Read Mizo Lushai LEHKHATHAWN PAHNIHNA PETERA 2 Bible Online

LEHKHATHAWN PAHNIHNA PETERA 2 - Mizo Lushai bible

LEHKHATHAWN PAHNIHNA PETERA 2

¹Kan mite zîngah zâwlnei der an awm ṭhîn ang khân nangni zîngah pawh zirtîrtu dik lo an lo awm dâwn; mi tichhe thei zirtîrna dik lo an rawn pu lût ru ang a; an Lalber, anmahni tlantu chu phatsanin mahni chhiatna rang takin an thlentîr ang.

²An awm dân tenawm tak chu miten an chîng ve ang a, anmahni avâng chuan thutak kawng hi sawichhiat a ni ang.

³Sum an hmuh theih nân duhâm takin an thu phuah chawp chuan sumdâwnna atân an hmang ang che u; nimahsela, an chunga rorêl tawh sa chu a awm mai mai lo vang, chhiatna chuan muhîl lovin a châng reng a ni.

⁴Vântirhkohten thil sual an tih lai khân Pathianin a zuah lo, hremhmunah a paih a, Rorêl Ni nghâk tûrin khuarkhurum thimah chuan an awm ta a ni.

⁵Hmânlai khawvêl pawh a zuah lo, khawvêl sual tak chunga tui a lêttîr pawh khân, Nova - felna thupuangtu leh mi dang serh leh sâng nei pasarih chauh a nih kha a chhan chhuah ni.

⁶Sodom leh Gomora khua pawh vaivutah a chantîr a, serh leh sâng nei lote a hrem dân tûr entîr nân a tichhe vek a nih kha.

⁷Lota, mi sualte awm dân pawiti êm êm ṭhîntu erawh chu a chhan chhuak a,

⁸chu mi ṭha tak chu an zînga khawsa ve ṭhîn a ni a, an thil sual tih a hmuh leh a hriatte chuan a thin a tina êm êm ṭhîn.

⁹Lalpa chuan amah ṭihtute chu tuarna laka chhan chhuah dân leh rorêl Ni a lo thlen hma pawha mi sual hrem dân a hria.

¹⁰An taksa châkna bawlhhlawh anga awmte leh Pathian thuneihna hmusittute lek phei chu hrem dân a hre lehzual. Hêng zirtîrtu dik lote hi an ât huai a, an chapo va, vân mi ropuite pawh khi sawichhiat an hlau lo.

¹¹Anni aia chak leh thiltithei zâwk vântirhkohte pawhin, Lalpa hmaa hêng mi ropuite chungchâng hi an sawiin ṭawng chhia an hmang ngai lo.

¹²Mahse, hêngho hi ngaihtuahna nei lo, ramsa, mana tihhlum mai tûra lo piangte ang hi an ni, an hriatthiam loh apiang an sawichhia a, ramsa te anga tihhlum an ni dâwn.

¹³An sual man chu an tuar ang. Nilêng lênga nuamtâwl chîng mi an ni a, mi tenawm leh mi bawlhhlawh, in zînga inzep an ni a, in ruai ṭhehnaa an lo tel hian an bum che u a ni.

¹⁴An mitin uire tûr an melh reng a, sual tih an kham thei lo. Mi rilru nghet lote an bum a, duhâm dân an thiam hle, ânchhe dawng an ni.

¹⁵Kawng dik chu an pênsan a, an bo ta. Bosora fapa Balaama kawng an zawh ta. Ani chuan thil sual tih hlâwk berin a ring a;

¹⁶mahse, a bawhchhiatnaah chuan zilhhauvin a awm ta a, sabengtung ṭawng thei lo chu mihring angin a lo ṭawng a, zâwlneipa âtna chu tihtâwpsak a ni ta.

¹⁷Hêng mite hi tuikhur hna kang chat leh chhûm, thlipui len vêl mai mai ang chauh hi an ni, thim chhah mup chu an awm nân ruat a ni.

¹⁸Thu âtthlâk pâwr tak takin an sawi a, an khawvêl nun dân dik lo bânsan hlimte chu tisa châkna hmangin an bum a.

¹⁹Zalênna pêk an tiam a; mahse, anmahni pawh chu an thil chîn ṭha lo bawih an ni reng si a; tu pawh mai hi anmahni hnehtu bawih an ni ṭhîn.

²⁰Kan Lalpa leh min chhandamtu Isua Krista hriatna avânga khawvêl sual kalsantute chu suala an inhnamhnawiha an tlûk leh chuan, a tîra an awm dân ai khân an awm dân hnuhnûng chu a chhe zâwk ṭhîn.

²¹An hnêna thupêk thianghlim hre tawh zeta hawisan leh site chuan felna kawng hi lo hre lo law law se an tân a ṭha zâwk tûr.

²²An awm dân aṭang hian hêng thufing dikzia hi a lang chiang hle: “Ui chuan a luak a ei leh a,” tih leh “Vawkpui bual fai chu chirhdiakah a inbual leh a,” tihte hi.