Read Mizo Lushai HNENA LEHKHATHAWN HEBRAITE 12 Bible Online

HNENA LEHKHATHAWN HEBRAITE 12 - Mizo Lushai bible

HNENA LEHKHATHAWN HEBRAITE 12

¹Chutichuan, chhûmpui nasa tak ang thlîrtuten min hual vêl avângin, min tihnawk thei apiang leh sual min tibuai ṭhînte chu hlîpin, kan hmaa intlânsiaknaah hian chhel takin i tlân zêl ang u.

²Isua, kan rinna innghahna bul leh tifamkimtu chu i en tlat ang u. Ani pawhin a hmaa lâwmman awm avâng chuan, mualphona chu ngainêpin krawsah chhel takin a tuar a, Pathian lalṭhutthlêng ding lamah chuan a han ṭhu ta a ni.

³Chutianga mi sualten an dodâlna zawng zawng a tuar chhuah dânte kha ngaihtuah ula; tichuan, in beidawng lo vang a, in chau dâwn lo nia.

⁴Sual dovin thisen chhuak khawpin in la ṭang lo ve.

⁵Fate anga zilhna che u thu kha in theihnghilh ta em ni? “Ka fa, Lalpa thununna chu ngainêp suh la, A zilhhauva i awmin hnual hek suh.

⁶Lalpa chuan a hmangaih chu a thunun ṭhîn a, Fa a lawm apiang chu a vaw ṭhîn,” tih a nih kha.

⁷Thununna chu tuar hrâm hrâm rawh u, fate chunga tih angin Pathianin in chungah a ti a nih hi. Pa thunun loh fa tu nge awm ngai le?

⁸Faten an hlawh ṭhin Pa thununna chu in hlawh ve loh chuan, fa tak ni lovin sâwn in ni ang asin.

⁹Min thununtu pa kan nei ṭheuh va, kan zah êm êm si a. Kan nunna tûrin thlarau lama Pa thununna hnuaiah kan kûn lehzual tûr a ni dâwn lâwm ni?

¹⁰Kan paten ṭha an tih angin rei lo tê chu min thunun ṭhîn ngei tak a, ani erawh chuan a thianghlimna kan chan ve theih nân, kan ṭhatna tûrin min thunun zâwk ṭhîn a ni.

¹¹Thununna rêng rêng hi tuar lai chuan thil lâwmawmah a ngaih theih loh va, hrehawm tak a ni; mahse, insawizawi hnuah chuan rah thlamuanawm tak a chhuah a, mi a siam ṭha ṭhîn.

¹²Chutichuan, in kut awm mai maite hna thawhtîr ula, in khûp zâwi tawhte chu tichak leh ula,

¹³kebai sa chu pelhsawlh lova a dam zâwk theih nân in kawngte timâm rawh u.

¹⁴Mi zawng zawng nêna inremna leh thianghlimna ûm rawh u; chumi tel lo chuan tû man Lalpa an hmu thei lo vang.

¹⁵Pathian khawngaihna tû man an tlûksan loh nân te, in zîngah mi tibuai leh tibawlhhlawh thei rilru chhia a lo chhuah loh nân te fîmkhur ula;

¹⁶inngaih chîng te, Esauva anga mi puithu lote tu mah in awm loh nân fîmkhur bawk rawh u. Esauva chuan a fa tîr nihna chu chaw vawi khat eiah a hralh kha.

¹⁷Chumi hnu chuan a malsâwmna dawn tûr chu a duh leh pawhin hnâwlin a awm ta a, mittui nên ngên mah se tihdanglamna hun a awm tawh lo tih in hriat kha.

¹⁸In tlâng thlen hi Sinai tlâng ang a ni lo ve; Sinai tlâng zawng khawih theih a ni a, chu tlâng chu meialh chhuahna, thim chhah mupin a khuh, thlipui tlehna,

¹⁹tawtawrâwt rîk ruai ruaina, au thâwm nasa tak awmna a ni. Chu aw hriate chuan thu dang sawi zêl lo tûrin an ngên a.

²⁰“Sa pawhin tlâng chu a khawih chuan lunga den hlum tûr a ni,” tih thupêk chu an zo lo va.

²¹A hlauhawm êm avângin Mosia pawhin “Hlauvin ka khûr,” a tih hial kha.

²²Tûnah zawng Zion tlâng Pathian nung khawpui, vân Jerusalem-ah, vântirhkoh sâng tam tak te,

²³fa tîr kohhran, vâna hming chuang te, mi tin rorêlsaktu Pathian leh tihfamkim tawh mi fel thlarau te inkhâwmpuina hmaah in ding ta a,

²⁴Abela thisen aia ṭha zâwka thu sawi thei thisen thehtu Isua, thuthlung thar palai hnên in lo thleng ta a nih hi.

²⁵Thu rawn sawitu hi in lo hnar hlauh dah ang e, fîmkhur rawh u. Leia an hnêna thu sawitu lo hnarte mah khân hrem an pumpelh si loh chuan, vân aṭanga thu rawn sawitu kan lo hawisan hlauh chuan hrem kan pumpelh lo lehzual ang.

²⁶Chutih lai chuan a aw khân lei a nghawr nghîng a, tûnah zawng, “Vawi khat chu lei mai ni lovin, vân pawh ka tinghîng leh dâwn,” tiin a tiam a ni.

²⁷“Vawi khat chu” tih hi thilsiamte chu tihnghîna sawn bo an ni ang a, tihnghîn theih lohte chauh an awm reng dâwn tihna a ni.

²⁸Tichuan, ram tihnghîn theih rual loh kan chan avângin i lâwm ang u, zah tak leh ṭih tak chungin a lâwm zâwngin Pathian rawng i bâwl ang u.

²⁹Kan Pathian hi mi kâng ral thei mei a ni si a.