Read Mizo Lushai HNENA LEHKHATHAWN HEBRAITE 1 Bible Online

HNENA LEHKHATHAWN HEBRAITE 1 - Mizo Lushai bible

HNENA LEHKHATHAWN HEBRAITE 1

¹Tûn hma hun zawng khân kawng tinrêngin Pathian chuan kan pi pute hnênah zâwlneite hmangin thu a sawi ṭhîn a;

²tûn hun hnuhnûngah hian kan hnênah Fapain thu a rawn sawi ta thung a ni; Ani chu a ro zawng zawng luahtuah a ruat a, amah hmangin lei leh vân hi a siam a, Ani chu a ropuina êng leh

³a zepui putu a ni bawk; engkim hi a thiltihtheihnain a khai ding a, sual faina kawng a siam hnuin Chungnungbera ding lamah khian a han ṭhu ta a.

⁴Vântirhkohte hming aia hming ropui a nei ta a; tichuan, anni ai chuan a ropui zâwk a ni.

⁵Vântirhkoh zînga tu hnênah nge, “Nang zawng ka Fapa i ni e, vawiin hian Fapaah ka nei ta che,” emaw, “A tân Pa ka ni ang a, Ka tân fapa a ni ang,” a tih ngai le?

⁶Fa tîra erawh chu khawvêla a rawn tirh khân, “Pathian vântirhkoh zawng zawngin ani chu chibai bûk rawh se,” a tih kha.

⁷Vântirhkoh chungchâng a sawi chuan, “Vântirhkoh chu thli-ah a chantîr a, A rawngbâwltute chu meialhah a chantîr,” a ti a.

⁸Fapa thu a sawi erawh chuan heti hian a ti: “Aw Pathian, i lalṭhutthlêng chu a awm kumkhua ang. I ram rorêlna chu rorêlna dik a ni.

⁹Felna i ngaina a, dik lo i hua a, Chuvângin, Pathian, i Pathian chuan I ṭhiante aiin duhsakna hriak a thih ta bîk che a ni.”

¹⁰Heti pawh hian a ti bawk: “Aw Lalpa, a tîrah nangin lei hi i siam a, Vânte pawh khi i kutchhuak a ni.

¹¹Chûngte chu an la boral ang a, Nang erawh chu i awm reng ang. Chûng zawng zawngte chu silhfên angin an la hlui ang a,

¹²Puan angin i zial ang a, Silhfên angin i la thlâk ang. Nang zawng i ngai reng a, Kin ni i nei lo vang.”

¹³Vântirhkoh zînga tu hnênah nge, “Ka ding lamah lo ṭhu rawh, I hmêlmate I ke nghahchhanah ka han siam ang e,” a tih ngai?

¹⁴Vântirhkoh zawng, thlarau chhandamna changtute rawngbâwlsak tûra tirh an ni lâwm ni?