Read Mizo Lushai LEHKHATHAWN PAKHATNA PETERA 2 Bible Online

LEHKHATHAWN PAKHATNA PETERA 2 - Mizo Lushai bible

LEHKHATHAWN PAKHATNA PETERA 2

¹Chutichuan, sual chi tinrêng bânsan rawh u, inbum te, vervêk te, îtsîk te, insawichhiat zawng zawng te bânsan ula;

²nausên piang hlim angin thlarau lam hnutetui eng mah pawlh loh chu châk rawh u, chutiang ring chuan in ṭhang lian thei ang a, chhandam in ni dâwn nia.

³“Lalpa ṭhatna chu tem teh rêng u,” tih ziak ang khân.

⁴Amah chu pan rawh u. Ani chu lung nung, mihringte hnâwl, Pathian thlan, hlu tak chu a ni.

⁵Tichuan, nangni pawh lung nung ang ni vein thlarau lam in atân rem khâwm ni ve rawh u. Chutah chuan Isua Krista zâra Pathian pawm tlâk, thlarau lam inthawina hlântu, puithiam thianghlim in lo ni ang.

⁶Lehkha Thu-in, “En teh, lung hlu tak ka thlan, A kil lungphûm chu Zion-ah ka dah ta, Amah ring chu tu mah an mualpho lo vang,” a ti si a.

⁷Nangni ringtute tân chuan lung hlu tak a ni, ring lote tân erawh chuan, “In satute lung duh loh, a kil lung pawimawh ber.

⁸Mite inchhuih tlûkna lung, Insut tlûkna lungpui chu,” a ni ve thung. Thu chu an awih loh avângin an tlu a, chutianga awm tûr rênga ruat an ni.

⁹Nangni zawng hnam thlan, Lalpa puithiam, hnam thianghlim, Pathian ta bîk, ama êng mak taka lût tûra thim ata ko chhuaktu che u thiltih ropui puang tûr in ni.

¹⁰Pathian mi in la ni ngai lo va, Tûnah zawng in nih tâk hi: Khawngaih in la hlawh ngai lo va, Tûnah zawng in hlawh tâk hi.

¹¹Duh takte u, khual zin, mi rama awm in nih avângin, thlarau do ṭhîn tisa châknate lakah chuan inthiarfihlîm tûrin ka ngên a che u.

¹²Jentail-te zîngah mawi takin khawsa ula, thil sual tia an puh che u pawhin in thil tih ṭhatte anmahni ngeiin an hmu ang a, Pathianin a tlawh hunah che u amah an chawimawi thei ang.

¹³Lalpa avângin mihring dâna thuneitute hnênah intulût rawh u; thuneitu sâng ber, lalber thu chu awih ula,

¹⁴thil sual titute hrema, thil ṭha titute chawimawi tûra a ruat ramawptute thu pawh awih rawh u.

¹⁵Eng mah hre lote thu sawi âtthlâk chu thil ṭha tiha tidang tûrin Pathianin a duh a che u.

¹⁶Zalêna awm tûrin, in zalênna chu sual thup nâna hmang lova, Pathian bawihte anga awm zâwk tûrin a duh che u a ni.

¹⁷Mi zawng zawng zah ula, unaute hmangaih ula, Pathian ṭih ula, lalber chu chawimawi rawh u.

¹⁸Nangni chhiahhlawhte u, in pute thu awih ula, a ṭha leh a ngilneite chauh ni lovin, a ṭha lote pawh zah rawh u:

¹⁹Miin Pathian duh zâwng nia a hriat tlat avânga a tuar kher loh tûr hrehawm a tuar chuan Pathian lâwmzâwng a ni.

²⁰In sual avânga in tuarin, chhel takin tuar mah ula in tân hmingṭhatna eng nge awm? Thil ṭha in tih pawha kut in tuar erawh chuan Pathian lâwmzâwng a ni.

²¹Hetianga awm tûr hian koh in ni, Krista pawh khân in tân a tuar a, a hniakhnung in zui theih nân entawn tûr a hnutchhiah che u kha.

²²Ani chuan thil sual eng mah a ti lo va, a kâah bumna thu a chhuak hek lo.

²³Hau a nih pawhin a hau lêt lo va, a tuar laiin a vau lêt hek lo, dik taka rorêl ṭhîntu hnênah chuan a inkawltîr zâwk a ni.

²⁴Sual thihsana felna neia kan nun theih nân, amah ngeiin thingah khân a taksain kan sualte a phur a; a hliamte chuan tihdam in ni ta.

²⁵Berâm angin kawng in bo tawh a, tûnah zawng in thlarau Vêngtu leh Hotu hnênah chuan in lo kîr leh tâk hi.