Read Mizo Lushai LEHKHATHAWN PAKHATNA JOHANA 3 Bible Online

LEHKHATHAWN PAKHATNA JOHANA 3 - Mizo Lushai bible

LEHKHATHAWN PAKHATNA JOHANA 3

¹Ngai teh u, Pain min lo va hmangaih nasa êm; Pathian fa-ahte min vuah tâk hi! Chutiang chu kan ni rêng e. Hemi avâng hian khawvêlin min hre lo va ni, amah chu an hriat loh avângin.

²Duh takte u, tûnah hian Pathian fate kan ni tawh reng a, engtin nge kan la awm dâwn tih erawh chu a lang rih lo va. Amah a lo lan hun chuan amah ang kan la ni ang tih zawng kan hria, a nih ang takin amah chu kan la hmu dâwn si a.

³Kristaa chutiang beiseina nei apiang chuan amah a thianghlim angin a intithianghlim ṭhîn.

⁴Tu pawh thil sual ti chuan dân a bawhchhia a ni, sual chu dân bawhchhiatna a ni si a.

⁵Ani chu sualte la bo tûrin a lo lang a, amahah chuan sual a awm lo tih in hria e.

⁶Tu pawh amaha awm reng chuan thil sual a ti lo; tu pawh thil sual ti chuan amah a hmu lo va, hriat pawh a hre hek lo.

⁷Fate u, tu man bum che u suh se; ani chu mi dik tak a ni ang khân thil dik titu chu mi dik a ni.

⁸Thil sual titu chu Diabola aṭanga chhuak a ni; a tîr aṭang rêngin Diabola chuan thil sual a ti si a. Pathian Fapa lo lan chhan chu, Diabola hnathawhte tiboral tûr hian a ni.

⁹Tu pawh Pathian hrin chuan, Pathian chi chu amahah a awm reng avângin thil sual a ti lo; Pathian hrin a nih avângin sual pawh a sual thei lo.

¹⁰Pathian fate leh Diabola fate lan chianna chu hei hi a ni: Tu pawh thil dik ti lo leh a unau hmangaih lo chu Pathiana chhuak a ni lo.

¹¹A tîr ata thuchah in hriat kha hei hi a ni, kan inhmangaih tawn ṭheuh tûr a ni, tih hi.

¹²Mi sual laka chhuak, Kaina, a unau thattu ang kha kan ni tûr a ni lo. Eng vângin nge a thah le? Ama thiltihte a sual a, a nau thiltihte a dik avângin.

¹³Unaute u, khawvêlin a huat che u pawhin mak ti suh u.

¹⁴Keini chuan unaute kan hmangaih avângin thihna ata kan chhuak a, nunnaah kan lût tawh tih kan hria: hmangaihna nei lo chu thihnaah a la awm reng a ni.

¹⁵Tu pawh a unau hua chu tual that a ni, tu pawh tual that chuan chatuan nun a nei dâwn lo tih in hria e.

¹⁶Anin kan tân a nun a pêkah hian hmangaihna chu kan hre ta. Keini pawhin unaute tân kan nun kan pe ve tûr a ni.

¹⁷Tu-in emaw khawvêl hausakna neiin a unau tlachham hmu sela, amah chu lainat si lo sela. Pathian hmangaihna chu engtin nge amahah a awm theih ang?

¹⁸Fate u, ṭawngka leh thu chauhvin i hmangaih suh ang u, thiltih leh tihtakzetin ni zâwk rawh se.

¹⁹Tichuan, thutakah kan awm tih kan inhria ang a, a hmaah pawh tlângnêl takin kan awm thei ang.

²⁰Kan thinlung mahin thiam loh min chantîr chuan, Pathian chu kan thinlung aiin a ropui zâwk a, engkim a hre vek a ni tih kan hre si a.

²¹Duh takte u, kan rilruin thiam loh min chantîr loh chuan Pathian kan nêl ngam ṭhîn,

²²a thupêk kan zawma a lâwmzâwng kan tih avângin, a hnêna kan dîl apiang kan hmu zêl ṭhîn si a.

²³A thupêk chu hei hi a ni: A Fapa Isua Krista hming kan rina, thu min pêk anga kan inhmangaih tawn hi.

²⁴Pathian thupêk zâwmtu chu Pathianah a awm reng a, Pathian pawh amahah a awm reng a ni. Tin, hei hi Pathian keimahniah a awm reng tih kan hriatna a ni: Thlarau min pêk hi.