Read Mizo Lushai RORELTUTE 1 Bible Online

RORELTUTE 1 - Mizo Lushai bible

RORELTUTE 1

¹Josua thih hnu chuan Israel-te chuan LALPA an râwn a, “Kanan-ho bei tûrin kan zîngah tu hnam nge thawk chhuak hmasa ber ang?” an ti a.

² LALPA chuan, “Juda thlahte thawk chhuak hmasa ber rawh se; ram hi an kutah ka pe a ni,” a ti a.

³Juda thlahte chuan, an unau Simeona thlahte hnênah, “Kan chanpuala ruat ramah hian lo kal ula, Kanan mite hi i beih rawn ang u; keini pawh, chutiang bawkin in ram chanpualah kan lo kal ve ang,” an ti a.

⁴Simeon-ho chu an thawk ve ta a. LALPA chuan Kanan mite leh Periz mite chu a hnehtîr a, Bezek-ah mi sîngkhat an hneh a.

⁵Chutah chuan Adoni-bezeka a lo awm a, an bei a;

⁶a tlân chhuak a, an ûmzui a, an man a, a kutzungpui leh a kezungpui an tansak a.

⁷Adoni-bezeka chuan, “Lal sawmsarih kutzungpui leh kezungpui ka tansak a, chûng chuan ka buhmal tla an chhar ṭhîn. An chunga ka tih angin Pathianin ka chungah a ti ve ta a nih hi,” a ti a. Jerusalem-ah an hruai a, chutah chuan a thi ta a.

⁸Juda thlahte chuan Jerusalem an bei a, an la a, mi an that a, khua chu an hâl a.

⁹Chumi zawhah Juda thlahte chu tlângram te, tlâng bulṭhut te leh Negeb hmuna awm Kanan-ho chu bei tûrin an thawk chhuak a.

¹⁰Hebron khua, Kiriat-arba tih ṭhin chu an bei a, Sesai-ho te, Ahiman-ho te leh Talmai-ho te chu an hneh a.

¹¹Chuta ṭang chuan Juda thlahte chu Debir bei tûrin an kal a; tûn hma chuan chu khua chu Kiriat-sefer tih a ni ṭhîn.

¹²Kaleba chuan, “Kiriat-sefer beia, han la thei chu, ka fanu Aksaii nupuiah ka pe ang,” a ti a.

¹³Kaleba nau Kenaza fapa Othniela chuan a la a; a fanu chu nupuiah a pe ta a.

¹⁴An inneih ni chuan a pa hnêna ram dîl tûrin Othniela chuan a lo nawr a. A sabengtung chung aṭang chuan a lo chhuk a, Kaleba chuan, “Eng nge i duh ang?” a ti a.

¹⁵Ani chuan, “Mal min sâwmsak teh; chhim lam ram rovah min awmtîr a, tuihna awmna min pe tel rawh,” a ti a. Kaleba chuan chuanchung leh chuanhnuai tuihna awmna chu a pe ta a.

¹⁶Mosia puzawn thlah, Ken-hote chu Juda thlahte nên Tûmzâwl khua an tih Jeriko aṭang chuan Arad khaw chhim lam Judai ram thlalêrah an kal a, chûnga awmte zîngah chuan an awm ve ta a.

¹⁷Juda thlahte chu Simeon-ho nên an thawk chhuak a, Zefat khuaa awm Kanan mite chu an bei a; khua chu an tichhe vek a, a hmingah Horma an vuah a.

¹⁸Gaza te, Askelon te, Ekron te leh an chhehvêl khuate chu Juda thlahte chuan an la a.

¹⁹LALPA chuan Juda thlahte chu a awmpui a, a tlângrama awmte chu an hnawt chhuak a; phaia awmte erawh chuan thîr tawlailîr an nei a; Juda thlahte chuan an hnawt chhuak thei lo.

²⁰Mosia thu angin Hebron chu Kaleba an pe a; ani chuan Anaka fa pathumte chu a hnawt chhuak a.

²¹Benjamina thlahte chuan Jerusalem a awm Jebus mite chu an luhchhuak lo; Jebus mite chu Benjamina thlahte nên Jerusalem-ah tûn thlengin an la awm.

²²Josefa thlahte pawh LALPA chuan a awmpui a, Bethel bei tûrin an thawk a.

²³Tûn hma chuan Bethel chu Luz tih a ni. Khaw en thlithlai tûr an kal a.

²⁴Mi pakhat hi khua aṭangin a lo chhuak a, enthlatute chuan, “Khawpui luh rûkna min hrilh la, eng mah kan tih lo vang che,” an ti a.

²⁵Khawpui luhna chu a kawhhmuh a, khua chu an la a, khandaihin mi an that ṭeuh va; chu mi erawh chu a chhûngte nên an zuah a.

²⁶Ani chu Hit ramah a pêm a, khua a siam a, a hmingah Luz a vuah a; tûn thlengin chu chu hmingah a la pu a ni.

²⁷Manasea thlahte chuan Beth-sean khuaa awm te, Taanak khuaa awm te, Dor khuaa awm te, Ibleam khuaa awmte leh Megido khuaa awm te, Kanan-ho chu, an chhehvêl khuaa awmte nên an hnawt chhuak lo. Kanan mite chu an la awm ve ta reng a ni.

²⁸Israel mite an lo chak deuh hnu erawh chuan chhiah khuaah an siam a, an hnawt chhuak lo.

²⁹Efraim-ho chuan Gezer khuaa Kanan mi awmte chu an hnawt chhuak lo. Kanan mite chu an zîngah Gezer khuaah chuan an awm ve ta zêl a ni.

³⁰Zebulun-ho chuan Kitron leh Nahalal khuaa awmte an hnawt chhuak lo. Kanan-ho chu an zîngah an la awm ta zêl a; mahse, chhiahhlawhah an siam.

³¹Aser-ho chuan Ako khuaa awm te, Sidon khuaa awm te, Ahlab khuaa awm te, Akzib khuaa awm te, Helba khuaa awm te, Afek khuaa awm te, Rehob khuaa awmte an hnawt chhuak lo.

³²Aser-ho chu Kanan-ho zîngah an awm ve mai a, an hnawt chhuak lo a ni.

³³Beth-semes khuaa awm te, Beth-anat khuaa awmte chu Naftali-ho chuan an hnawt chhuak lo; chûng laia Kanan-ho awmte nên an awm ho va; Beth-semes leh Beth-anata awmte erawh chu chhiah khuaah an siam a.

³⁴Amor-ho chuan Dana thlahte chu tlângramah an hnawt tawm a, an awmnaa an luh an phal lo a ni.

³⁵Harhares-ah te, Aijalon-ah te, Saalabin khuaah te chuan Amor-ho an ṭang tlat a; mahse, Josefa thlahte chu an chak zâwk deuh va, chhiah khuaah an siam ta a.

³⁶Sela hmâr lamah Amor-ho ramri chu Akrabim kalkhân a kal tlang a ni.