Read Mizo Lushai LEHKHATHAWN PAKHATNA PETERA 4 Bible Online

LEHKHATHAWN PAKHATNA PETERA 4 - Mizo Lushai bible

LEHKHATHAWN PAKHATNA PETERA 4

¹Kristan taksaa a tuar avângin nangni pawh chutiang rilru chu pu ve rawh u; tisaa tuar tawh chuan sual a bânsan ṭhîn;

²tisaa a dam chhûng chu mihring châknate ûm tawh lova Pathian duhzâwnga a awm tawh zâwk theih nân.

³Jentail-te duhzâwng tih nân, tûn hma hun in hman zozai kha a tâwk ta e; hurnaah te, taksa châknaah te, uain hehnaah te, zu hmun hlimnaah te, zu in honaah te, milem biakna tenawm takah te in inhman ṭhin kha.

⁴Tûnah an nawmsak bâwl anga in bâwl ve tâk loh avâng hian mak an ti a, an sawichhe ta che u a ni.

⁵Mi nung leh mitthite ngaihtuah tûra inpeih sa hnênah chuan an chanchin anmahniin an la sawi ang.

⁶Hemi avâng hian mitthite hnênah pawh Chanchin Ṭha hril a ni, mi dangte ang bawka an chungthu rêl a niha, Pathian hmaa thlarauva an nun theih nân.

⁷Thil zawng zawng tâwp hun chu a hnai ta a, in ṭawngṭai theih nân rilru fîm tak puin invawng fel rawh u.

⁸Thil dang zawng aiin thinlung taka inhmangaih tawn uar rawh u, hmangaihnain sual tam tak a khuh si a.

⁹Phunnawi lovin inmikhual tawn rawh u.

¹⁰Pathian khawngaihna thilpêk tam tak enkawltu ṭhate angin Thlarau lam thilpêk in dawn apiang chu rawng inbâwlsak tawn nân hmang rawh u.

¹¹Tu pawhin thu an sawi chuan Pathian thu ngei sawi rawh se, rawngbâwltu pawhin Pathianin chakna a pêk angin bâwl rawh se; chutichuan, Isua Krista avângin Pathian chu engkimah chawimawiin a awm thei ang, ropuina leh thiltihtheihna chatuanin a ta a ni si a. Amen.

¹²Duh takte u, fiahna na tak in zînga lo thleng hi thil mak tak lo thleng taah ngai suh u.

¹³Krista tuarna ṭâwmpuitute in nih avângin lâwm zâwk ula, ropui taka a lo lan hun chuan hlim leh lâwmin in la khat dâwn a ni.

¹⁴Krista hminga hau in nih chuan in nihlawh e, thlarau ropui tak, Pathian thlarau chu, nangmahniah a chêng tihna a ni.

¹⁵In zîngah tu mahin tual thah avâng emaw, rûkrûk avâng emaw, thil sual tih avâng emaw, mi tibuaitu nih avângin emaw tuar suh se.

¹⁶Kristian in nih avânga tuar in nih chuan in zak tûr a ni lo, Krista hming in put avângin Pathian chawimawi zâwk rawh u.

¹⁷Rorêlna chu ṭan a hun ta a, Pathian chhûngte aṭangin ṭan a ni ang. Keimahniah ṭan a nih si chuan, Pathian Chanchin Ṭha thu awih lote chu engtin tak awm ang maw!

¹⁸Lehkha Thu-in, “Mi dikte mah chhandam hrâm an nih chuan, sakhaw ngaihsak lo mi sualte chu, engtin tak awm ang maw,” a tih ang khân.

¹⁹Chutichuan, Pathian remtih anga tuarte chuan thil ṭha ti zêlin an thlarau chu Siamtu rinawm tak hnênah kawltîr rawh se.