Read Mizo Lushai HNENA LEHKHATHAWN HEBRAITE 11 Bible Online

HNENA LEHKHATHAWN HEBRAITE 11 - Mizo Lushai bible

HNENA LEHKHATHAWN HEBRAITE 11

¹Rinna hi kan beiseite hriat chianna, thil kan hmuh lohte hriatfiahna a ni.

²Rinna thu-ah hian upate kha an fakawm a ni.

³Khawvêl hi Pathian thu-a siam a nih leh, lang lo aṭangin hmuh theihte hi a lo awm ta tih rinnain kan hmu a ni.

⁴Abela chuan rinnain Kaina inthawina hlan aia hlu Pathian hnênah a hlân a, a thilhlan chu a lo pawm a, Pathian hmuha mi dik nih a hlawh ta a. Thi tawh mah se rinna avângin thu a la sawi ta zêl a ni.

⁵Enoka chu rinna avângin thihna tem lova lâk bo a ni a. Pathianin a lâk bo avângin hmuh tûr a awm ta lo. Lâk bo a nih hma khân Pathian a tilâwm tih Lehkha Thu-in a sawi.

⁶Rinna lo chuan Pathian tihlâwm rual a ni lo. Tu pawh Pathian hnêna lo kal chuan Pathian chu a awm ngei a, amah zawngtute tihlawhtlingtu a ni tih an ring tûr a ni.

⁷Nova chuan thil lo thleng tûr chungchânga hrilhlâwkna a dawn chu a ngai pawimawh êm êm a, rinnain an chhûngkaw him nân lawng a tu a. Chu chuan khawvêl thiam loh a chantîr a, rinna avânga thiam chantîr a lo ni ta.

⁸Abrahama chuan a rochun tûr rama kal tûra Pathian kohna chu rinnain a zâwm a, a kalna lam tûr pawh hre lovin a thawk chhuak a.

⁹Ram tiamah chuan, mi rama châm ang maiin, rinnain a châm ta reng a, thutiam thuhmun a dawnpui tûr, Isaka leh Jakoba nên, puan inah an khawsa a.

¹⁰Pathian ruahman leh din, lungphûm nghet tak nei khawpui chu Abrahama hian a nghâk ta reng a.

¹¹Sari ngei pawh a ching a, upa lutuk tawh mah se Abrahama chuan rinnain chi thlah theihna a dawng a, thutiam chu a ring tlat a.

¹²Tichuan, thi ang mai ni tawh mah se he mi pakhat aṭang hian chi thlah, vâna arsi anga tam, tuifinriat kama ṭiau chhiar sên loh zât an lo chhuak ta a ni.

¹³Hêngho hi rinna neiin an thi a, thil tiam chu an chang rih lo na a, hla tak aṭangin an lo hmu phâk a, an hlut êm êm a. Leiah hian mikhual leh zin châm mai an ni tih an inhria.

¹⁴Chutiang mai an nih hriate chuan mahni ram hlun tûr chu an zawng zâwk tih an tilang.

¹⁵An chhuahsan ram kha lungkham ni se kîr lehna hun remchâng an hmu thei ngei ang.

¹⁶Ram ṭha lehzual, vâna awm chu an ngai zâwk a ni. Tichuan, Pathian pawhin an Pathian nih a zak lo va, an tân khua lam a lo buatsaih tawh a ni.

¹⁷Abrahama chuan, fiaha a awm lai khân a fapa neih chhun Isaka chu rinnain inthawi nân a hlân a.

¹⁸Thutiam dawngtu a ni a, “Isaka-ah hian i thlahte chhui an ni ang,” tih ni mah se,

¹⁹Pathian chuan mitthi pawh a kai tho thei ang tih ringin a hlân ta a, thi hnu dam leh ang maiin a hmu kîr leh ta ngei rêng a.

²⁰Rinnain Isaka chuan thil lo la awm tûrahte Jakoba leh Esauva mal a sâwm a.

²¹Jakoba chuan a thih hma khân Josefa fapate chu rinnain mal a sâwm ve ve a, a tiang rinchhana kûnin Pathian chibai a bûk a.

²²Josefa chuan a thih a lo hnaih khân Aigupta ram ata Israel thlahte an lo chhuah tûr thu sawiin, rinnain a ruang phûm dân tûr a hrilh a.

²³Mosia a pian khân nau hmêlṭha tak a ni tih an hmuhin, a nu leh pain thla thum chhûng rinnain an thukru a, lal thupêk pawh an hlau lo.

²⁴Mosia chuan, a lo puitlin hnu khân, Farawa fanua fapaa vuah a duh lo va,

²⁵rei lo te atâna sual nawmna chen ai chuan, Pathian mite nêna tihduhdahna tuar rinnain a thlang ta zâwk a.

²⁶Aigupta ram hausakna zawng zawng ai chuan Krista an hmusitna chu ro hlu zâwkah a ngai a, lâwmman a dawn tûr chu a thlîr tlat a:

²⁷Lal thinur pawh hlau lovin Aigupta ram chu rinnain a chhuahsan a, Hmuhtheihlohva chu a hmuh avângin chhel takin a tuar a.

²⁸Rinnain Kalhlên Kût a din a, Tiboraltua khân an fa tîrte a khawih loh nân kawngka biangah thisen a thehtîr a.

²⁹Rinnain Tuipui Senah khân leichâra kal ang maiin an kal kai a. Aigupta miten kai ve an tum khân an tla hlum ta vek si a.

³⁰Rinnain Jeriko kulh chu ni sarih an hual a, a chim ta a.

³¹Nawhchizuar Rahabi chuan rinnain enthlatute kha lâwm takin a lo thleng a, ring lotute zîngah a boral ve ta lo.

³²Ka la sawi zêl dâwn em ni? Gideona te, Baraka te, Samsona te, Jeftha te, Davida te, Samuela te leh zâwlneite chanchin sawi dâwn ila hunin mi daih dâwn si lo.

³³Chûngte chuan rinnain ram te an la a, thil dik an ti a, thiltiam te an dawng. Sakeibaknei khâ te an tihchihsak a,

³⁴meialh hluah hluahte an timit a, khandaiha thah an pumpelh a, chak lo tê ni mah se tihchak an ni a, indonaah chak tak an ni a, hmêlma kulh an tichim a.

³⁵Hmeichhiaten an chhûngte thi lo nung leh an lo lâwm a, a ṭhenin tihduhdah an tuar a, thawhlehna nun hlun an neih theih nân chhan chhuah pawh an duh lo.

³⁶Ṭhenkhatin tihnawmnah leh vuak an tuar a, a ṭhen khaidiata hlina tân ina khung an ni a.

³⁷Ṭhenkhat lunga den an ni a, ṭhenkhat thingzainaa zai bun an ni a, a ṭhen berâm leh kêl vun sinin an vâkvai a, tihduhdahin rethei takin hrehawm an tuar a.

³⁸Chûng mite tân chuan khawvêl hi awmna tlâk a ni lo, thlalêrah te, tlângah te, pûkah te, khuarkhurumah te an vâk an vâk ṭhîn.

³⁹Chûng zawng zawng chuan an rinna avângin fak lo hlawh tawh mah se, thil tiam chu an chang lo va.

⁴⁰Pathian chuan kan tân thil ṭha lehzual a lo buatsaih tawh a, keini leh anni a ruala tihfamkima kan awm theihna tûrin a lo rêl a ni.