA TIRHKOH PAULA LEHKHATHAWN PAHNIHNA TIMOTHEA 3 - Mizo Lushai bible

HNENA TIRHKOH PAULA LEHKHATHAWN PAHNIHNA TIMOTHEA 3

¹Ni hnuhnûngah chuan hun khirh tak a lo thleng dâwn tih hre rawh.

²Mi, mahni hmasial te, tangka ngaina te, inchhuang te; intivei te, Pathian pawi sawi hrât te, nu leh pa thu awih lo te, lâwm nachâng hre lo te, thianghlim lo te,

³pianpui hmangaihna nei lo te, huaikawm bâwl te, rêlchhiat chîng te, insûm thei lo te, nunrâwng te, ṭha hua te,

⁴dâwta hêk chîng te, pawisak nei lo te, chapo te, Pathian aia mahni nuam tih zâwng ngaihtuahtu te,

⁵a langa intisakhaw mi viau, chhûng lama takna nei si lo te an lo awm ang - chûng mite chu hawisan rawh.

⁶An zînga ṭhenkhat phei chu mi inahte an lêng an lêng ang a; hmeichhe chak lo anmahni rit phur, châk zâwng apiang ûm ruai,

⁷eng pawh zir peih viau, thutak hre thei bawk si lote chu an hîp ang.

⁸Jannia leh Jambrian Mosia an dodâl ang khân thutak an dodâl ang; an rilru a khawlo zo tawh a, rinnaah lah tihtlâk an ni tawh lo.

⁹Chûng bâk chu eng dang han ti thei tûr an ni lo, Jannia leh Jambria te ang bawk khân miten an âtzia an hai lo vang.

¹⁰Nang zawngin ka zirtîrna te, ka awm dân te, ka thiltum te, ka rinna te, ka dawhtheihna te, ka hmangaihna te leh ka chhelzia te i hria a.

¹¹Antiokei-ah te, Ikonion-ah te leh Lustra khuaah te tihduhdahna leh harsatna tam tak ka chunga lo thleng te, tihduhdahna ka tuar nasatzia leh chûng ata chu Lalpan mi chhan chhuah thu te kha i hria e.

¹²Tu pawhin Krista Isua nun mawi tak anga nun an tum phawt chuan tihduhdah an ni ngei ang.

¹³Mi sualte leh tihdertute erawh chu an chan a chhe tial tial ang a, mi dang bum ṭhîn mah se anmahni ngei pawh bum an ni ang.

¹⁴Nang erawh chuan, i zir tawh, i pawm ngheh tawh kha chelh tlat rawh, tu nge zirtîr che i hre si a. I naupan têt ata Lehkha Thianghlim chu i hre bel êm êm a, Krista Isua rin avânga chhandam ni tûra finna pe thei che a ni tih i hria.

¹⁶Pathian thâwkkhum Lehkha Thu zawng zawng hi intihdik nân te, insiamṭhat nân te, nun dân dik inzirtîr nân te a ṭangkai êm êm a ni.

¹⁷Chutianga hmang chuan a ni Pathian mi chu hman tlâk a lo niha, thil ṭha tinrêng ti thei tûra thuam a lo nih ṭhin ni.