Read Mizo Lushai RORELTUTE 14 Bible Online

RORELTUTE 14 - Mizo Lushai bible

RORELTUTE 14

¹Samsona chu Timna khuaah a zu chhuk a, Timna khuaa Filistia nula pakhat chu a zu hmu a:

²A haw chho va, a nu leh a pa hnênah, “Timna khuaah Filistia nula pakhat ka hmu a, nupuiah min neihsak rawh u,” a ti a.

³A nu leh a pa chuan, “Kan chipuite zîngah emaw, kan mite zîngah emaw nupui tûr an awm lo em ni? Engtizia nge serh tan loh Filistia-ho fa nupuia neih i duh tâk?” an ti a.

⁴Samsona chuan, “Min neihsak mai teh u, hmêlṭha ka tihzâwng tak a ni,” a ti a.

⁵Filistia mite chunga chêtna tûr remchâng zawngin LALPA chuan Samsona chu a hmang a ni tih a nu leh pa chuan an hre lo. Chutih lai chuan Filistia-ho chu Israel-te chunga rorêltu an ni.

⁶A nu leh pa hruaiin Samsona chu Timna khuaah chuan a zu chhuk a. Timna-ho grep huan an thleng a, sakeibaknei tuai hian a lo rûm khum a.

⁷LALPA thlarau chuan a rawn man thut a, eng mah ken a nei lo na a, kêltê ang lekin a lo pawt sawm vêk a, a nu leh pa pawh a hrilh lo.

⁸Khuaah chuan a kal a, nula chuan a tilâwm hle a. Hun eng emawti hnuah chuan hruai tumin a chhuk leh a, sakeibaknei ruang kha en tûrin a pêng zawk a, khuai an lo awm mur mur a, a zu pawh a tam hle a.

⁹Khuai chu a la a, kal pahin a ei zêl a, a nu leh pa pawh a pe a, an ei a; sakeibaknei ruang aṭanga a lâk a ni tih a hrilh lo.

¹⁰A pa chu nula inah chuan a zu lêng a; tlangvâlho tih ṭhin dân angin Samsona chuan ruai a ṭheh a.

¹¹Filistia-ho chuan a ṭhianah tlangvâl sawmthum an ruatsak a.

¹²Samsona chuan an hnênah, “Thu khirh ka han hrilh ang che u, ruai ṭheh chhûng ni sariha a awmzia in hriat chuan puan zai sîn sawmthum, inthlâkna tûr nên, ka pe ang che u.

¹³In hriat loh erawh chuan puan zai sîn sawmthum leh inthlâkna tûr sawmthum min pe a ni ang chu,” a ti a. “I thu khirh chu han sawi la, kan lo ngaithla ang chu,” an ti a.

¹⁴An hnênah chuan, “Eitu aṭangin ei tûr a lo awm a, Chak tak aṭangin thil thlum a lo chhuak,’ tih hi,” a ti a. Ni thum an ngaihtuah pawhin a awmzia an hre thei lo va.

¹⁵A ni sarih ni chuan Samsona nupui hnênah an kal a, “I pasal chu a thu khirh hrilh tûr chein ngên rawh; chutilo chu, nang leh i chhûngte hi kan hâl hlum ang che u. Min tikawnkâw tûrin em ni ṭhianah min sâwm?” an ti a.

¹⁶Samsona nupui chu a hmaah a ṭap a, “Min lo hmangaih tawp lo va, min haw zâwk a nih hi; kan mi, tlangvâlte thu khirh i zâwt a, a awmzia pawh min hrilh duh si lo,” a ti a. A hnênah chuan, “Ka nu leh pa pawh ka hrilh lo va, nang ka hrilh ang che maw?” a ti a.

¹⁷Ruai an ṭheh chhûng ni sarih chhûng chu a ṭap a ṭap a; a ngen tlut tlut avâng chuan a ni sarih ni chuan a hrilh ta nge nge a. A nupui chuan a mite chu a hrilh ta a.

¹⁸Chu khaw tlangvâlte chu a ni sarih ni, ni tlâk hmain a hnênah an lo kal a, “Khawizu aia thlum eng nge awm? Sakeibaknei aia chak zâwk eng nge ni?” an ti a. Samsona chuan, “Ka bâwngla hi lei rîtah chhawr lo ula chu Ka thu khirh in hre hauh lo vang,” a ti a.

¹⁹ LALPA thlarau chuan a rawn man thut a. Askelon-ah a chhuk a, mi sawmthum a zu that a, an thawmhnaw chu a lâksak a; a thu khirh hretute kha inthlâkna puante chu a pe a. A thinur hle a, a pa inah a haw chho va.

²⁰Samsona nupui chu a ṭhian pakhat kha an lo neihtîr ta mai a.