Read Mizo Lushai HNENA LEHKHATHAWN HEBRAITE 5 Bible Online

HNENA LEHKHATHAWN HEBRAITE 5 - Mizo Lushai bible

HNENA LEHKHATHAWN HEBRAITE 5

¹Puithiam lalberte chu mihring zîng ata thlan chhuah an ni ziah ṭhîn, mihring tân Pathian lama rawngbâwl tûra ruat an ni a, thilpêkte leh sual tâna inthawinate hlân tûra tih an ni.

²Anni pawh chu chak lohna hual vêla awm ve bawk an nih avângin, hre lote leh bawhchhiate an dîm thiam ṭhîn.

³Chuvângin, mi dangte tân sual thawina an hlansak ang bawkin, anmahni tân pawh an hlân ngei tûr a ni.

⁴Tu man hetiang inchawimawina hi mahni an inkhumtîr ngai lo va, Arona anga Pathian kohte chauhvin an khum zâwk ṭhîn a ni.

⁵Chutiang bawkin, Krista pawh chu mahni inchawimawiin Puithiam lalberah a insiam lo. “Nang zawng ka Fapa i ni e. Vawiin hian fapaah ka neih ta che,” titu khân a ruat zâwk a ni.

⁶Hmun dangah pawh, “Nang zawng Melkisedeka puithiamna ang chi-a chatuan puithiam i ni e,” a ti bawk.

⁷Ani chuan a tisa put lai nite khân thihna laka amah chhan theitu hnênah nasa taka au leh mittui tla chunga dîlin a ṭawngṭai a. Pathian a ṭih ṭhin avângin a dîlna chu ngaihthlâk a ni ta a.

⁸Fapa meuh pawh ni mah sela, a thil tuarahte chuan thu awih a zir ta a.

⁹Tihfamkima lo awmin, a thu awih zawng zawngte tân chatuan chhandamna bulpui a lo ni ta.

¹⁰Tichuan, Melkisedeka puithiamna ang chî-a Puithiam lalberah Pathianin a ruat ta a ni.

¹¹Chu mi chungchângah chuan sawi tûr tam tak kan nei a, in la mâwl êm avângin hrilh fiah pawh a harsa a ni.

¹²A hun ngaihtuah chuan zirtîrtu ni tawh hial âwm in ni na a. Pathian thu chu a bul rêt aṭanga zirtîr in ngai leh ta a ni. Chaw tak ni lovin hnutetui in la mamawh a nih hi.

¹³Hnute hne laite chu nausên an la nih avângin chaw tak, felna thu chu an la ei thei lo.

¹⁴Chaw tak erawh chu puitling tân a ni. Chûngte chuan a chhia leh a ṭha thliar thiam tûrin an rilru an sawizawi tawh a ni.