Read Mizo Lushai HNENA LEHKHATHAWN HEBRAITE 2 Bible Online

HNENA LEHKHATHAWN HEBRAITE 2 - Mizo Lushai bible

HNENA LEHKHATHAWN HEBRAITE 2

¹Chuvângin, kan thu dawnte kha kan pawisa lehzual tûr a ni, chuti lo zawng kan tawlh bo hlauh dah ang e.

²Vântirhkoh hmanga thu sawi mah a ngheh êm êma, a bawhchhetu leh pawisa lotu rêng rêng an phu tâwka hrem an nih zêl si chuan,

³heti kauva chhandamna pawimawh hi kan thlahthlam vaih chuan, engtin nge hrem kan pumpelh theih tehlul ang? Chu chhandamna chu Lalpa ngeiin a rawn puang hmasa a, a thu dawngtute khân min nemnghehsak a.

⁴Pathian meuh pawhin chhinchhiahna te, thil mak te leh thiltih ropui tak te tiin, Thlarau Thianghlim thilpêk chu ṭûl a tih ang zêla semin a rawn nemnghet bawk a ni.

⁵Khawvêl lo la awm tûr chu vântirhkohte thuhnuaiah a dah lo tih kan sawi a nih hi.

⁶Tu emaw chuan hetiang hian khawiah emaw a sawi: “Mihring hi eng nge maw a niha, i hriat reng ṭhin ni? Mihring Fapa pawh hi eng nge maw a niha, i ngaihtuah ṭhin ni?

⁷Ani chu vântirhkohte aia hnuaiin i siam rih a, Ropuina leh chawimawina i khumtîr a,

⁸a ke hnuaiah engkim i dah a,” tiin. “A ke hnuaiah engkim i dah,” tih hian engkim takmeuh a huam a ni; amaherawhchu, tûnah engkim a hnuaia awmin kan la hre rih lo.

⁹Nimahsela, Isua, “Vântirhkohte aia hnuaia siam rih” chu thihna tuar avânga ropuina leh chawimawina khumtîr a ni ta tih kan hmu, Pathian khawngaihna azârah mi tin tân thihna a temsak ta a ni.

¹⁰A ropuina chang ve tûra fa tam tak hruai lûttu, an chhandamna siamtu, a zâra engkim awma, a tâna engkim awm bawka tân chuan, tuarnate avânga tihfamkima a awm chu a âwm rêng a ni.

¹¹Tithianghlimtu leh tihthianghlimte chu Pa thuhmun aṭanga chhuak an ni; chuvângin, anniho chu ‘unaute,’ tih a zak lo ve:

¹²“Ka unaute hnênah i hming ka lam ang a. Kohhran zîngah i fak hla ka sa ang,” a ti a.

¹³“Amahah ka rinna ka nghat ang,” pawh a ti a. “En teh, kei leh Pathian mi pêk naupangte hi,” a ti bawk.

¹⁴Naupang a tihte hi tisa leh thisen nei an ni a, ani pawh chutiang chu a lo ni ve ta a ni.

¹⁵Tichuan, thihna chunga thuneitu Diabola chu, a thihna avângin a titlâwm a, dam chhûnga thih hlau rêng rênga awm ṭhîn, hlauhna bawiha tângte chu a chhuah ta a ni.

¹⁶A rawn ngaihsakte hi vântirhkoh an ni lo, Abrahama thlahte an ni a rawn ngaihsakte chu.

¹⁷Chuvâng chuan, min lainattu, Pathian tâna Puithiam lalber rinawm tak, mi zawng zawng sual thuphachawina hlântu ni tûr chu, kawng engkima a unaute anga a lo awm a ṭûl rêng a ni.

¹⁸Amah ngei chu thlêmna tuar chhuak tawh a nih avângin thlêmna tuarte pawh a ṭanpui thei a ni.