Read Mizo Lushai LEHKHATHAWN JAKOBA 1 Bible Online

LEHKHATHAWN JAKOBA 1 - Mizo Lushai bible

LEHKHATHAWN JAKOBA 1

¹Pathian leh Lalpa Isua Krista bawih Jakoba hian, hnam sâwm leh hnam hnih khawvêla pêm darhte chu chibai ka bûk e.

²Ka unaute u, fiahna tinrêng in tawh hunin thil lâwmawmah ngai vek rawh u.

³In rinna fiaha a awm hian tuarchhel in zir a ni tih in hre si a.

⁴Chhel taka tuarna hian, tlin lohna laite siam ṭhain mi a tipuitling a, a tifamkim ṭhîn.

⁵In zîngah tu pawhin finna a tlâkchham chuan, mi zawng zawng hnêna hau lova phal taka pe ṭhîntu Pathian chu dîl rawh se, pêk a ni ang.

⁶Amaherawhchu, rinna neiin, ringhlel hauh lovin dîl rawh se; ringhleltu chu thliin tuifinriat a chhêma a tihfâwn ang hi a ni si a.

⁷Chutiang mi rilru mumal lo, a thiltih eng maha nghet lo chuan Lalpa hnên ata eng mah hmuh inring suh se.

⁹Unau rethei tak chu chawisâna a awmin lâwm sela,

¹⁰hausa pawh tihtlâwma a awmin lâwm bawk rawh se, hnim pâr angin a hausakna chu a ral mai dâwn si a.

¹¹Ni a lo chhuak a, thli lum a lo tlehin hnim chu a tivuai a, a pâr chu a tla a, a mawina a lo chuai ṭhîn. Chutiangin mi hausa pawh a sum buaipui chungin a boral dâwn a ni.

¹²Fiahna tâwka ding nghet tlat chu a nihlawh e, fiaha a awm hnuin Lalpan amah hmangaihtute pêk a tiam, chawimawina lukhum, nunna chu, a chang dâwn si a.

¹³Tu man thlêmna an tawhin, “Pathianin min thlêm alâwm maw le,” ti suh se. Pathian chu sual tûra thlêm rual a ni lo, amah lahin mi a thlêm ngai bawk hek lo.

¹⁴Mi tin hi mahni châkna suala thlêm an ni ṭheuh zâwk a, chu chuan a hîpin a hruai bo ṭhîn a ni.

¹⁵Chu châkna chuan no a pai a, sual a hring a, a lo puitlin chuan thihna a hring ṭhîn.

¹⁶Ka unau duh takte u, bumin awm suh u.

¹⁷Thilpêk ṭha tinrêng leh thilpêk famkim tawh phawt chu chung lam aṭanga lo kal, êng siamtu Pa hnên ata lo chhuak a ni. Amah chu a danglam ngai lo va, inher danglamin vânglai leh mang lai a nei lo va, thimah min awmtîr ngai lo.

¹⁸A thilsiamte zînga rah hmasa atân ama duh ang takin thutakah min hring a ni.

¹⁹Ka unau duh takte u, hêng hi hre rawh u. Mi tinin ngaihthlâk lam uar sela, sawi lam chuh lovin dawh thei rawh se;

²⁰mihring thinurna hi Pathian felna tihlanna kawng a ni si lo.

²¹Chuvângin, thil tenawm chi tin leh sual tinrêng paih bo ula, in thinlunga Pathian thu tuh, chhandam thei che u chu, thuhnuairawlh takin pawm rawh u.

²²Thil tih awm si lova thu ngaihthlâk ngawt tâwka ngaiin mahni inbum hek suh u.

²³Tu pawh thu ngaithlatu ni-a zâwm si lo chu, darthlalanga mahni hmêl entu ang a ni.

²⁴Ngun takin a inen a, a kal sawn hnu chuan eng ang hmêl pu nge a nih a theihnghilh leh mai si a.

²⁵Amaherawhchu, tu pawh dân famkim, min tizalêntu chu bih nguna, chutianga awm renga, ngaithlaa, theihnghilh leh mai lova, a zawma zâwmtu ngei chu a thiltih apiangah a hmuingîl ang.

²⁶Tu pawh sakhaw mi tak nia inngaia, a lei vêng hneh si lo chu mahni inbum a ni a, a sakhua chu engmahlo mai a ni.

²⁷Kan Pa Pathian mit hmuha sakhaw biak dân thianghlim leh sual tel lo chu hei hi a ni: fahrah leh hmeithaite an hrehawm laia kana, khawvêl bawlhhlawh kai lova invawn ṭhat hi.