Read Mizo Lushai RORELTUTE 10 Bible Online

RORELTUTE 10 - Mizo Lushai bible

RORELTUTE 10

¹Abimeleka a thih hnu chuan Isakara thlah zînga mi Pua fapa Tola, Dodoa tupa, Efraim tlângram Samir khuaa awm chu Israel-te chhan chhuak tûrin a lo thawk a.

²Kum sawmhnih leh pathum chhûng Israel-te chu a ho va, a thi a, Samir khuaah chuan an phûm a.

³Tola thih hnuah Gilead mi Jaira a lo awm leh a.

⁴Israel-te chu kum sawmhnih leh pahnih a ho va. Fapa sawmthum a nei a, chûngte chuan chuanna tûr sabengtung an nei ṭheuh va.

⁵Gilead ramah chuan khawpui sawmthum an nei a, chung khaw hming chu ‘Jair khua’ tih a ni vek a. Jaira chu a thi a, a awmna Kamon-ah an phûm a.

⁶Israel mite chuan LALPA ngaihmawhzâwng thil sual an ti leh a; Baal te, Astarte te, Aram-ho pathian te, Zidon-ho pathian te, Moab-ho pathian te, Amon-ho pathian te, Filistia-ho pathian te an be ve a. LALPA chu an hawisan a, a rawng an bâwl duh lo va.

⁷LALPA chu Israel chungah a thinur hle a, Filistia-ho leh Amon-ho kutah a pe a.

⁸Amon-ho chuan kum sâwm leh pariat chhûng chu Jordan chhak lama Amor-ho ram Gilead-a Israel awmte chu an tiduhdah a, an tirethei êm êm a.

⁹Amon-ho chuan Jordan lui kânin Juda thlah te, Benjamin-ho te leh Efraim-ho te chu an bei a, an timangang êm êm ṭhîn a.

¹⁰Israel-ho chuan LALPA an au va, “Kan Pathian kan hawisan a, Baal rawng kan bâwl a, a chungah thil sual kan ti a ni,” an ti a.

¹¹LALPA chuan Israel-te hnênah, “Aigupta mi te, Amon mi te, Amor mi te, Filistia mi te,

¹²Zidon mi te, Amalek mi te leh Maon mi te chuan an tiduhdah che u a, min au va, ka chhan chhuak che u a nih kha.

¹³Chuti chung pawhin min hawisan a, pathian dang rawng min bâwlsan a; chuvângin, ka chhan chhuak tawh lo vang che u.

¹⁴In duh zâwk pathian dangte hnênah chuan kal rawh u; chhan chhuak tûr che uin ngên ta che u, in mangang hi rawn chhan che u rawh se,” a ti a.

¹⁵Israel-te chuan LALPA hnênah, “Kan sual a ni: âwm i tih ang angin min ching mai rawh; hêngho lakah hian min chhan chhuak phawt mai teh,” an ti a.

¹⁶Pathian dang lim an kawlte chu an paih a, LALPA chu chibai an bûk ta zâwk a; Israel-te retheihzia a hmuh chuan a lainat hle a.

¹⁷Amon-ho chu an pung khâwm a, Gilead-ah bûk an khuar a, Israel-te pawh an pung khâwm a, Gilead biala Mizpa khuaah bûk an khuar ve bawk a.

¹⁸Israel mite leh Gilead-a an hruaitute chuan, “Amon-ho bei tûrin tu nge hma hruai ang? Hma hruaitu chu Gilead ram hotu a ni ang” an ti a.