Read Mizo Lushai LEHKHATHAWN PAKHATNA JOHANA 5 Bible Online

LEHKHATHAWN PAKHATNA JOHANA 5 - Mizo Lushai bible

LEHKHATHAWN PAKHATNA JOHANA 5

¹Isua hi Krista chu a ni tih ring apiang chu Pathian hrin a ni, a hringtu hmangaihtu chuan a hrina pawh a hmangaih ṭhîn a ni.

²Pathian fate kan hmangaih a ni tih kan hriatna chu, Pathian kan hmangaih a, a thupêkte kan zawm hi a ni.

³Pathian kan hmangaih vena chu hei hi a ni: a thupêkte kan zawm hi; a thupêkte chu a khirh si lo va.

⁴Pathian hrin tawh phawt chuan khawvêl hi a ngam ṭhîn: hei hi a ni, khawvêl hneha ngamna chu, kan rinna hi.

⁵Isua hi Pathian Fapa a ni tih ringtu chauh lo chuan tu nge khawvêl ngam ṭhîn le?

⁶Isua Krista hi a ni, tui leh thisena lo kala chu, tuiah chauh ni lovin, tuiah leh thlarauvah a ni zâwk e; thlarau chu hriatpuitu a ni. Thlarau chu thutak a ni si a.

⁷Hriatpuitu pathum an awm,

⁸Thlarau leh tui leh thisen chu, chûng pathumte chu an inthurual a ni.

⁹Mihring hriatpuina mah kan pawm chuan Pathian hriatpuina chu a ropui zâwk si a; Pathian hriatpuina chu, A Fapa chanchin a hriattîr tâkna hi a ni.

¹⁰Pathian Fapa ringtu chuan amahah he hriatna hi a nei a ni: Pathian ring lotu erawh chuan Pathian chu dawtheiah a chantîr a ni, Pathianin Fapa chanchin a hriattîr chu a rin loh avângin.

¹¹Hei hi a thu hriattîr chu a ni - Pathian chuan chatuan nun min pe a, chu nun chu Fapaah hian a awm a ni.

¹²Fapa nei apiang chuan nunna chu an nei, Fapa nei lo erawh chuan nunna chu an nei lo.

¹³Chatuan nun in nei tih in hriat theih nân nangni Pathian Fapa hming ringtute hnênah hêng thu hi ka ziak a ni.

¹⁴A duh zâwng anga eng pawh kan dîl chuan min ngaihthlâksak ṭhîn, chu chu amah kan nêl chhan chu a ni.

¹⁵Kan dîl apiangin min ngaithla ṭhîn tih kan hriat avângin, kan dîl ang chu min pe ṭhîn tih pawh kan hria.

¹⁶Tu pawhin a unau, thihna khawp ni lo sual tiin hmu sela, a dîlsak ang a, Pathianin nunna a pe ang. Hei hi thihna khawp sual ti lote tân a ni. Thihna khawp sual a awm a, chutiang tân dîlsak tûr ka ti lo.

¹⁷Thil dik lo tih zawng zawng hi sual a ni vek a; amaherawhchu, sual apiang hi thihna khawp sual a ni vek lo.

¹⁸Tu pawh Pathian hrin chuan thil a tisual lo tih kan hria; Pathian Hrina khân a vawng him a, mi sual chuan a khawih thei lo va ni.

¹⁹Khawvêl pum hi Misualpa thuhnuaiah awm mah se, Pathian aṭanga chhuak kan ni tih kan hria.

²⁰Pathian Fapa chu a lo kal a, Pathian tak chu hre thei tûrin hriat theihna min rawn pe tih kan hre bawk; tichuan, Pathian takah chuan kan awm a ni - a Fapa Isua Kristaah chuan. Hei hi a ni Pathian dik tak chu, hei hi a ni chatuan nunna chu.

²¹Fate u, milem lakah invêng ṭha rawh u.