Read Mizo Lushai HNENA LEHKHATHAWN HEBRAITE 3 Bible Online

HNENA LEHKHATHAWN HEBRAITE 3 - Mizo Lushai bible

HNENA LEHKHATHAWN HEBRAITE 3

¹Chuvâng chuan, unau thianghlim, vân kohna chang vete u, kan thurina Tirhkoh leh Puithiam lalber, Isua chu ngaihtuah rawh u.

²Pathian chhûngkaw pum pui tân Mosia a rinawm ang bawkin ani pawh a ruattu tân a rinawm a.

³Chhûngkaw dintu chu a chhûngte aiin an chawimawi zâwk ang hian, Isua pawh Mosia aia ropuina nasa zâwk hmu tlâk a ni.

⁴Chhûngkaw tin hi tu din emaw an ni vek a; engkim dintu chu Pathian a ni.

⁵Mosia chu chhiahhlawh niin Pathian chhûngkaw pum pui tân a rinawm a, Pathian thu sawi puang chhâwngtu a ni a.

⁶Krista erawh chu Fapa niin Pathian chhûngkaw tân a rinawm a ni; keini hi a chhûngte chu kan ni, kan beiseina ngaihṭhatthlâk tak leh chhuanawm tak hi kan chelh tlat phawt chuan.

⁷Chutichuan, Thlarau Thianghlimin heti hian a ti: “Vawiin hian a aw in hriat chuan Thlalêra mi fiah lai,

⁸Hel lai nî ang khân In thinlung tikhauh suh u.

⁹Kum sawmli chhûng in pi puten Ka thiltihte hmu chungin mi chhin a, mi fiah bawk a.

¹⁰Chuvângin, chu chhuanho chungah chuan ka thinur ta a, An rilruin a hruai pêng a, Ka kawng pawh an hre ta lo; ka ti a.

¹¹Thinur taka ka tiam tâk ang khân Ka chawlhnaah an luh ka phal lo vang,” tiin.

¹²Unaute u, fîmkhur rawh u, chuti lo chuan Pathian nung tlûksan tûrin tu thinlungah emaw rin lohna sual a lo lût dah ang e.

¹³‘Vawiin,’ tih a nih chhûng hian in zînga tu mah suala an tlûka, an thinlung an tihkhauh loh nân nî tin infuih tawn zâwk rawh u.

¹⁴A tîra kan rinna kha a tâwp thlenga kan vawn tlat phawt chuan Krista ṭâwmpuitute kan ni asin.

¹⁵‘Vawiin hian a aw in hriat chuan, hel lai ni ang khân In thinlung tikhauh suh u,’ tih a ni a.

¹⁶ A nih leh tute nge hre reng chunga hel kha? Aigupta ram aṭanga Mosia hruai chhuahte kha an ni lo vem ni?

¹⁷Kum sawmli chhûng khân tute chungah nge a lungnih loh kha? Thil sual titute, thlalêra tlu hlum tate chungah khân a ni lo vem ni?

¹⁸Thu awih lote chungah chauh lo chuan tu hnênah nge a chawlhnaa lût lo tûra thu a tiam le?

¹⁹Chutichuan, an rin loh avângin an lût ve thei ta lo tih kan hria.