Read Mizo Lushai LEHKHATHAWN PAKHATNA PETERA 5 Bible Online

LEHKHATHAWN PAKHATNA PETERA 5 - Mizo Lushai bible

LEHKHATHAWN PAKHATNA PETERA 5

¹In zînga kohhran upate chu, kei upa ve bawk, Krista tuarnate hmutu leh ropuina lo lang tûr chan ve beiseitu hian ka fuih e.

²In zînga Pathian berâmte chu enkawl ṭha rawh u, tihluih ngai lovin Pathian duh anga châk taka tiin, hlêp beisei vâng ni lovin, rawngbâwl duhna rilru puin enkawl rawh u.

³In hote chungah intilal suh ula, pâwlhote entawn tlâk ni zâwk rawh u.

⁴Tichuan, Berâm vêngtu Lalber a lo lan hunah chawimawina lukhum ropui chul thei lo chu in dawng ang.

⁵Chutiang bawkin nangni ṭhalaite u, upate thu awih rawh u. In za-in thuhnuairawlhnaa inthuamin rawng inbâwlsak rawh u. “Pathianin chapote a dodâl a, inngaitlâwmte erawh chu a khawngaih ṭhîn,” tih a ni si a.

⁶Chuvângin, a hun takah chawimawia in awm theih nân Pathian kut chak tak hnuaiah inphahhniam ula,

⁷in manganna zawng zawng ama chungah nghat vek rawh u; a ngaihtuah êm êm che u a ni.

⁸Ngaihven ula, fîmkhur rawh u; in hmêlma Diabola chu, sakeibaknei rûm ṭhîn angin ei tûr zawngin a phî ruai ṭhîn.

⁹Rinnaah hian ding nghet tlat ula, amah chu do rawh u. Khawvêl hmun danga in unaute pawhin chutiang bawk chu an tuar tih in hre si a.

¹⁰Rei lo tê in tuar hnuin, Kristaa a chatuan ropuina chang tûra kotu che u, khawngaihnaa khat Pathian chuan a rawn tungding ang che u a, siam ṭhaa tichakin a tinghet ang che u.

¹¹Ama hnênah chuan thiltihtheihna kumkhuain awm rawh se. Amen.

¹²Unaupa, mi rinawm a ni tih ka hriat Silvana kutah hian he lehkha tawi tê hi ka rawn thawn che u a ni. Hei hi Pathian khawngaihna chu a ni tih hriattîr tûr che u leh chutah chuan ding nghet tlat tûra ka fuihna che u a ni.

¹³Babulon kohhran, nangmahni ang bawka thlan hian chibai an bûk a che u; ka fapa Marka pawhin a bûk a che u.

¹⁴Krista hmangaihnaa kut invuanin chibai inbûk rawh u. Nangni Kristaa awm zawng zawngte hnênah remna awm rawh se.