Read Mizo Lushai HNENA TIRHKOH PAULA LEHKHATHAWN TITA 2 Bible Online

HNENA TIRHKOH PAULA LEHKHATHAWN TITA 2 - Mizo Lushai bible

HNENA TIRHKOH PAULA LEHKHATHAWN TITA 2

¹Nang erawh chuan zirtîrna dik i zirtîr zêl tûr a ni.

²Putarte chu insûm thei, zahawm, inthunun thei, rin dân dik, hmangaihna nei mi leh mi dawhthei ni tûrin fuih rawh.

³Chutiang bawkin pitarte pawh an chêt dâna Pathian ṭih mi ni tûrin fuih la, mi rêl hmang, uain heh mi ni suh se; thil ṭha zirtîr chîng sela,

⁴la nula deuhte chu an pasalte leh an fate hmangaih te,

⁵insûm theih te, thianghlim te, in chhûnga khawsak ṭhat te, ngilneih te leh pasal thu awih te zirtîr rawh; tichuan, Pathian thu hi sawichhiat a ni dâwn lo nia.

⁶Chutiang bawkin tlangvâlte pawh mahni inthunun tûrin fuih rawh.

⁷Nang phei chu thil ṭha tinrêng tih kawngah entawn tlâk takin awm la, zahawm tak leh tihtakzetin mite zirtîr ṭhîn la,

⁸ṭawngkam mawi, sawisêl tûr awm lo chu hmang ṭhîn ang che; tichuan, hnialtuten min sawichhiatna tûr rêng rêng an nei lo vang a, an zak zâwk dâwn nia.

⁹Bawihte chu kawng engkimah an pute hnênah intulût rawh se; an lâwm zâwngin awm sela, an chhâng lêt ve tûr a ni lo,

¹⁰an ei rûksak tûr a ni bawk lo; kawng engkimah rin tlâk takin an awm zâwk tûr a ni; tichuan, kan Pathian min chhandamtu zirtîrna thu hi engkimah a hlutzia an tilang dâwn a ni.

¹¹Mi zawng zawng chhandam an nih theih nân Pathian khawngaihna chu tihlan a lo ni ta a.

¹²Tûnlai hunah hian Pathian ngaihsak lohna leh khawvêl lam thil bânsan te, mahni invawng fela, dik taka awma sakhaw ngaihsak nun te min zirtîr a.

¹³Kan Pathian ropui leh min chhandamtu Isua Krista ropui taka a lo lanna ni lâwmawm kan beisei hi tihhlawhtlin a nih hun kan nghâk a ni.

¹⁴Amah ngei chu kan tân a inpe a, bawhchhiatna tinrêng lak ata min tlan chhuak a, ama mi atân min tithianghlim a, thil ṭha tih châkna min pe a ni.

¹⁵Hêng thu hi i hrilh tûr a ni; fuih la, thunei takin zilh rawh. Tu man ngainêp che suh se.