Read Mizo Lushai RORELTUTE 15 Bible Online

RORELTUTE 15 - Mizo Lushai bible

RORELTUTE 15

¹Nakin deuhah chuan huit seng hun laiin Samsona chuan kêltê kengin a nupui chu a zu tlawh dâwn a, “Ka nupui pindanah ka va lût ang e,” a ti a; mahse, a puzawn chuan a phal lo va,

²“I duh ta hauh lo a nih hi kan ti a, i ṭhian pakhat kha kan lo neihtîr ta asin. A nau hi a hmêl a ṭha zâwk a, khawngaih takin a aiah nei mai rawh,” a ti a.

³Samsona chuan, “Tûn ṭum chu Filistia mite pawi khawih mah ila, dem theih ka ni lo vang,” a ti a.

⁴Samsona chu a chhuak a, sihal zathum a man a, pahnih zêl mei a ṭawn zawm a, a ṭawn zawmnaah chuan meichher a dah a.

⁵Meichher chu a chhi a, Filistia-ho lova huit hmunah chuan sihalte chu a chhuah a. Huit phal leh a ding lai chu a kâng ta duai duai a, oliv hmunte pawh a kâng tel a.

⁶Filistia mite chuan, “Tu tih nge?” an ti a. “Timna khaw mi mâkpa Samsona tih alâwm. A nupui a lâksak a, a ṭhianpa a pe vei a nih kha,” an ti a. Filistia-ho chu an lo kal a, chu hmeichhia leh a pa chu an hâl hlum ta a.

⁷Samsona chuan, “Hetianga in tih chuan in chungah ka ṭuan zet ang a, ka ti tawh lo vang,” a ti a.

⁸Tichuan, an chungah a che ta chiam a, a that ṭeuh va, Etam khâm pûkah a chhuk a, a awm ta reng a.

⁹Filistia mite chu an chho va, Judai ramah bûk an khuar a, Lehi hmunah an inzâr darh a.

¹⁰Judai ram mite chuan, “Engtizia nge min bei tûra in lo chhoh mai le?” an ti a. Anni chuan, “Samsona phuara, min sawisak anga sawisa ve tûrin kan lo thawk a ni,” an ti a.

¹¹Judai ram mi sângthum Etam khâm pûkah chuan an chhuk a, Samsona hnênah, “Filistia-ho hi kan chunga thuneitute an ni tih i hre na nge? Kan chunga i thiltih hi engtizia nge ni ta ngai?” an ti a. “Min tih angin an chungah ka han ti ve a nih kha,” a lo ti a.

¹²“Filistia mite pêk atân kan rawn phuar dâwn che a ni,” an ti a. Samsona chuan, “Nangmahniin ka chunga kut thlâk loh tiam phawt rawh u,” a ti a.

¹³A hnênah chuan, “Ni e, kan phuar ang che a, an kutah kan pe ang che, kan that tawp lo vang che,” an ti a. Hruizên thar pahnihin an phuar a, pûk ata chu an rawn hruai chho va.

¹⁴Lehi an lo thlen chuan Filistia-ho chuan an lo hmuak a, an au dur dur a; LALPA thlarau chuan a rawn man thut a, an phuarna hrui chu la zai kâng ang maiin a chat hmek hmek a.

¹⁵Sabengtung khaberuh tharlâm tak hi a hmu a, a la a, mi sângkhat zet a vaw hlum a.

¹⁶Samsona chuan, “Sabengtung khaberuh maiin ka talh vûm thûr a, A sâng têl ka vaw hlum, Sabengtung khaberuh rovin,” a ti a.

¹⁷Chutia a sawi zawh chuan sabengtung khaberuh chu a paih a, chu hmun chu Ramat-lehi an vuah a.

¹⁸A tui a hâl êm êm a, LALPA chu a au va, “I chhiahhlawh hi ropui takin min hnehtîr a, tuihâlin ka thi mai dâwn alâwm, serh tan lohhovin min rawn that mai ang e,” a ti a.

¹⁹Lehi hmuna khuar awm chu LALPA chuan a tikhi a, tui a lo chhuak a; a han in chuan a chau chu a reh a, a harh ta huai a. Chu tuikhur chu En-hakore an vuah a, Lehi-ah chuan tûn thlengin a la awm.

²⁰Filistia-ho vânglaiin Samsona chuan Israel mite chu kum sawmhnih a ho va.