Read Mizo Lushai LEHKHATHAWN JAKOBA 2 Bible Online

LEHKHATHAWN JAKOBA 2 - Mizo Lushai bible

LEHKHATHAWN JAKOBA 2

¹Ka unaute u, kan Lalpa ropui tak Isua Krista ringtute chuan hleih nei suh u.

²In sunagog-ah mi rangkachak zungbun buna kawr ṭha tak ha lo lût sela, mi rethei kawr chhe tak ha lo lût bawk sela;

³kawr ṭha ha chu in lo ngaihsaka, “Nang chu ṭhutna ṭhaah hian ṭhu rawh,” in tiha, mi rethei hnênah chuan, “Nang chu saw tah sâwn ding rawh,” emaw, “Ka ke bul chhuatah hian ṭhu rawh,” emaw in tih si chuan,

⁴hleih in nei a, in thlîr dân rilru a sual hle a ni lâwm ni?

⁵Ka unau duh takte u, ngaithla teh u, khawvêl ngaiha mi retheite hi rinnaa hausa tûr leh, amah hmangaihtute hnêna a ram tiam chang atân Pathianin a thlang lo vem ni?

⁶Nangni zawngin mi retheite chu in zah lo va. Mi hausate hi nangmahni hnehchhiahtute leh rorêlna ina hnûk lût ṭhîntu che u an ni lâwm ni?

⁷Hming duhawm tak in put chu sawichhetute an ni lâwm ni?

⁸“Nangmah i inhmangaih angin i vêngte i hmangaih tûr a ni,” tih Lehkha Thua chuang Dân ropui ber hi in zawm chuan in ti ṭha e;

⁹Hleih in neih erawh chuan thil sual in ti a ni e, Dân bawhchhetute in ni.

¹⁰Tu pawhin Dân zâwm vek mah se, pakhat pawh a bawhchhiat si chuan a zavaia bawhchhia a ni.

¹¹“Uire suh,” titu chuan, “Tual that suh,” a ti bawk si a; uire lo mah la, tual i thah si chuan Dân bawhchhia i ni tho mai.

¹²Tichuan, Dân, min zalêntîrtu hmanga rêlsak tûr kan ni tih inhriain thu sawi ula, thil ti bawk rawh u.

¹³Khawngaihna tel lova thil titu chu khawngaihna tel lova rêlsak a ni ang, mi khawngaih thei erawh chuan rorêlna hlauh tûr a nei lo.

¹⁴Ka unaute u, miin, “Rinna ka nei,” ti sela, a thiltihah tilang si lo sela, eng nge a sâwtna? Chutiang rinna chuan a chhandam thei ang em?

¹⁵Unaupa emaw, farnu emaw saruak leh rilṭâmin awm sela,

¹⁶in zînga tuin emaw, “Thlamuang takin kal ta la lum tak leh puar takin awm ang che,” ti sela, a taksa tâna mamawh chu a pêk si loh chuan eng nge a sâwtna?

¹⁷Chutiang bawkin thil tih tel lova rinna chauh hi chuan awmzia a nei lo va ni.

¹⁸“A ṭhenin an ring a, a ṭhenin thil an ti a ni mai alâwm,” tia ṭang an awm thei e. A nih leh, thil tiha tilang si lova rinna i neih theih dân min entîr ta che, keiin rinna ka nei tih ka thiltihin ka entîr ang che.

¹⁹Pathian pakhat chauh a awm tih i ring maw? I ti ṭha e, ramhuaite pawhin chu chu an ring a, an khûr ṭhîn asin.

²⁰Mi â pa, rinna hi thiltih tel lo chuan eng mah a ni lo tih i hre duh maw?

²¹Min thlahtu Abrahama kha a fapa Isaka, maichâma a hlan lai khân, a thiltih avânga thiam chantîr a ni lâwm ni?

²²A rinna leh a thiltih chu a ṭang kawp a, a thiltih chuan a rinna chu a tifamkim ta tih i hria e.

²³Lehkha Thu, “Abrahaman Pathian a ring a, a rin avâng chuan thiam changah pawm a ni ta,” tih chu a thleng a, Pathian ṭhiana vuah a ni ta a.

²⁴Miin thiltih avângin thiam an chang a, rinna avâng chauh chuan a ni lo tih in hre ta.

²⁵Chutiang chuan Rahabi, nawhchizuar pawh khân, mi tirhte chu a lo lâwm a, kawng dangah a hâwntîr a, a thiltih avâng khân thiam a chang a ni lâwm ni?

²⁶Taksa hi thlarau tel lo chuan thi a ni angin, thil tih tel lo chuan rinna pawh hi thi a ni.