Read Mizo Lushai LEHKHATHAWN PAKHATNA PETERA 3 Bible Online

LEHKHATHAWN PAKHATNA PETERA 3 - Mizo Lushai bible

LEHKHATHAWN PAKHATNA PETERA 3

¹Chutiang bawkin nangni nute u, in pasalte thu awih rawh u; chutichuan, an zîngah Pathian thu awih lo an awm pawhin, thu hrilh kher ngai lovin in chêt dân chuan a hneh mai ang,

²anmahni ngeiin ṭih tak chunga in chêt dân thianghlim chu an hmu dâwn si a.

³Pâwn lam incheina - sam chei lêrh te, rangkachak ṭhi awrh te, silhfên ṭha inbeltea inchei mawi tum lovin,

⁴thinlung aṭanga mize dik, rilru thuhnuairawlh leh nunnêm, inthuamna chhe thei lo chuan inchei zâwk rawh u, chu chu Pathian mit hmuhin a hlu êm êm a ni.

⁵Chutiang chuan hmasâng hmeichhe thianghlim, Pathiana beiseina nghatte kha, an pasalte thu awihnain an inchei ṭhîn a ni.

⁶Sari chuan Abrahama thu a awih a, “Ka Lalpa,” tia a ko ang khân; thil ṭha in tih chuan Sari fate in ni ang; hlauh tûr rêng in nei lo ve.

⁷Nangni pate u, chutiang bawkin nupa in nihnaah in nupuite dimdawi rawh u, chak lo zâwk an nih avâng leh Pathian khawngaihna thilpêk, nunna chu, chanpuitu che u an nih hriain zah thiam rawh u. Tichuan, in ṭawngṭaina dâltu eng mah a awm dâwn lo nia.

⁸A tâwp berah chuan, in za-in rilru hmun khat pu ula, inlainatin unau angin inhmangaih tawn ula, inkhawngaih tawnin thuhnuairawlh takin awm rawh u;

⁹sual sualin thungrûl suh ula, ânchhia pawh ânchhiaa thungrûl lovin, malsâwm hlauh zâwk rawh u; malsâwmna dawng tûrin asin Pathianin a koh che u.

¹⁰Lehkha Thu-in, “Dam thlahlela, hlim ni hmêl hmuh duh chuan Sual lakah a lei vêng ṭha sela, A hmui pawh bumna thu sawi lo tûrin vêng rawh se.

¹¹Sual hawisanin thil ṭha ti rawh se, Remna zawngin ûm zêl rawh se.

¹²Lalpa mit chu mi felte chungah a fu a, An ṭawngṭaiin a beng a lo dawh ṭhîn. Thil ṭha lo titute chungah erawh chuan Lalpa hmêl chu a dur ṭhîn,” a ti a.

¹³Thil ṭha tih lama ṭhahnem in ngaih chuan tu nge in chungah thil ṭha lo ti ang?

¹⁴Thil dik in tih avânga in tuar chuan vânneihthlâkah ngai rawh u. Tu mah hlau suh ula, mangang hek suh u.

¹⁵Krista chu zah ula, in thinlungah lalah neih rawh u. In beisei zâwt apiang che u chhâng tûrin inpeih sa reng rawh u.

¹⁶Nimahsela, thuhnuairawlh leh hawihhâwm takin, chhia leh ṭha hriatna thiang tak neiin ti ang che u; tichuan, Kristaa in awm dân ṭha sawi hnâwmtute chu tihzahin an awm dâwn nia.

¹⁷Pathian remtiha tuar in nih rau rau chuan, thil sual tih avânga tuar ai chuan thil ṭha tih avânga tuar chu a ṭha zâwk.

¹⁸Krista pawh kan sualte avângin vawi khat a thi a, Pathian hnêna hruai theihna tûr che uin, mi dik chu mi dik lote tân a thi a ni. Tisaah tihhlum a ni a, thlarauvah erawh chuan tihnunin a awm.

¹⁹Ani chuan tân ina awm thlaraute hnênah thu a zuk hril a.

²⁰Chûngte chu Nova lawng tuk chhûnga Pathianin dawhthei taka a nghah laia, awih duh lote thlarau kha an ni. Lawngah chuan, mi tlêm tê, pariat lek, tuia chhandam an ni.

²¹Chumi anpui baptisma hian, Isua Krista thawhlehna avângin tûnah a chhandam ta che u a ni; baptisma chu taksaa bawlhhlawh silfaina mai a ni lo, chhia leh ṭha hriatna thiang taka Pathian hnêna thu tiamna hi a ni zâwk.

²²Isua Krista chu vânah kalin Pathian ding lamah a awm a, vântirhkohte thuneihna te, thiltihtheihna te a thuhnuaiah an awm ta.