Read Mizo Lushai HNENA LEHKHATHAWN HEBRAITE 10 Bible Online

HNENA LEHKHATHAWN HEBRAITE 10 - Mizo Lushai bible

HNENA LEHKHATHAWN HEBRAITE 10

¹Dân chuan thil ṭha lo awm tûrte hlimthla, a tak ni lo, a lem chauh a ken avângin, kum tina inthawina pângngai an hlan fote chuan a hlântute chu engtin mah a tifamkim thei lo va ni.

²Tifamkim thei sela, inthawina hlântute hi tihthianghlim an nih tawha, suala inhriatna an neih tawh si loh chuan inthawina hlan an bânsan daih tawh dâwn lâwm ni?

³Chutih ahnêkin he inthawina hian an sual tih kum tin a hriat nawntîr ṭhîn a ni.

⁴Kêlpa leh bâwngpate thisen chuan sualte tibo thei rual a ni lo.

⁵Chuvângin, khawvêla a lo luh lai khân heti hian a ti: Inthawina leh thilhlan i duh lo va, Ka tân taksa mi buatsaihsak zâwk a.

⁶Pum hâl inthawina leh sual tâna inthawina I lâwm hek lo.

⁷Chu veleh, keiin, “Aw Pathian, ngai teh, lehkhabu ziala ka chanchin an ziak ang khân I duhzâwng ti tûrin ka lo kal e,” ka ti a.

⁸A hmasaa, ‘Inthawina te, thilhlan te, pum hâl inthawina leh sual tâna inthawinate i duh lo va, i lâwm hek lo,’ tih hi Dân thupêk ang taka inthawina hlan ṭhin kha a ni.

⁹“Chu veleh, ngai teh, i duhzâwng ti tûrin ka lo kal e,” a tih leh tâk hi, inthawinain a rawn thlâk ta tihna a ni.

¹⁰Isua Krista chuan Pathian duhzâwng anga, kumkhua atân ṭum khat a taksa a hlan avângin tihthianghlim kan ni ta a ni.

¹¹Puithiamte chuan dingin kâwla ni chhuak chhiara rawngbâwlin inthawina pângngai an hlân fo va; mahse, chûng inthawina chuan engtin mah sual a tibo thei si lo.

¹²Ani erawh hi chu, chatuan atân sual thawina vawi khat a hlan hnuin, Pathian ding lamah a han ṭhu ta a.

¹³A hmêlmate a ke nghahchhana siam an nih hun chu a nghâk ta a ni.

¹⁴Vawi khat a inhlanna khân a tihthianghlimte chu chatuan atân a tifamkim ta a ni.

¹⁵Thlarau Thianghlim pawhin heti hian min hriattîr:

¹⁶“Chûng nia an hnêna ka thuthlun tûr chu hei hi a ni,” Lalpan a ti: “An thinlungah ka Dânte ka dah ang a, An rilruah ka ziak bawk ang,” tia a sawi hnu khân,

¹⁷“An sualte leh an bawhchhiatnate ka hre reng tawh lo vang,” a ti a.

¹⁸Tichuan, sualte ngaihdam a nih tawh si chuan sual tâna thil hlan a ngai tawh lo.

¹⁹Tichuan, unaute u, Isua thisen zârah Hmun Thianghlim Bera luhna kawng thar leh nung,

²⁰daidanna puanzâr kal tlangna kawng chu min hawnsak ta a, chu puanzâr chu a taksa kha a ni.

²¹Tichuan, Pathian chhûngte tân Puithiam Ropui tak kan neih avângin

²²sual inthiam lohna rilru sil faisaka awma, kan taksa pawh tuifîma bual faiin, thinlung tak leh rinna nghet tak nên Pathian chu i hnaih ang u.

²³Beiseina thurin kan pawm hi nghîng lovin i chelh tlat ang u. A tiamtu chu a rinawm si a.

²⁴Hmangaihna ngah tûr leh thil ṭha ti tûra inchawhthawh dân i ngaihtuah ang u.

²⁵Ṭhenkhatin inkhâwm thlahthlam an chîng angin chîng ve lo ila, i infuih zâwk ang u; ni chu a lo hnai ta tih in hriat avângin i uar lehzual ang u.

²⁶Thutak hriatna kan neih tawh hnu pawha kan sual luih zêl si chuan, sualte la bo thei inthawina a awm tawh dâwn lo va;

²⁷rorêlna leh amah dodâltute tiboral tûr Pathian thinurna mei, thlaphâng taka nghah ngawt loh chu hmabâk dang kan nei lo.

²⁸Mosia Dân pawisa lotute chu thuhretu pahnih pathum thuin khawngaihna tel miah lova tihhlum an ni ṭhîn.

²⁹Pathian Fapa rap beta, thuthlung thisen, amah tihthianghlimna chu thil narâna ruata, khawngaihna Thlarau sawichhetu chu nasa lehzuala hrem tûrah in ngai lo vem ni?

³⁰“Phuba rêng rêng keima lâk tûr a ni, keimân ka thungrûl ang,” tih leh “Lalpan a mite a ngaihtuah ang,” titu hi kan hre si a.

³¹Pathian nung kut tuar chu râpthlâk tak a ni.

³²Hmâna tihêna in awm hnua hrehawm nasa tak in tuar lai nite kha hre reng rawh u.

³³A chângin vântlâng ennawm atân hmuhsit leh tihduhdah in tuar a, a châng phei chuan chutiang tuarte tuarna chu in ṭâwmpui ve a.

³⁴Kawlbunte chu in lainat a, in thil neih an lâksak che u pawhin lâwm takin in tuar a; thil ṭha zâwk, awm hlen tûr chu in nei tih in hriat avângin.

³⁵Chutichuan, in huaina kha hloh suh u, lâwmman ropui tak a nei dâwn a ni.

³⁶Pathian duhzâwng ti tûr leh a thiltiam dawng tûr chuan in chhel a ngai a ni.

³⁷Rei lo tê-ah lo kal tûra chu a lo kal dâwn, a muang lo vang.

³⁸Rin vânga thiam ka chantîr chu a nung ang, a hnungtawlh erawh chuan ka rilruin amahah lâwmna rêng a nei lo vang.

³⁹Keini zawng boral tûra tawlh kîr thei kan ni tawh lo va, nunna hum tûra rinna chelh tlattute kan ni zâwk e.