Read Mizo Lushai LEHKHATHAWN JAKOBA 5 Bible Online

LEHKHATHAWN JAKOBA 5 - Mizo Lushai bible

LEHKHATHAWN JAKOBA 5

¹Nangni mi hausate u, ngaithla teh u, in chunga hrehawm lo thleng tûr avâng hian ṭap ula, chiau vawng vawng rawh u.

²In hausaknate a chhe zo ta a, in puante pawh thîmin a ei zo ta.

³In rangkachak leh tangka pawh a lo tuiêk zo va, a tuiêk chu in thiam lohzia lantîrtu a ni ang a, meiin thil a kâng ral angin in tisa chu a ei zo vang. Ni hnuhnûngah hian ro in khâwlkhâwm a nih hi.

⁴Ngai teh u, in lova thawktute hlawh in hrênsakte chu an au va, buh sengtute au thâwm chu Engkim Lalpa beng a thleng ta.

⁵Leiah hian nuamsa tak leh nuamtâwlin in awm a, inthah rûnpui ni atâna inchâwm thau mai in nih hi.

⁶Mi Diktaka chu thiam loh in chantîr a, in that a, ani chuan a dodâl loh che u kha.

⁷Chutichuan, unaute u, Lalpa lo kal hma zawng chhel takin awm rawh u. Lo neituin a lo aṭanga rah seng tûr a nghah dân hi en rawh u; ruah hmasa leh ruah hnuhnûng a nghâk fan fan ṭhîn.

⁸Nangni pawh chhel takin awm ula, rilru nghet tak pu rawh u; Lalpa lo kal lehna a hnai tawh si a.

⁹Unaute u, thiam loh changa in awm loh nân innghirngho suh u. Ngai teh u, rorêltu chu kawngka bulah a awm reng tawh a ni.

¹⁰Unaute u, Lalpa hminga thu sawitu zâwlneiten tihduhdahna chhel taka an tuar dân kha entawn atân hmang rawh u.

¹¹Chhel taka tuartu chu nihlawh kan ti a ni. Joba tuarchhelzia in hria a, Lalpan a tâwpa a tih dân kha in hria e. Lalpa chu zahngaihna leh khawngaihnain a khat si a.

¹²Ka unaute u, eng pawh ni se, chhia zawng chham suh u, vân emaw, lei emaw, thil dang chhâlin emaw chhia chham suh u, ‘ni’ in tih chu ‘ni’ ti mai ula, ‘ni lo’ in tih chu ‘ni lo’ ni mai rawh se; chutichuan, thiam lohvin in awm dâwn lo nia.

¹³In zîngah vânduaina tâwk an awm em? Ṭawngṭai rawh se. Hlim an awm em? Fak hla sa rawh se.

¹⁴In zîngah damlo an awm em? Kohhran upa kohtîr sela, annin Lalpa hminga hriak hnawihin a tân ṭawngṭai rawh se;

¹⁵ring tlata ṭawngṭaina chuan damlo chu a tidam ang a, Lalpan a kaitho vang; thil a lo tihsual tawh pawh ngaihdam a ni ang.

¹⁶Chutichuan, in sualte thupha chawi tawn ula, inṭawngṭaisak rawh u; tichuan, tihdamin in awm dâwn nia. Ṭhahnemngai taka mi dik ṭawngṭaina chuan thil ropui tak a thawk thei a ni.

¹⁷Elija chu keimahni anga mihring ve mai bawk a ni a, ruah sûr loh nân ṭhahnemngai takin a ṭawngṭai a, kum thum leh thla ruk chhûng lei chungah ruah a sûr ta lo va.

¹⁸A ṭawngṭai leh a, vân ata ruah a lo sûr a, lei aṭangin thlaite a lo thar leh ta a.

¹⁹Ka unaute u, in zînga tu emaw thutak aṭangin pêng bo sela,

²⁰mi sual, a kawng bona ata hruai kîr lehtu chuan thihna ata a thlarau a chhandam ang a, sual tam tak a khuh bosak bawk ang tih hre rawh u.