Read Mizo Lushai HNENA LEHKHATHAWN HEBRAITE 7 Bible Online

HNENA LEHKHATHAWN HEBRAITE 7 - Mizo Lushai bible

HNENA LEHKHATHAWN HEBRAITE 7

¹Chu Melkisedeka chu Salem khaw lal a ni a, Pathian Chungnungbera puithiam a ni bawk. Ani chuan Abrahama, lalho that lo haw kha a lo hmuak a, mal a sâwm a.

²Abrahama chuan ani chu a râllâk sum zawng zawng aṭang chuan sâwma pakhat a pe a. A hming awmzia hi ‘Felna lal’ tihna a ni phawt a. Salem lal a nih bawk avângin ‘Remna lal’ tihna a ni bawk.

³Ani chu pa nei lo, nu nei lo, thlahtu chhui tûr awm lo, a awm ṭan ni leh a nun tâwp ni sawi tûr awm lo a ni a; Pathian Fapa ang mai a ni a, puithiam a ni reng a ni.

⁴Thlahtu Abrahaman a rallâk sum zawng zawng aṭanga sâwma pakhat a pêka chu a ropuizia hi ngaihtuah teh u.

⁵Puithiam hna chelhtu Levia thlahte chuan Dân thu angin an unau Israel mite, Abrahama thlah ve thote lakah sâwma pakhat lâk tûr thu an hmu a.

⁶Levia thlahte zînga tel ve si lo Melkisedeka chuan, Abrahama hnên aṭangin sâwma pakhat a la a, thutiam dawngtu Abrahama chu mal a sâwm a.

⁷Hnial rual lohvin a tê zâwk chu a ropui zâwkin mal an sâwm ṭhîn a ni.

⁸Puithiamte thu-ah chuan, thi thei mihringten sâwma pakhat an dawng a, Melkisedeka thu-ah erawh chuan nung renga an sawi chuan sâwma pakhat chu a dawng a ni.

⁹Tin, Levia, sâwma pakhat dawngtu ngei pawh khân Abrahama kutin Melkisedeka hnênah sâwma pakhat a pe tih theih a ni,

¹⁰Melkisedekan a lo hmuah lai khân Levia chu a pu Abrahama ṭhalbea awm a ni si a.

¹¹Chutichuan, Levia thlahte puithiam hna nêna inthlunga Dân hi pêk a ni a; chûng avânga famkim theih ni ta sela, Arona puithiamna ang chî ni lo, Melkisedeka puithiamna ang chi-a puithiam dang awm a ngai dâwn em ni?

¹²Puithiam hna kalhmang thlâk a nih tâk si chuan Dân pawh chu thlâk a ngai rêng a ni.

¹³A chanchin kan sawia hi maichâm rawngbâwlna khawih ve ngai lo hnam zînga mi a ni.

¹⁴Kan Lalpa chu Mosian puithiam thu a sawi laia sawi tel ve ngai loh Juda hnama mi a nih chiang takin kan hria.

¹⁵Puithiam chi dang, Melkisedeka ang chi, mihring Dân anga puithiam ni ve satliah lo,

¹⁶tihchhiat rual loh nunna thu-a ruat a lo awm ta hian kan thu chu a tifiah lehzual a ni.

¹⁷Lehkha Thu chuan: “Melkisedeka puithiamna ang chî-a chatuan puithiam i ni e,” a ti a.

¹⁸Thupêk hmasa chu a chak lo va, a hman tlâk loh avângin hnâwl a ni ta a.

¹⁹Dân chuan eng mah a tipuitling thei si lo. Beiseina ṭha zâwk, Pathian min hnaihtîrtu chuan a rawn thlâk ta a ni.

²⁰Hming chhâl meuhva a rawn thlâk a ni, puithiam dangte chu chutianga ruat an ni ve si lo.

²¹Ani erawh hi chu hming chhâl meuhva ruat a ni, a ruattu chuan a hnênah: “Lalpan hming a chhâl, A lamlêt tawh lo vang, Nang zawng chatuan atân puithiam i ni e,” a tih kha.

²²Tichuan, chu thuthlung, Isua ngeiin a nemngheh chu a va ropui êm!

²³Danglamna a la awm: Thihna avângin an puithiamna hna an chhunzawm kumkhua thei lo va; chuvângin, mi tam tak puithiamah siam an ni.

²⁴Ani erawh hi chu a nun reng avângin a puithiamna chu thlâk theih lohvin a nghet ta a ni.

²⁵Tichuan, Amaha Pathian hnêna kalte chu eng ang pawh a chhandam thei reng a, an tân Pathian hnêna ngensak tûrin a nung reng si a.

²⁶Chutiang chî Puithiam lalber chuan kan mamawh a phuhrûk zo êm êm a ni; a thianghlim a, pawi a sawi lo va, a hmêlhem lo va, mi sualte lakah a fihlîm a, vân aia sângah tûnah chawimawi a ni ta.

²⁷Puithiam lalberte chuan nî tin mahni sual tân inthawina an hlân ṭhîn a, chumi zawhah mipuite sual tân an hlân ve leh ṭhîn a; ani erawh hi chuan chutianga ti ve lovin mahni a inhlân a, mi zawng zawng tân inthawina chu ṭum khatah, kumkhua atân a hlân tlingtla ta a ni.

²⁸Dân chuan Puithiam lalber ni tûrin mihring chak lo tê tê a ruat ṭhîn a. Dân awm hnu daiha hming chhâla thutiam chuan Fapa, chatuan atân tihfamkim tawha chu, Puithiam lalberah a rawn ruat ta a ni.