Read Mizo Lushai HNENA LEHKHATHAWN HEBRAITE 4 Bible Online

HNENA LEHKHATHAWN HEBRAITE 4 - Mizo Lushai bible

HNENA LEHKHATHAWN HEBRAITE 4

¹A chawlhnaa luh theihna thutiam a la din reng chhûng hian in zîngah tlai lutuk ta nia inngai in awm hlauh vang tih a hlauhawm a nia.

²Annihovin Chanchin Ṭha an hriat ang bawkin keini pawhin kan hre ve ta a. Anni chuan rinnaa ngaithlatute an rem loh avângin an thu dawn chu an sâwtpui lo va ni.

³Keini ringtute hi a chawlhnaa lût tate chu kan ni; Pathianin lei leh vân a siam zawh khân a hna a chawlhsan nâ a, ‘Thinur taka ka tiam tâk ang khân, Ka chawlhnaah chuan an lût lo vang,’ a la ti reng a ni.

⁴Ni sarih ni thu-ah chuan, ‘Pathianin a hna thawh zawng zawng ni sarih niin a chawlhsan ta a,’ tiin khawiah emaw ziak a nih kha.

⁵‘Ka chawlhnaah chuan an lût lo vang,’ tih thu-ah hian a ṭhen lût tûr an awm tihna a ni.

⁶Chanchin Ṭha hre hmasate khân an rin loh avângin an lût thei ta lo va.

⁷Kan sawi tâk, ‘Vawiin hian a aw in hriat chuan in thinlung tikhauh suh u,’ tih hi Davida sawitîrin kum tam tak hnuah Pathian chuan ni dang, ‘vawiin’ a tih chu a rawn ruat leh ta a ni.

⁸Josua khân ‘chawlhnaah’ chuan hruai lût ni se, Pathianin hun dang a ruat leh lo vang.

⁹Chuvângin, Pathian mite tân chawlhna hun dang a la awm dâwn a ni.

¹⁰Pathianin a hnathawh a chawlhsan ang bawkin Pathian tiam chawlhna changte chu an thawhrimna ata an la châwl dâwn.

¹¹Rin loh avânga an tlu ang khân tu mah kan tlûk ve loh nân, chu chawlhnaa lût tûr chuan theihtâwp i chhuah ṭheuh vang u.

¹²Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni.

¹³A mit hmuha lang lo thil siam rêng rêng a awm lo. Kan chanchin kan sawina tûra mit hmuhah chuan engkim hi saruak leh inhawng sa a ni vek zâwk a ni.

¹⁴Tichuan, vânahte kal tlang tawh Puithiam lalber ropui tak, Isua, Pathian Fapa chu, kan neih avângin kan thurin hi i vuan tlat ang u.

¹⁵Kan Puithiam lalber neih hi kan chak lohnate min hriatpui pha lo a ni lo va, keimahni ang bawka kawng tinrênga thlêmna tâwk tawh, sual si lo chu a ni.

¹⁶Chutichuan, puih kan ngaih hun taka zahngaihna leh khawngaihna kan hmuh theihna tûrin, khawngaihna lalṭhutthlêng chu huai takin i hnaih ang u.