Read Mizo Lushai RORELTUTE 12 Bible Online

RORELTUTE 12 - Mizo Lushai bible

RORELTUTE 12

¹Efraim-ho chu an inpun khâwm a, Jordan ral Zafon-ah an kai phei a. Jeftha hnênah, “Amon mite bei tûrin ramri i pêl a, engtizia nge tel ve tûra min sâwm loh? I in kan hâlsak ang che,” an ti a.

²Jeftha chuan, “Amon mite leh kan mite hi kan inhal hle a ni. Min ṭanpui tûrin ka sâwm che u a, min rawn chhan duh lo a nih kha.

³Mi pui dâwn lo tih ka hriatin thih dâwn lovin ramri ka kân ta a; kan va bei a, LALPA chuan min hnehtîr ta a ni. Chuvângin, min bei tûrin engtizia nge in lo thawh mai le?” a ti a.

⁴Jeftha chuan Gilead mite chu a ko khâwm a, Efraim-ho chu a bei a, a hneh ta a. Efraim-ho chuan, “Nangni Gilead-ho hi Efraim leh Manasea ram aṭanga dawihzepho tlân khâwm in ni’ an ti ṭhîn.

⁵Gilead-ho chuan Jordan dai kai theihna lai apiang an luah a, Efraim mi, tlânchhia tawh phawtin dai kai rawn dîl apiangte chu Gilead-ho chuan, “Efraim mi i ni em?” an lo ti zêl a. “Ni lo ve,” a tih chuan,

⁶“Shibolet han ti teh,” an ti a; a lam fiah theih lohva, ‘Sibolet’ a tih chuan an man a, Jordan lui kaiah chuan an that mai ṭhîn. Chumi nia Efraim mi thi zawng zawng chu sîngli leh sânghnih an ni.

⁷Jeftha chuan Israel-te chu kum ruk a ho va, a thi a, Gilead-a a awmna khuaah an phûm a.

⁸Jeftha hnuah Bethlehem khaw mi Ibzana chuan Israel-te chu a ho va.

⁹Fapa sawmthum leh fanu sawmthum a nei a. A fanu sawmthumte chu a chipui ni lo khaw dang mi pasal a neihtîr a; a fapa sawmthumte pawh a chipui ni lo nupuiah a neihsak a. Ibzana chuan Israel-te chu kum riat a ho va.

¹⁰A thi a, Bethlehem-ah an phûm a.

¹¹Ibzana hnu chuan Zebulun mi Elona chuan Israel-te chu kum sâwm a ho va,

¹²A thi a, Zebulun ram Aijalon khuaah an phûm a.

¹³Elona hnu chuan Pirathon khaw mi Hilela fapa Abdona chuan Israel-te chu a ho va.

¹⁴Fapa sawmli leh tupa sawmthum a nei a, an chuanna ṭheuh tûr sabengtung sawmsarih a nei a. Abdona chuan Israel-te chu kum riat a ho va.

¹⁵A thi a, Efraim ram, Amalek-ho awmna tlângram Pirathon khuaah an phûm ta a.