Read Mizo Lushai HNENA LEHKHATHAWN HEBRAITE 9 Bible Online

HNENA LEHKHATHAWN HEBRAITE 9 - Mizo Lushai bible

HNENA LEHKHATHAWN HEBRAITE 9

¹Thuthlung hmasaah pawh khân rawngbâwl dân tûr leh rawngbâwlna tûr Hmun Thianghlim, leia mi chu ruat a ni a.

²Biakbûk an sa a, a tawntirhah chuan khâwnvâr dahna te, dawhkân, chhangdah awmna te a awm a, chu chu Hmun Thianghlim an ti a.

³Puanzâr pahnihna chhûngah chuan biakbûk Hmun Thianghlim Ber an tih chu a awm a.

⁴Chutah chuan rimtui hâlna rangkachak maichâm te, Thuthlung Bâwm rangkachak tia luan te a awm a. Thuthlung Bâwm chhûngah chuan mana dahna rangkachak bêl te, Arona tiang chawr te, thuthlung ziakna lung phêk te a awm a.

⁵A chungah chuan ropuina cherub-te an awm a, sual thuphachawina hmun chungah chuan an thla an zâr a. Chûng thute zawng tûnah a kip a kawiin kan sawi hman lo vang.

⁶Chutianga rem chu a ni a, puithiamte chu biak bûk tawntirhah chuan an puithiam rawngbâwl hna thawkin nî tin an lût ṭhîn a.

⁷A dawttuah erawh chuan Puithiam lalber chauh, kum khatah vawi khat, thisen keng ngeiin a lût ṭhîn, chu chu ama tân leh mipuiten hre lova an tihsual thawi nân a hlân ṭhîn a ni.

⁸Hêng thil rem dân aṭang hian biakbûk tawntirh hi a la awm chhûng chu, Hmun Thianghlim Bera luhna kawng chu a la inhawng rih lo va ni tih Thlarau Thianghlim chuan min kawhhmuh a ni.

⁹Hêngte hi tûn hun entîrna a ni: hêng dân anga thil hlante leh inthawina hlante hian a hlântu mipuite thinlung chu a tifamkim thei lo;

¹⁰chûng chu ei leh in, insil dân hrang hrang, tisa lam thil mai mai a ni a, Siamṭhatna hun thlen hmaa hman tûra tih chauh a ni.

¹¹Krista erawh chu thil ṭha tûna lo thleng taahte Puithiam lalber a ni ta a, a rawngbâwlna biakbûk pawh chu, mihring sak a ni lo va, he khawvêla thilsiam ang pawh hi a nih loh avângin a ropuiin a famkim zâwk a ni.

¹²A thisen hlan pawh chu kêlpa leh bâwngtuaite thisen ni lovin, ama thisen ngei a ni a, Hmun Thianghlimah chuan vawi khat lûtin chatuan atâna tlanna a siam ta.

¹³Kêlpate leh bâwngpate thisen leh bâwngla vâp, mi bawlhhlawhte chunga theh mahin, an tisa thiang khawpa anmahni a tihthianghlim theih si chuan,

¹⁴Krista thisen chuan a va tithianghlim zo dâwn êm! Ani chu chatuan thlarau zârah thilhlan hmêlhem lo atân Pathian hnênah amah a inhlân a, a thisen chuan Pathian rawng bâwl tûrin thiltih sâwt lo lakah kan chhia leh ṭha hriatna a tithianghlim ta.

¹⁵Hemi avâng hian Krista chu thuthlung thar palai a ni; thuthlung hmasa bawhchhiatnate laka mite a tlan chhuah theihna tûra a lo thih tâk avângin, kohte chuan chatuan roluah tûr tiam chu an chang ta a ni.

¹⁶Thurochhiah pawh hi a chhiahtu a thi tawh nge la thi lo fiah hmasak a ṭûl ṭhîn;

¹⁷a chhiahtu a la dam chhûng chuan hman theih a la ni rih lo va, a thih hnu chauhva hman tûr a ni.

¹⁸Chuvângin, thuthlung hmasa pawh kha thisena tihngheh a nih kha.

¹⁹Dân thu-a thupêk tinrêng Mosian mipuite a hrilh lai khân, bâwngpatuai thisen chu tui nên, sâpsen nên, husop nên a la a, lehkhabu zial leh mipui zawng zawng chu a theh a.

²⁰“Hei hi in zawm tûr Pathianin in hnêna a pêk thuthlung tihnghehna thisen a nih hi,” a ti a.

²¹Tin, biakbûk leh rawngbâwlna hmanrua zawng zawng pawh chutiang bawkin thisen chuan a theh a.

²²Dân thu ang chuan engkim deuhthaw mai hi thisena tihthianghlim tûr a ni a, thisen chhuah lovin ngaihdamna a awm thei si lo.

²³Chutichuan, vân thil anpuite mah chutianga tihthianghlim chu a ṭûl a, vân thil tak takte phei chu chûng aia inthawina ṭha zâwka tihthianghlim a ṭûl ngei tûr a ni.

²⁴Kuta sak hmun tihthianghlim, a tak anpuiah chuan Krista chu a lût a ni lo ve, vânah khian a han lût zâwk a, tûnah kan aiawhin Pathian hmaah a han ding ta a ni.

²⁵Puithiam lalber chu mahni thisen ni lo, ran thisen kenga kum tin Hmun Thianghlima a lût ṭhîn ang hian ani chu mahni inhlân nawn fo tûrin a lût ve hek lo.

²⁶Chuti ni suh sela leilung pian tirh aṭang khân vawi tam tak a tuar tûr a ni. Nimahsela, tûn hun tâwpah hian sual tihreh nân amah inhlân tûrin vawi khat a lo lang ta a ni.

²⁷Mihring tân vawi khat thih ruat a ni, chumi hnuah rorêlna a awm ang.

²⁸Chutiang bawkin Krista pawh chu mi tam tak sualte la bo tûrin ṭum khat hlan a ni tawh a. Sualte la bo tûr ni tawh lovin, amah lo nghâktute chhandamnaa hruai lût tûrin a lo kal leh dâwn a ni.