Read Mizo Lushai HNENA TIRHKOH PAULA LEHKHATHAWN PHILEMONA 1 Bible Online

HNENA TIRHKOH PAULA LEHKHATHAWN PHILEMONA 1 - Mizo Lushai bible

HNENA TIRHKOH PAULA LEHKHATHAWN PHILEMONA 1

¹Paula, Krista Isua avânga tâng leh kan unaupa Timothean kan thawhpui duh tak Filemona te,

²kan farnu Afii te, kan sipaipui Arkipa te leh i ina inkhâwm ṭhîn kohhran mîte chibai kan bûk e.

³Kan Pa Pathian leh Lalpa Isua Krista hnên ata khawngaihna te, remna te in hnênah awm rawh se.

⁴Ka ṭawngṭainaah te ka hre reng ṭhîn che u.

⁵I rinna thu leh Lalpa Isua leh mi thianghlimte i hmangaihzia ka hriatin Pathian hnênah lâwmthu ka sawi a ni.

⁶Rinna avânga inpâwlhona kan neih tâkna hian Kristaah chuan malsâwmna tinrêng kan dawnte hriatthiamna a tihthûk zual zêl ka beisei e.

⁷Unaupa, i hmangaihna thu ka hriatin ka lâwm êm êm a, mi thianghlimte thinlung pawh i chawh phûr thar tâk avângin ka thla a muang ta huai mai.

⁸Hei vâng tak hian Kristaa unau kan nihnaah i tih âwm ti tûrin thu pe ngam che mah ila,

⁹i hmangaihna hriain, kei putar Paula, tûna Krista Isua vânga mi tâng hian, a ngenin ka ngên zâwk dâwn che a ni.

¹⁰Ka fapa Onesima, tân ina ka hrin tân hian ka ngên che a ni.

¹¹Tûn hma khân i tân hman tlâk loh ni ṭhîn mah se, tûnah zawng ka tân a ṭangkai a, i tân pawh a ṭangkai tawh ang.

¹²Ka duhsakna thinlung zawng zawng nên i hnênah hei ka han tîr kîr e.

¹³Chanchin Ṭha avânga ka tân chhûng hian i aia min pui tûrin awmpui zêl ka duh hle a;

¹⁴mahse, rem i tih loh zâwng eng mah tih ka duh lo; min hmangaihna chu nangmah aṭanga puak chhuak ngei ni se ka duh avângin ani hi hrên luihsak che ka duh lo va ni.

¹⁵Eng emaw chhûng a tlân bosan che hi kumkhuaa i hnêna a ngam hlen tawhna ai a ni ngei ang.

¹⁶Tûnah zawng, bawih ang ni tawh lovin, bawih aia hlu tak, unau duh tak a ni tawh e; ka tân a duhawm êm êm a, i tân pawh tisa lamah leh Lalpaah a duhawm lehzual ngei ang.

¹⁷Chuvâng chuan, i thawhpui nia mi ngaih takmeuh chuan keimah ang maiin ani hi lo lâwm ang che.

¹⁸I lakah tihdik loh emaw, bat emaw a neih chuan ka rulh atân lo dah la.

¹⁹Kei, Paula hian keima kut ngeia ziakin ka rûl ang ka tih hi, nangmah ngei ka hnênah i inbat ve thu sawi tum phei zawng ka ni lo ve.

²⁰Tichuan, unaupa, Lalpa avângin he thil hi min tihsak la, Kristaah chuan ka thinlung tilâwm rawh.

²¹Ka ngenna che hi a hlawhtlin ngei beisei tlatin ka ziak a nih hi, ka beisei aia nasa mahin i tih ka ring nghe nghe.

²²In ṭawngṭainate chu chhân a niha, in hnêna lo chhuah ka inbeisei a, thlenna tûr in mi lo ngaihtuahsak ang che.

²³Epafra, Krista Isuaa ka tânpui hian chibai a bûk a che.

²⁴Ka thawhpui Marka te, Aristarka te, Dema te leh Luka te hian chibai an bûk a che.

²⁵Kan Lalpa Isua Krista khawngaihna chu in zaa hnênah awm rawh se.