Read Mizo Lushai LEHKHATHAWN PAKHATNA JOHANA 4 Bible Online

LEHKHATHAWN PAKHATNA JOHANA 4 - Mizo Lushai bible

LEHKHATHAWN PAKHATNA JOHANA 4

¹Duh takte u, thlarau nazawng ring zêl suh u, thlarau chu Pathian aṭanga lo chhuak a ni nge ni lo fiah ṭhîn zâwk rawh u; zâwlnei der tam tak khawvêlah an lo chhuah tâk avângin.

²Hei hi Pathian Thlarau in hriat theihna tûr chu a ni: Isua Krista chu tisain a lo kal tih ṭantu apiangin Thlarau a dawn chu Pathiana chhuak a ni.

³Isua ṭan lote thlarau dawn chu Pathian aṭanga chhuak a ni lo thung: chu chu Krista dodâltu, a lo kal dâwn tih in hriat lâwk kha a ni, tûnah pawh khawvêlah a awm tawh reng a ni.

⁴Fate u, nangni chu Pathian aṭanga chhuak in ni a, nangmahnia awma chu khawvêla awma ai chuan a ropui zâwk avângin zâwlnei derte chu in ngam tawh e.

⁵Anni chu khawvêla mi an ni a; chuvângin, khawvêla mi angin thu an sawi a, khawvêlin an thu an ngaithla ṭhîn a ni.

⁶Keini zawng Pathian aṭanga chhuak kan ni a; Pathian hretute chuan kan thu pawh an ngaithla ṭhîn; Pathian aṭanga chhuak lo chuan kan thu pawh an ngaithla lo; chûng aṭang chuan thlarau dik tak leh thlarau dik lo kan hre thei a ni.

⁷Duh takte u, i inhmangaih tawn teh ang u; hmangaihna chu Pathian aṭanga lo chhuak a ni si a; tu pawh hmangaihna nei chu Pathian hrin an ni a, Pathian an hre bawk a ni.

⁸Hmangaihna nei lo erawh chuan Pathian an hre lo, Pathian chu hmangaihna a ni si a.

⁹Pathian hmangaihna chu hetiang hian kan zîngah a lo lang, a zâra nun kan neih theihna tûrin Pathianin a Fapa neih chhun khawvêla a rawn tirhah hian.

¹⁰Hei ngei hi a ni hmangaihna chu: Keinin Pathian kan hmangaih ni lovin, Aman min hmangaih a, kan sual thupha chawi nân a Fapa a rawn tîr ta zâwk hi.

¹¹Duh takte u, Pathianin chuti taka min hmangaih si chuan, keini pawh kan inhmangaih tawn ṭheuh tûr a ni.

¹²Tu man Pathian an hmu ngai lo na a, kan inhmangaih tawn chuan Pathian keimahniah a awm reng a, a hmangaihna pawh keimahniah tihfamkimin a awm a ni.

¹³A Thlarau min pêk hi, Amahah kan awma, Ani pawh keimahniah a awm tih kan hriatna chu a ni.

¹⁴Pain Fapa chu khawvêl Chhandamtu atân a rawn tîr tih kan hmu tawh a, mi dang pawh kan hriattîr a ni.

¹⁵Tu pawh Isua chu Pathian Fapa a ni tih ṭantu chu amahah Pathian a awm reng a, ani pawh chu Pathianah a awm reng a ni.

¹⁶Pathianin min hmangaihna chu keimahni ngeiin kan hria a, kan ring ta a ni. Pathian chu hmangaihna a ni a, chu hmangaihnaa awm reng chu Pathianah a awm reng a, Pathian pawh amahah a awm reng a ni.

¹⁷Rorêl ni-a hlau hlek lova kan awm theih nân keimahniah hmangaihna chu tihfamkim a ni ta; he khawvêlah pawh hian amah ang takin kan awm tâk hi.

¹⁸Hmangaihnaah hian hlauhna rêng a awm lo va, hmangaihna famkim chuan hlauhna zawng zawng a hnawt bo zâwk ṭhîn. Hlauhnaah hian hremna a tel a, hlauva awm chu hmangaihnaah a la famkim lo va ni.

¹⁹Aman min hmangaih hmasak avângin keini pawhin kan hmangaih a ni.

²⁰Miin “Pathian ka hmangaih,” tiin a unau haw si se, mi dawthei a ni; a unau a hmuh renga mah a hmangaih si loh chuan, Pathian a hmuh ngai loh chu a hmangaih thei lo vang.

²¹He thupêk hi a hnên aṭangin kan hmu a ni: Pathian hmangaihtu chuan a unau pawh a hmangaih tûr a ni, tih hi.