Read Mizo Lushai HNENA LEHKHATHAWN HEBRAITE 13 Bible Online

HNENA LEHKHATHAWN HEBRAITE 13 - Mizo Lushai bible

HNENA LEHKHATHAWN HEBRAITE 13

¹Unau inhmangaihna hi uar zêl rawh u.

²Mikhual chungah ṭhat chuh ula, chutiang tiin ṭhenkhatten hre lovin vântirhkohte an thleng asin.

³Lung in tângte chu tâng ve angin hre reng ula, hrehawm tuarte pawh tisaa awm ve bawk in nih avângin hre reng rawh u.

⁴Inneih hi mi zawng zawngin chawimawi tûr a ni a, nupa chu rinawm tawn rawh se. Inngaite leh uirete chu Pathianin a ngaihtuah dâwn si a.

⁵Sum ngaina mi ni lo ula, in thil neih tâwkah lungawi rawh u. Amah ngeiin, “Engtikah mah ka thlahthlam lo vang che a, kal pawh ka kalsan tawp lo vang che,” a ti si a.

⁶Chuvângin, “Lalpa chu mi ṭanpuitu a ni a, ka hlau lo vang, Mihringin eng nge min tih theih ang?” kan ti ngam a ni.

⁷In hotute, Pathian thu lo hrilhtu che u chu hre reng ula, an lo khawsak dân ngun taka ngaihtuahin an rin dân zir rawh u.

⁸Isua Krista chu niminah nên, vawiinah nên, kumkhua pawhin a pângngai reng a ni.

⁹Zirtîrna chi dang dang leh mak tak tak hruai bovin awm suh ula, Pathian khawngaihna, chhûng lam nun min tichak theitu dawn hi, ei leh in dân kawnga khermei ai chuan a ṭha zâwk a, chutianga khermeite chuan an sâwtpui chuang si lo.

¹⁰Tempula rawngbâwltuten keini maichâmah chuan an ei ve a thiang lo.

¹¹Puithiam lalberin ran thisen chu sual thawi nâna hlan tûrin Hmun Thianghlim Berah a luhpui a; mahse, ran ruangte chu kulh pâwnah an hâl ṭhîn.

¹²Chuvângin, Isua pawhin, ama thisen ngeia mite a tihthianghlim theih nân khawpui pâwnah a lo tuar ta a ni.

¹³Chutichuan, amah an hmuhsitna chu phurin, a hnênah kulh pâwnah i kal chhuak ang u.

¹⁴Leiah hian kan tân khaw hlun a awm lo va, khaw lo la awm tûr kan zawng zâwk a ni.

¹⁵Chutichuan, ama zâra fakna inthawina chu Pathian hnênah i hlân fo vang u, a hming kan ṭan apiangin fakna inthawina chu kan hlân ṭhîn a ni si a.

¹⁶Nimahsela, thil ṭha tih leh inṭanpui tawn hi theihnghilh suh u, chu chu Pathian lâwmzâwng inthawina chu a ni.

¹⁷In hotute thu awih ula, an thu thuin awm rawh u. Mutmu pawh tuah thei lovin in thlarau nun an vênsak che u a, Pathian hnêna in chungchâng sawitu tûr an ni. An thu in awih chuan hlim takin an thawk ang a, in awih loh chuan hrehawm ti takin an thawk ang, chu chu in tân a sâwt hek lo vang,

¹⁸Mi ṭawngṭaisak fo rawh u; eng lai pawhin thil ṭha tih kan duh avângin chhia leh ṭha hriatna thiang tak kan nei tih kan inhria.

¹⁹In hnênah Pathianin mi tirh kîr leh thuai theih nân min ṭawngṭaisak tûrin ka ngên chiam a che u.

²⁰Berâmpu ropui, kan Lalpa Isua chu mitthi zîng ata hruai chhuaktu remna Pathian chuan, chatuan thuthlunna thisen avâng chuan

²¹a duhzâwng ti thei tûrin thil ṭha tinrêngin thuam famkim che u sela, Isua Krista zârah a lâwmzâwng ang taka awm tûrin min siam sela, Krista hnênah chuan chatuanin ropuina awm rawh se. Amen.

²²Unaute u, he fuihna thu hi ngai thei hrâm hrâm tûrin ka ngên a che u, ka lehkhathawn che u hi tawi tê chauh a nih hi.

²³Kan unaupa Timothea kha lung in ata an chhuah ta tih lo hre rawh u, a lo thlen hman chuan ka rualin ka rawn hruai ang.

²⁴In hotu zawng zawng leh mi thianghlim zawng zawng kha chibai mi bûksak ang che u. Itali rama mite hian chibai an bûk a che u.

²⁵In zaa hnênah khawngaihna awm rawh se.