Read Mizo Lushai LEHKHATHAWN JAKOBA 4 Bible Online

LEHKHATHAWN JAKOBA 4 - Mizo Lushai bible

LEHKHATHAWN JAKOBA 4

¹In zînga indona leh insualna te hi khawi aṭanga lo chhuak nge ni? Nawmchen in duhna, in thinlung chhûnga indona thlen ṭhîntu aṭangin a ni lo vem ni?

²In awt a, in nei si lo; tual in thah phah a; in ît a, in nei thei bawk si lo, in inhauvin in insual phah a; Pathian hnênah in thlen loh avângin in duhzâwng chu in nei lo va;

³in dîl pawhin in dîl dân a dik loh avângin in hmu lo, nuamtâwl nân hman in tum si a.

⁴Uirete u, khawvêl ṭhian nih hi Pathian hmêlma nihna a ni tih in hre lo vem ni? Khawvêl ṭhian nih duh apiang chu Pathian hmêlmaah a insiam a ni.

⁵Lehkha Thu-in, “Keimahnia a thlarau a dah hian min duh hliah hliah zia a entîr a ni,” a tih hi a sawi satliah mai niin in ring em ni?

⁶Khawngaihna min vûr tam zâwk mah lehnghâl asin. Chuvângin, “Pathianin chapote a dodâl a, Inngaitlâwmte erawh chu a khawngaih ṭhîn,” tih a ni.

⁷Chuvângin, Pathian hnênah intulût ula, Diabola erawh chu dodâl rawh u; tichuan, a tlânsan ang che u.

⁸Pathian hnaih rawh u, ani pawhin a hnaih ang che u. Mi sualte u, in kutte sil fai ula, mi vervêkte u, in thinlung tithianghlim rawh u.

⁹Mangang ula, lungngai ula, ṭap rawh u; in nuih lungngaihah chang sela, in hlim nguiah chang rawh se.

¹⁰Lalpa hmaah chuan inngaitlâwm ula; tichuan, a chawisâng ang che u.

¹¹Unaute u, insawichhe tawn suh u. Tu pawh a unau sawichhia emaw, dem emaw chuan Dân a sawichhia a, Dân a dem a ni; Dân i dem chuan, Dân zâwmtu i ni lo va, rorêltu i ni zâwk e.

¹²Dân petu leh rorêltu pakhat chauh a awm - chhandam theia tiboral theitu chu; nang, ṭhenawmte dem veitu chu tu nge maw i nih le?

¹³Ngaithla teh u, nangni, “Vawiinah nge, naktûkah nge ni ang, khawii khuaah emaw kan kal ang a, chutah chuan kum khat kan va sumdâwng ang a, kan hlêp ṭeuh mai ang,” titute u;

¹⁴naktûkah in nunna chu eng angin nge a awm dâwn tih pawh in hre si lo. Chhûm, rei lo tê lo langa, ral leh ta mai ang lek hi in ni si a.

¹⁵“Lalpan rem a tih chuan kan dam ang a, chumi khami chu kan ti ang,” in ti zâwk tûr a ni.

¹⁶Tûnah zawng chapo takin in uang a. Chutianga chapo taka awm chu sual a ni.

¹⁷Chutichuan, thil ṭha tih tûr hriaa ti si lo chu a sual a ni.