Read Mizo Lushai HNENA TIRHKOH PAULA LEHKHATHAWN TITA 1 Bible Online

HNENA TIRHKOH PAULA LEHKHATHAWN TITA 1 - Mizo Lushai bible

HNENA TIRHKOH PAULA LEHKHATHAWN TITA 1

¹Kei Paula hi, Pathian chhiahhlawh leh Isua Krista tirhkoh, Pathian mi thlante rinnaa kaihruai tûr leh

²sakhaw lam thu dik, chatuan nun beiseina chu hriattîr tûra ruat ka ni.

³Daw ngai lo Pathian chuan chu chu leilung pian hmain a lo tiam tawh a, ama thu ang ngeiin ṭha a tih hun takah a rawn tilang ta a, min Chhandamtu Pathian thupêk anga chu Chanchin Ṭha puan hna chu kawltîr ka ni.

⁴Kan pawm tlân rinna avânga ka fa tak tak Tita, chibai ka bûk a che. Pa Pathian leh min chhandamtu Krista Isua hnên ata khawngaihna leh remna i hnênah awm rawh se.

⁵Thil tihfel bâk tifel tûrin Kret thliarkârah ka hnutchhiah che a, thu ka pêk che ang khân khaw tinah upate ruatsak rawh.

⁶Upate chu sawisêl kai lo, nupui pakhat nei an ni tûr a ni; an fate pawh ringtu, nawmsakbâwl lama sawisêl kai lo leh luhlul lo ni rawh se.

⁷Kohhran hotu chu Pathian chhûngkaw enkawltu a ni a, sawisêl kai lo mi ni rawh se; mahni thu duh, thinram, zu rui mi, kut thlâk hmang, bawlhhlawh taka hlêp duh mi ni suh se.

⁸Mi inphal, thil ṭha duh, insûm thei, mi ngîl, mi thianghlim, mahni inthunun thei ni rawh se.

⁹Kan inzirtîrna thu rinawm tak hi man fuhtu a ni bawk tûr a ni; tichuan, zirtîrna dik a zirtîr thei ang a, hnialtute a timualpho thei bawk dâwn nia.

¹⁰Mi tam tak thunun ngai, pâwt mai mai, mi bum chîng an awm ṭeuh kha, chûngte chu serh tanho zînga mi an ni deuh ber;

¹¹an kâ huhsak tûr a ni; a chhûng chhûngin mite an chawk buai a, sum hmuh beiseiin zirtîr loh tûr tûr an zirtîr a.

¹²Kret mi, anmahni zâwlnei pakhat ngei pawhin, “Kret thliarkâr mite hi mi dawthei, ram sakawlh ang, thatchhe si, vir tak si an ni,” a tih hi thu dik tak a ni.

¹³Chuvângin, rinna dik an neih theih nân na takin zilh rawh.

¹⁴Juda-te thawnthu mai mai leh thutak hawisan tawhte thu zâwm tawh suh se.

¹⁵Mi thianghlimte tân zawng engkim hi a thianghlim a, mi bawlhhlawhte leh rinna nei lote tân erawh chuan eng mah hi thianghlim aram a awm lo; an thinlung leh an chhia leh ṭha hriatna chenin a bawlhhlawh a ni.

¹⁶Pathian hriaah an inngai a; mahse, an thiltihin a zir si lo; mi luhlul leh ngeiawm tak an ni a, thil ṭha eng atân mah an tlâktlai tawh lo.