Read Mizo Lushai HNENA TIRHKOH PAULA LEHKHATHAWN PAHNIHNA TIMOTHEA 4 Bible Online

HNENA TIRHKOH PAULA LEHKHATHAWN PAHNIHNA TIMOTHEA 4 - Mizo Lushai bible

HNENA TIRHKOH PAULA LEHKHATHAWN PAHNIHNA TIMOTHEA 4

¹Pathian leh Krista Isua, mitthi leh mi nung rorêltu tûra hmaah, a lo kal lehna leh a ram chhâlin thu ka pe a che.

²Thu chu hril rawh, hun ṭhaah emaw, ṭha lovah emaw bei zêl rawh; dawhthei taka zirtîr chungin an dik lohna kawhhmuh la, zilh la, fuih rawh.

³Zirtîrna dik ngaithla ṭha duh lovin an duh zâwng chauh ngaithlain, an bengverh zâwng zirtîrtute chauh an sâwm khâwm hun a la thleng dâwn.

⁴Thu dik an bengkhawn lo vang a, thawnthu mai mai an tuipui ang.

⁵Nang zawng engkimah inthunun la, tuar fan fan rawh; Chanchin Ṭha hril hna hi thawk zêl la, i rawngbâwl hna kha hlen rawh.

⁶Kei zawng hlan tûra tih ka ni tawh, khawvêl ata ka kal chhuah hun a thleng ta.

⁷Intihsiakna ṭha chu ka zo tawh a, ka tlânna tûrah ka tlân chhuak a, rinna chu ka vawng reng a ni;

⁸tûnah chuan thiam channa, chawimawina lukhum chu dawn chauh ka hmabâk tawh a ni; chu chu rorêltu dik Lalpa chuan, chumi ni-ah chuan min pe ang, keimah mai ni lovin, a lo lan hun nghâkhleltu zawng zawngte pawh a pe ang.

⁹Ka hnêna lo kal thuai han tum hrâm teh.

¹⁰Dema chuan tûnlai khawvêl a ngainat avângin Thesalonika khaw lamah mi kalsan ta. Kreska pawh Galatia ramah a kal a, Tita chu Dalmatia ramah a kal bawk a.

¹¹Luka chauhvin mi awmpui a ni. Marka kha rawngbâwl kawnga mi puitu ṭha tak a ni a, rawn hruai ang che.

¹²Tukika kha Efesi khuaah ka tîr ta.

¹³I lo kal hun chuan Troas khuaa Karpa hnêna ka kawrfual hnutchhiah kha han la la, ka lehkhabu nên, savun lehkhate phei kha chu han keng ngei ang che.

¹⁴Dâr chhûng mi Aleksandara khân ka pawi a khawih nasa hle a, Lalpan a thiltih ang zêlin a la thungrûl ang chu.

¹⁵A lakah khân nang pawh fîmkhur hle ang che, kan thu a dodâl nasa êm êm a ni.

¹⁶Thiamthu ka sawi hmasak ṭum chuan tu mah mi ṭantu an awm lo, min tlânsan vek a, (a mawh chu phur hlawm suh se).

¹⁷Lalpa erawh chuan mi awmpui a, mi tichak a, Jentail zawng zawng hriat tûrin Chanchin Ṭha chu ka puang kim ta; sakeibaknei ka ata chhan chhuah ka ni ta a.

¹⁸Lalpa chuan thil ṭha lo tinrêng lak ata mi chhan chhuak zêl ang a, him takin a vânram chu min thlen ang. Chatuan chatuanin ropuina chu a hnênah awm rawh se. Amen.

¹⁹Priskili leh Akuila te leh Onesifora chhûngte kha chibai ka bûk e.

²⁰Erasta chu Korinth khuaah a awm ta reng a. Trofima chu a dam loh avângin Mileto khuaah ka kalsan ta.

²¹Thlasik hmain lo kal tum hrâm ang che.

²²Eubula te, Pudea te, Lina te, Klaudii te leh unau zawng zawngten chibai an bûk a che. Lalpa chu i hnênah awm rawh se. Khawngaihna in zaa hnênah awm rawh se.