Read Mizo Lushai LEHKHATHAWN PAKHATNA JOHANA 2 Bible Online

LEHKHATHAWN PAKHATNA JOHANA 2 - Mizo Lushai bible

LEHKHATHAWN PAKHATNA JOHANA 2

¹Fate u, thil sual in tih loh nân hêng thu hi in hnênah ka ziak a nih hi. Amaherawhchu, tu pawh lo sual ta sela, Pa hnêna min sawipuitu mi fel, Isua Krista chu kan nei.

²Ani chu kan sual ngaihdamna a ni, keimahni sual chauh ni lovin, khawvêla mi zawng zawng sual ngaihdamna pawh a ni.

³A thupêkte kan zawm chuan amah kan hria a ni tih kan chiang a,

⁴“Amah chu ka hria,” tia a thupêkte zâwm si lo chu mi dawthei a ni a, amahah thutak a awm lo.

⁵Tu pawhin a thu a zawm chuan Pathian chu a hmangaih takzet a ni. Amahah kan awm ngei tih hriat chianna tûr chu hei hi a ni:

⁶“Amahah ka awm reng, titu chu Krista nun angin a nung ve tûr a ni,” tih hi.

⁷Duh takte u, in hnênah thupêk thar ka han ziak a ni lo ve, thupêk hlui, a tîr ata in neih kha ka ziak a ni zâwk e. Thupêk hlui chu thu, in hriat tawh sa kha a ni.

⁸In hnêna thupêk ka ziak hi a thar a nihna a awm bawk, amahah leh nangmahniah a dikzia a lang; thim chu a kiang mêk a, êng tak tak a lo ên tâk avâng hian.

⁹Ênga awm intia, a unau haw si chu tûn thlengin thimah a la awm reng a ni.

¹⁰Mahni unau hmangaihtu chu êngah a awm reng a, a tân tlûk a hlauhawm lo.

¹¹Mahni unau hawtu erawh chu thimah a awm a, thimah a vâk vêl a, thimin a mit a tihdel tawh avângin a kalna pawh a hre ṭhîn lo va ni.

¹²Fate u, ama hming avânga in sualte ngaihdam a nih tâk avângin in hnênah ka ziak a nih hi.

¹³Pate u, a tîr ata awm renga chu in hriat tâk avângin in hnênah ka ziak a nih hi. Tlangvâlte u, mi sual chu in ngam tâk avângin in hnênah ka ziak a nih hi.

¹⁴Naute u, Pa chu in hriat tâk avângin in hnênah ka ziak a ni. Pate u, a tîr ata awm renga chu in hriat tâk avângin in hnênah ka ziak a ni. Tlangvâlte u, in chak a, Pathian thu nangmahniah a awm avânga mi sual in ngam tâk avângin in hnênah ka ziak a ni.

¹⁵Khawvêl hi hmangaih suh ula, khawvêla thil awmte pawh hmangaih hek suh u. Tu pawhin khawvêl hi a hmangaih chuan, Pa chu a hmangaih lo va ni;

¹⁶khawvêla thil awm zawng zawng - tisa châkna te, mit châkna te, mahni sum uanpuina te hi Pa hnên aṭanga chhuak a ni lo va, khawvêl aṭanga chhuak a ni zâwk e.

¹⁷Khawvêl hi a châknate chawpin a boral mêk a ni. Pathian duh zâwng titu erawh chu kum khuain a awm reng ang.

¹⁸Naute u, hun hnuhnûng a lo ni ta a, Krista dodâltu a lo kal dâwn tih in hriat ang khân, tûnah hian Krista dodâltu tam tak an lo chhuak ta; chuvâng chuan, hun hnuhnûng chu a ni tih kan hria.

¹⁹Anni chu kan zîng ata an chhuak a, kan mi leh sa tak tak an ni lo rêng a, ni se kan zîngah an awm reng tûr. Mahse, an za-in kan mi leh sa an ni vek lo tih a lan chian nân an chhuak ta a ni.

²⁰Nangni zawng, Mi Thianghlima chuan hriak a thih che u a, engkim in hria a ni.

²¹Thutak chu in hriat loh avânga in hnêna ziak ka ni lo; in hriat avâng leh thutak aṭanga dâwt a chhuah ngai loh avânga ziak ka ni zâwk.

²²Isua chu Krista a ni tih pawm lotu aliama dawthei tu nge awm? Pa leh Fapa pawm lotu chu Krista dodâltu chu a ni.

²³Tu pawh Fapa pawm lo chuan Pa pawh a pawm lo va ni: Fapa pawmtu erawh chuan Pa pawh a pawm a ni.

²⁴Nangni zawngin a tîr ata in hriat kha nangmahniah awmtîr reng rawh u. A tîr ata in hriat kha nangmahniah a awm reng chuan, nangni pawh Paah leh Fapaah chuan in awm reng dâwn a ni.

²⁵Hei hi a ni, a thutiam, amah ngeiin kan hnêna a tiam chu - chutuan nunna hi.

²⁶Nangmahni hruai bo tumtute chungchâng thu hi in hnênah ka ziak a ni.

²⁷Nangni thu-ah zawng, a hriak thih che u kha nangmahniah a awm reng a, tu ma zirtîr in ngai lo ve, a hriak thihna che u chuan thil tinrêng a zirtîr zâwk che u a, chu chu a dik a, dâwt a ni lo. Tichuan, a zirtîr che u ang khân amahah awm reng rawh u.

²⁸Tûnah hian, fate u, a rawn inlâr huna huai taka kan awma, a lo kal hunah zak lova kan awm theih nân amahah awm reng rawh u.

²⁹Amah chu mi dik tak a ni tih in hriat chuan, dik taka titu apiang chu a fate an ni tih hre rawh u.