Read Mizo Lushai RORELTUTE 13 Bible Online

RORELTUTE 13 - Mizo Lushai bible

RORELTUTE 13

¹Israel mite chuan LALPA ngaihmawhzâwng thil sual an ti leh a, kum sawmli chhûng chu Filistia hnuaiah LALPA chuan a awmtîr a.

²Zora khuaah Dana thlah, mi pakhat, Manoa a awm a; a nupui chu a ching a, fa rêng an nei lo.

³Hmeichhe hnênah chuan LALPA vântirhkoh a inlâr a, “Ngai teh, fa nei thei lovin i ching na a, nau i pai ang a, fapa i hring ang.

⁴Chuvângin, fîmkhur la, uain emaw, zu emaw in suh la, sa thiang lo pawh ei hauh suh ang che.

⁵I nau pai, fapa i hrin tûr chu, a lu ziah kawlh bawk loh tûr a ni. Pathian tân a pian aṭangin Nazarit mi a ni ang. Ani chuan Filistia mite lakah Israel-te chhan chhuah hna a thawk ṭan ang,” a ti a.

⁶Hmeichhia chu a kal a, a pasal hnênah, “Pathian mi ka hnênah a lo kal a, LALPA vântirhkoh hmêl pu a ni, a hlauhawm khawp mai. Khawi lam mi nge a nih ka zâwt lo va, a hming pawh min hrilh hek lo,

⁷‘Ngai teh, nau i pai ang a, fapa i hring dawn, uain emaw, zu emaw in hauh suh, sa thiang lo pawh ei rêng rêng suh, i nau hrin chu a pian aṭanga a thih thlengin Pathian tân Nazarit mi a ni ang,’ tiin min hrilh a ni,” a ti a.

⁸Manoa chuan LALPA hnênah, “Aw LALPA, Pathian, mi i rawn tirh kha lo kal leh sela, nau lo piang tûr chu engtin nge kan enkawl ang, min zirtîr teh se,” a ti a.

⁹Pathian chuan Manoa dilna chu a ngaithla a, lova a ṭhut laiin hmeichhe hnênah Pathian vântirhkoh chu a rawn inlâr leh a, a pasal Manoa chu a awm ve lo.

¹⁰Hmanhmawh takin hmeichhia chu a pasal hnênah a tlân a, “Hmân ni-a lo kal ka sawi kha a lo kal leh ta e,” a va ti a.

¹¹Manoa chu a tho va, a nupui chu a zui a, mi chu an va hmu a, “Hmeichhe hnêna thusawitu kha i ni em?” a ti a. “Ni e” a lo ti a.

¹²Manoa chuan, “I thu anga thil a lo thlen hunah nau chu engtia enkawl tûr nge ni anga, eng angin nge a khawsak ang?” a ti a.

¹³ LALPA vântirhkoh chuan, “Hmeichhe hnêna ka hrilh ang khân awm sela,

¹⁴grep kûng aṭangin thil eng mah a ei tûr a ni lo, uain emaw, zu emaw in hek suh se. Ka hrilh zawng zawng kha zâwm sela, thil thiang lo pawh ei suh se,” a ti a.

¹⁵Manoa chuan LALPA vântirhkoh hnênah, “Kan han chelh lawk teh ang che, kêltê kan han talh ang e,” a ti a.

¹⁶ LALPA vântirhkoh chuan, “Min chelh mah ula in chaw chu ka ei lo vang, hâlral thilhlan i hlân dâwn a nih chuan LALPA tân hlân ang che,” a ti a.

¹⁷Manoa chuan LALPA vântirhkoh hnênah, “I thu anga thil a lo thlen hunah kan chawimawi theih nân che i hming min hrilh teh,” a ti a.

¹⁸ LALPA vântirhkoh chuan, “Engah nge ka hming mi zawh, sawi mi a ni hlei nêm,” a ti a.

¹⁹Tichuan, Manoa chuan kêltê chu a talh a, buhbâl thilhlan nên hâlral thilhlanah lungpui chungah chuan LALPA tân a hlân ta a. Thil mak tak lo awm ta chu Manoa te nupa chuan an en reng a.

²⁰Lungpui maichâm aṭanga mei khu vân lama a han chhoh chuan LALPA vântirhkoh chu meiah chuan vânah a chho ta a.

²¹Manoa te nupa chuan chu mi chu LALPA vântirhkoh a ni tih an hre ta a; hmai lei siin an kûn ta a. Vântirhkoh chu an hmu leh tawh lo.

²²Manoa hnênah emaw, a nupui hnênah emaw LALPA vântirhkoh chu a inlâr leh tawh lo. Manoa chuan LALPA vântirhkoh ngei a ni tih a hre ta a.

²³Manoa chuan a nupui hnênah, “Pathian kan hmu a, kan thi ngei dâwn a nih hi,” a ti a. A nupui erawh chuan, “LALPA chuan min tihlum duh ni se kan hâlral thilhlan leh buhbâl thilhlan kha a pawm lo vang a, hêng thil hi min hrilh lo vang,” a ti a.

²⁴Hmeichhia chuan fapa a hring a, a hmingah Samsona a sa a; nau chu a lo ṭhang lian a, LALPA chuan mal a sâwm a,

²⁵LALPA thlarau chuan Zora leh Estaol inkâr Mahane-dan-ah Samsona chu a rawn pâwl ṭan ta a.