Read Mizo Lushai HNENA LEHKHATHAWN HEBRAITE 6 Bible Online

HNENA LEHKHATHAWN HEBRAITE 6 - Mizo Lushai bible

HNENA LEHKHATHAWN HEBRAITE 6

¹Chutichuan, Krista chungchânga zirtîrna thu mâwl tê tê chu sawi tawh lovin puitlin lam i pan ang u; thiltih sâwt lo bânsan thu te, Pathian rin thu te,

²baptisma thu te, kut nghah thu te, mitthi thawhlehna thu te leh chatuan rorêl inzirtîrna thu te sawi nawn sawi nawn tawh lovin.

³Pathianin rem a tih chuan chu chu tih kan tum a ni.

⁴Tihêna awm tawh, vân thilpêk tema, Thlarau Thianghlim pawh chang ve tawh,

⁵Pathian thu tuina leh khawvêl lo la awm tûr thiltihtheihna tem tawh zeta,

⁶tlûksan leh tate chu sim tûra hruai kîr leh rual an ni tawh lo; anmahni ngeiin Pathian Fapa chu khêngbet nawn lehin an timualpho va ni.

⁷Lo, a chunga ruahtui tla ṭhîn lo dawnga, a neitu tâna thlai ei tlâk chhuah ta chu Pathianin mal a sâwm ṭhîn.

⁸Amaherawhchu, hnim leh hlîngte chauh chhuah chu mâkin a lo awm a, ânchhe dawn hmabâk a lo ni a, a tâwpah hâl a tâwk ṭhîn.

⁹Duh takte u, chutiang thu chu sawi mah ila nangni zawng in dinhmun a ṭhat zâwka, chhandam in nih ngei ka ring tlat a ni.

¹⁰In thil tih ṭhin, tûnah pawh in la tih zêl ṭhin, a hming vânga hmangaihna in lantîr te leh, mi thianghlimte rawng in bâwlsak ṭhin te hi theihnghilh mai tûrin Pathian chu mi fel lo a ni lo ve.

¹¹Tu pawhin in beiseina hi a thlen famkim hma chuan taihmâk in chhuah zêl ka duh êm êm a ni.

¹²Dâwngdah lova ring tlat leh dawhthei taka nghâk fan fan ṭhîn, Pathian thutiam changtute anga in awm kan duh a ni.

¹³Pathianin Abrahama hnêna thu a tiam lai khân, a aia ropui zâwk chhâl tûr an awm loh avângin amah leh amah inchhâlin thu a tiam a.

¹⁴“Matheilovin mal ka sâwm ang chia, ka tipung ngei ngei ang che,” tiin.

¹⁵Tichuan, Abrahama chuan a nghâk fan fan a, Pathian thiltiam chu a dawng ta a.

¹⁶Mihringte chuan anmahni aia ropui zâwk chhâlin chhia an chham ṭhîn, chutiang chhechham chuan thu inchuh a titâwp a, a tinghet ṭhîn a ni.

¹⁷Pathian pawhin a thutiam a sût loh tûrzia entîr nân thutiam dawng tûrte hnênah mahni inchhâl meuhvin a nemnghet a.

¹⁸Sût leh mai mai loh chi hêng thil pahnih - thutiam leh mahni inchhâlna avâng hian, Pathian chu daw rual a ni lo ve. Chuvângin, keini, a hnêna tlânte hian him nân kan hmaa beiseina chu thlamuang takin kan chelh thei a ni.

¹⁹Chu beiseina chu kan nun thîrchakaiah kan nei a, rinawm leh nghet tak a ni; Hmun Thianghlim Berah a inthlung lût a.

²⁰Chutah chuan kan tân, kan hmahruaitu Isua a lût tawh a, Melkisedeka puithiamna ang chi-a chatuan Puithiam lalber a ni ta.