Read Mizo Lushai RORELTUTE 11 Bible Online

RORELTUTE 11 - Mizo Lushai bible

RORELTUTE 11

¹Gilead mi, Jeftha chu pa huai tak a ni a; a nu chu nawhchizuar a ni. Gileada fa a ni.

²Gileada nupui chuan fapa a hring ṭeuh va, chûngte chu an lo puitlin chuan Jeftha chu an hnawt chhuak a, ‘Kan pa ro chang ve tûr i ni lo, nu dang fa i nih hi,” an ti a.

³Jeftha chu a unaute khua aṭang chuan a tlân chhuak a, Tob ramah a awm ta a. Jeftha chu mi ho tak takten an zui a.

⁴Amon-hovin Israel-te an rawn bei a,

⁵Gilead hruaitute chu Tob khuaa awm Jeftha chu hruai tûrin an kal a.

⁶“Ti rawh, min ho la, Amon-hote kan han bei dâwn nia,” an ti a.

⁷Jeftha chuan Gilead upate chu a chhâng a, “Min huat avângin in pa in ata min hnawt chhuak a, in mangan veleh engtizia nge min rawn pan leh si le?” a ti a.

⁸Gilead upate chuan Jeftha chu an chhâng a, “Chuvâng chuan alâwm, Amon-ho beihnaa min ho tûra kan duh che, Gilead mite hi i ho dâwn nia,” an ti a.

⁹Jeftha chuan, “Amon-ho bei tûra min hruai kîra, LALPAN min hnehtîr chuan in hotu-ah ka ṭang ang,” a ti a.

¹⁰Gilead upate chuan, “I duh ang chuan kan ti ang, LALPA chu kan thuhretu a ni,” an ti a.

¹¹Tichuan, Jeftha chuan Gilead upate chu a zui a, mite chuan an hotu-ah leh hruaituah an siam ta a, Jeftha chuan a thil phût chu Mizpa khuaah chuan LALPA hmaah a puang a.

¹²Jeftha chuan Amon lal hnênah palai a tîr a, “Kan ram bei tûrin engtizia nge i rawn inrawlh le,” a ti a.

¹³Amon lal chuan palaite hnênah “Aigupta ram ata Israel-te an lo chhuah khân ka ram min chhuhsak ṭeuh va, chuvâng alâwm. Arnon lui leh Jabok lui inkâr, Jordan ruam chu min lâksak a, hênga khuate hi sawi tam lovin min pe kîr tûr a ni,” a ti a.

¹⁴Jeftha chuan palaite chu Amon lal hnênah a tîr kîr leh a,

¹⁵“Moab leh Amon ram Israel-ten an chhuhsak hlei nêm.

¹⁶Aigupta ram aṭanga Israel-te an lo chhuah khân thlalêra kal tlangin Tuipui Senah an kal a, Kades an thleng a.

¹⁷Edom lal hnênah, ‘I ramah kan lo kal tlang ang e,’ tia an dîl khân a lo phal lo va. Chutiang bawkin Moab lal pawh an dîl a, a phal lo va; Israel-te chu Kades-ah chuan an châm ta reng a.

¹⁸Edom kal tlang lovin thlalêrah a kual zawngin an kal a, Moab ram pawh an hêl a, Moab khawchhak lamah an kual a; Moab ram lût lovin an ramri lui Arnon phai, an ram lo lamah, bûk an khuar a.

¹⁹Israel-te chuan Amor mi, Hesbon lal Sihona hnênah pawh, ‘Kan rama kal tûrin i ramah kan lo kal tlang ang e,’ tia an dîl chu,

²⁰Sihona chuan a phal lo va, a mite a ko khâwm a, Jahaz-ah bûk a khuar a, Israel-te chu a bei ta a.

²¹Israel-te Pathian LALPA chuan Sihona leh a mite chu Israel-te kutah a pe a, an that a; chu lai rama Amor mite awmna chu an nei ta vêk a.

²²Tichuan, Amor-ho ram, Arnon lui leh Jabok lui inkâr, thlalêr leh Jordan lui inkâr ram chu an nei ta a ni.

²³LALPA, Israel-te Pathianin Amor mite a pêk chu nangin neihsak i tum em ni?

²⁴I pathian Khemosa ram pêk che chu nei mai la, kan Pathian LALPA min pêk chin ram chu keinin kan nei ang.

²⁵Moab lal Zipora fapa Balaka ai khân chakin i inhria em ni?

²⁶Kum zathum zet chu Israel-te hian Hesbon khawpui leh Aroer khawpui hi, an chhehvêl khuate nên, Arnon lui kam khawpui zawng zawng nên hian an lo luah tawh a, chumi chhûng zawng chuan chhuhsak rêng i tum ngai si lo.

²⁷Chuvângin, keinin tihsual kan nei hlei nem, nangin mi rawn bei mai hi i ti dik lo zâwk a ni. LALPA, Rorêltu chuan, Israel mite leh Amon mite inkâr thu hi rel fel mai teh se,” a ti a.

²⁸Amon lal chuan Jeftha thu chu a ngaithla duh chuang lo.

²⁹ LALPA thlarau chu Jeftha chungah a lo thleng a, Gilead leh Manasea ram chu a fang a, Gilead bial Mizpa khuaah chuan a lo kîr leh a. Amon-ho ramah chuan a kal ta a.

³⁰Jeftha chu LALPA hmaah a inṭawng tiam a, “Amon mite hi mi hnehtîr phawt chuan,

³¹in aṭanga râl ram kan haw min hmuak tûra lo chhuak hmasa ber chu tu pawh ni se, LALPA tâna serh hran tlat a ni ang a, hâlral thilhlanah ka hmang ang,” a ti a.

³²Jeftha chu Amon mite ramah chuan a kal ta a; a va bei a, LALPA chuan a hnehtîr ta a.

³³Aroer khua aṭanga Minit bial khaw sawmhnih, Abel-Keramim thlengin a la kîr a, a that ṭeuh va. Israel mite hmaah chuan Amon-ho chu an tlâwm ta a.

³⁴Jeftha chu Mizpa khuaa a inah a lo haw a. Ngai teh, amah hmuak tûrin a fanu chu benchhek nên a lo lâm chhuak a. Ani chu a fa neihchhun a ni; mipa emaw, hmeichhia emaw fa dang rêng a nei lo.

³⁵A fanu a han hmuh chuan a puan a pawtthlêr a, “A va pawi em! Ka fanu, nang ber kher chu! Ka lung i tichhiain min va timangang tak êm! LALPA hnênah ṭawng ka lo thlah tawh a, sût leh rual a ni si lo,” a ti a.

³⁶Ani chuan, “Ka pa, LALPA hmaa ṭawng i thlah tawh si chuan i thu ang chuan ti rawh; LALPA chuan i hmêlma Amon-ho chungah phuba a la tawh alâwm,” a ti a.

³⁷A pa hnênah chuan, “Heti hian i ti ang; thla hnih chhûng chu min thlah fâl la, ka ṭhiante nên tlângah te kan kal ang a, nulât laia ka thi mai tûr hi ka sûn ang e,” a ti a.

³⁸A kaltîr a, thla hnih chhûng chu a thang botîr a. A ṭhiante nên chuan tlângah an kal a, fa nei lova a thi tûr chu an sûn a.

³⁹Thla hnih hnu chuan a pa hnênah a lo haw a, LALPA hnêna a thutiam chu a hlen ta a; nula thianghlimin a thi ta a.

⁴⁰Israel-te zîngah, Israel nulate chuan, kum tin Gilead mi Jeftha fanu sûn tûrin ni li an thang bo ṭhîn, dânah an neih ta a.