Read Mizo Lushai HNENA LEHKHATHAWN HEBRAITE 8 Bible Online

HNENA LEHKHATHAWN HEBRAITE 8 - Mizo Lushai bible

HNENA LEHKHATHAWN HEBRAITE 8

¹Tichuan, kan thu sawi tum ber chu: chutiang Puithiam lalber chu kan nei ta tih hi a ni. Vânahte khian Ropuibera lalṭhutthlêng ding lamah a han ṭhu a.

²Hmun Thianghlim leh biakbûk tak tak, mihring sak ni lo, Lalpa sak zâwkah chuan rawng a han bâwl ta a ni.

³Puithiam lalber te chu thilpêkte leh inthawinate hlân tûra ruat an ni a. Chuvângin, ani pawh hian eng emaw tal hlan tûr a neih a ngai a ni.

⁴Leiah hian la awm reng sela, puithiam hna rêng a thawk lo vang, Dân anga thilpêk hlântu tûrte an awm reng si a.

⁵Mosian biakbûk a sak dâwn laiin Pathianin a sak dân tûr a hrilh a, “Tlânga a lem ka entîr ang chiah che khân engkim i siam tûr a ni tih hre reng rawh,” a tih ang khân hêngho rawngbâwlna hi vân thil lem leh hlimthla mai a ni.

⁶Tûna ani rawngbâwlna neih tâk hi zawng, thutiam ropui zâwkah a innghat a, thuthlung ṭha lehzual a rawn thlen ang bawk hian, an rawngbâwlna ai chuan a ropui zâwk êm êm a ni.

⁷Thuthlung hmasa kha sawisêlbo ni ta sela, thlun nawn a ngai lo tûr.

⁸Anmahni demin hetiang hian a sawi a nih zâwk kha: “Ngai teh u, nite a lo thleng dâwn,” Lalpan a ti. “Israel chhûngte leh Juda chhûngte chu Thuthlung thar ka siampui ang.

⁹An pi pute Aigupta ram ata ka hruai chhuah laia, An kutte ka chelh nia, An hnêna ka thlun ang kha ni lovin, Ka thuthlungah chuan an awm reng loh avângin Anmahni ka ngaihsak ta lo va ni,” Lalpan a ti.

¹⁰“Chûng nîa Israel chhûngte hnêna thu ka thlun tûr chu hei hi a ni: An rilruah ka Dânte ka dah ang a. An thinlungah ka ziak bawk ang, An Pathian ka ni ang a, ka mite an ni bawk ang,” Lalpan a ti.

¹¹“Tu mahin ‘Lalpa chu hre rawh u,’ tiin, Mahni khuate leh unaute an inzirtîr tawh lo vang. A tê ber aṭangin a lian ber thlengin An za-in mi hre vek tawh dâwn a ni.

¹²An bawhchhiatnaahte zah ka ngai ang a, An sualte pawh ka hre reng tawh lo vang,” tiin.

¹³Thuthlung thar a sawi tâk avângin thuthlung hmasa chu a tihlui ta a, lo upaa hlui ta chu a bo thuai dâwn a ni.