Read Mizo Lushai LEHKHATHAWN PAKHATNA PETERA 1 Bible Online

LEHKHATHAWN PAKHATNA PETERA 1 - Mizo Lushai bible

LEHKHATHAWN PAKHATNA PETERA 1

¹Petera, Isua Krista tirhkoh chuan, Pathian mi thlan, Ponto ram te, Galatia ram te, Kapadokia ram te, Asia ram te leh Bithunia rama awm darh tate chibai ka bûk e.

²Pa Pathian hriat lâwk anga thlan, Isua Krista thu awih tûr leh a thisena tlen fai tûra Thlarau Tihthianghlim in in ni a, in chungah khawngaihna leh remna tihpunin awm rawh se.

³Kan Lalpa Isua Krista Pathian leh Pa chu fakin awm rawh se. Isua Krista chu mitthi zîng ata kai thovin, beiseina nung nei tûrin a zahngaihna ropui tak chuan min tinung leh ta a.

⁴Ro chhe thei lo, hmêlhem lo leh chuai thei lo luah tûr kan ni ta, chu ro chu in tân vânah dah ṭhat diam a ni.

⁵Amah in rin avângin chhandamna buatsaih sa, hun hnuhnûnga tihlan a nih thlengin Pathian thiltihtheihna chuan a vawng ang che u.

⁶Fiahna tinrêng in tawha, in mangan pawhin hlim takin awm rawh u.

⁷In rinna fiahna tûr a ni, rangkachak chhe thei mah meia fiah a ni a, a aia hlu zâwk, in rinna chu, fiah tûr a ni asin; tichuan, Isua Krista a lo inlâr hunah fakna te, ropuina te, chawimawina te in hlawh ang.

⁸Amah hmu lo pawhin in hmangaih a, tûnah hian ani chu hmu rih lo mah ula in ring a, hlimna nasa tak, sawi hleih theih lohvin in khah hi;

⁹in rinna rah, in thlarau chhandamna chu, in hmuh mêk avângin.

¹⁰He chhandamna chungchâng hi zâwlneiten ngun taka zawngin an chhui a, in chunga Pathian thilpêk, khawngaihna lo thleng tûr chu an lo sawi lâwk a ni.

¹¹Anmahnia Krista thlarau awm chuan, Krista tuarna leh a hnua chawimawia a awm tûr thu a hriat lâwktîr a, eng hunah nge a lo thlen anga, engtia lo thleng tûr nge tih hriat an tum ṭhin a ni.

¹²Anmahni tân ni lo, nangmahni tân rawng an bâwl a ni tih hriattîr an ni a. Vân aṭanga tirh, Thlarau Thianghlim ṭanpuia in hnêna Chanchin Ṭha hriltute khân chu chu an hrilh tâk che u kha. Chûng thil chu vântirhkohte pawhin bih an châk a ni.

¹³Chuvângin, rilru inpeih diamin inring reng ula, Isua Krista a lo lan huna khawngaihna a rawn kensak tûr che u chu beisei tlat rawh u.

¹⁴Fa thuawihte angin awm ula, tûn hma, in hriat loh laia in châknate ang khân awm suh u.

¹⁵A kotu che u a thianghlim angin nangni pawh in chêt dân zawng zawngah lo thianghlim zâwk rawh u.

¹⁶“Kei ka thianghlim si a, nangni pawh in thianghlim tûr a ni,” Lehkha Thu-in a ti si a.

¹⁷Hleih nei lova mi tin an thiltih ang zêla ngaihtuahsaktu chu Pa-ah in neih chuan, he leia in châm chhûng hian amah ṭih takin khawsa rawh u.

¹⁸In thlahtute aṭanga in dawn chhâwn, nun dân âtthlâk tak ata chu, thil chhe thei tangka leh rangkachaka tlan in ni lo va,

¹⁹Berâmno hmêlhem lo leh bawlhhlawh kai lo, Krista thisen hlua tlan in ni zâwk tih in hre si a.

²⁰Ani chu leilung pian hmaa ruat lâwk a ni a, tûn hun hnuhnûngah hian in tân a lo lang ta a ni.

²¹Mitthi zîng ata kaithotu leh ropuina petu Pathian chu amah avângin in ring ta a; tichuan, Pathian chu in rinna leh beiseina innghahna ber a lo ni ta.

²²Thutak in zawm avângin in rilru in tithianghlim a, unaute tihtakzetin in hmangaih ta a, thinlung takin inhmangaih tawn rawh u.

²³Chi chhe thei lakah ni lovin, chi chhe thei lo Pathian chatuan thu nung laka piangthar in nih kha.

²⁴‘Mi zawng zawng hnim hring ang an ni, an ropuinate pawh hnim pâr ang a ni; Hnim chu a vuai a, a pâr chu a tla a,

²⁵Lalpa thu erawh chu chatuanin a awm reng,” tih a ni. Chu ngei chu a ni Chanchin Ṭha an hrilh che u kha.