Read Mizo Lushai RORELTUTE 16 Bible Online

RORELTUTE 16 - Mizo Lushai bible

RORELTUTE 16

¹Samsona chu Gaza khuaah a kal a, nawhchizuar a hmu a, a mutpui a.

²Gaza khaw hotute chuan Samsona a lo kal tih an hriat chuan an hual a, “Khawvâr hunah aw kan thah ang,” an ti a; ngawi ṭhapin kulh kawngka bulah an châng a.

³Samsona chu zanlai thleng chauhvin a awm a; zânlaiah chuan a tho va, khawpui kulh kawngka chu a vuan a, a ban chawpin a pawt phawng a, a kalhnate nên lam a pu a, Hebron tlâng ep chhîpah a dah ta a.

⁴Chumi hnu chuan Sorek ruama awm nula pakhat, Delili chu a ngaizâwng a.

⁵Filistia hotute chu a hnênah an lo kal a, “Eng vânga heti taka chak nge a niha, engtin nge kan hneh theih ang hriat tum teh; kan phuar ang a, kan ching nek dâwn nia. Tangka sângkhat leh za ṭheuh kan pe ang che,” an rawn ti a.

⁶Delili chuan Samsona hnênah, “Eng vânga heti taka chak nge maw i nih min hrilh teh; engtin nge phuar che ila, kan sawisak theih ang che?” a ti a.

⁷Samsona chuan a hnênah, “Thal hrui thar pasarih, la tihro lohvin min phuar sela, ka chau dêr ang a; mi dang ang mai ka ni ang,” a ti a.

⁸Filistia hruaitute chuan thal hrui thar pasarih, la tihro loh Delili hnenah an rawn keng a, chung chuan Samsona chu a phuar a.

⁹A pindan chhûngrilah châng rutu an awm a. A hnênah chuan, “Samson, tho teh, Filistia-hovin an rawn bei dâwn a che,” a ti a. Thal hruite chu mei linga la zai deh chhum ang maiin a tichat ta a. A chak chhan chu an la hre ta chuang lo va.

¹⁰Delili chuan Samsona hnênah, “Min va han thamlo ve, dâwt min han hrilh le; engin nge maw phuar beh theih i nih ang, min hrilh teh,” a ti a.

¹¹Ani chuan, “Hruizên thar, la hman hlek lohvin min phuar sela, ka khawng reng mai ang, mi dang ang mai bawk ka ni ang,” a ti a.

¹²Delili chuan hruizên thar la hman hlek loh chu a la a, a phuar a, “Samson, Filistia miten an rawn bei dâwn a che,” a ti a. Chângtute chu pindan chhûngrilah an awm a, an lo chhuak a. La zai ang maiin hruizên pawh chu a tichat ta mai a.

¹³Delili chuan, “Min lo thamlo hle zawng a nih hi, dâwt bawk min hrilh leh ta. Engti takin nge maw phuar che ila i chak theih loh vang le?” a ti a. Samsona chuan, “Ka sam phiar sarih hi puanah tah hnan la, kilh bet tlat la, a ni mai,” a ti a.

¹⁴A sam chu a kilh bet a, a hnênah, “Samson, Filistia-hovin an rawn bei dâwn a che,” a ti a. Ani chu a lo harh a, a tah hnanna puanbute chu a pawt phawng a, a sam chu a pawt dâwk a.

¹⁵Delili chuan, “Vawi thum ngawt dâwt min hrilh a, chuti chungin engtin nge ka hmangaih che min la tih theih le? Min lo hmangaih tak tak loh hi, i chak chhan pawh min hrilh duh si lo,” a ti a.

¹⁶Ni tin a nawr a, a zawh tlut tlut avâng chuan a ning tawngkhawng chuan a hrilh ta mai a.

¹⁷Engkim a hrilh ta a, “Ka pian tirh ata Pathian tâna Nazarit mi ka ni a, ka sam hi ziah kawlh a la ni lo. Ka lu hi meh ni sela ka chakna hi a bo vang a, mi dang ang bawkin ka chak lo ve ang,” a ti a.

¹⁸Delili chuan engkim a hrilh ta tak tak a ni tih a hriat chuan Filistia hotute chu a ko va, “Lo chho thuai teh u, engkim min hrilh ta e,” a ti a. Filistia hotute chu an lo kal a, tangka chu an rawn keng a.

¹⁹A mal chung lukhamin a muttîr a, mi pakhat a ko va, a sam phiar pasarih chu a hlehtîr a; a han beng harh a, a chakna chu a lo bo ta a.

²⁰“Samson, Filistia-hovin an rawn bei dâwn che,” a ti a. A muhîl chu a lo harh a, “Tûn hma ang khân ka chak ang a, ka haw mai ang,” a ti a. LALPA chuan a kalsan tih a hre lo.

²¹Filistia-ho chuan an man a, a mitmu an kherchhuahsak a. Gaza khuaah an hruai thla a, dâr kawl an buntîr a; tân inah chuan chhangphut an râwtdiptîr ṭhîn a;

²²a lu an mehsak chu a lo hnim leh ṭan ta a.

²³Filistia hotute chu an pathian Dagona hnênah thilhlan tam tak hlân tûrin an lo pung khâwm chiam a, “Kan hmêlma Samsona chu kan pathianin min mansak ta,” tiin an lâwm dâwn a ni.

²⁴Samsona an hmuh chuan an pathian an fak a, “Min that ṭeuh va, kan ram tichhetu kha pathian chuan min mansak ta,” an ti a.

²⁵An hlim hle a, “Samsona kha han hruai teh u, nuihza siam nân i hmang ang u,” an ti a. Tân in aṭang chuan Samsona chu an la chhuak a, nuihza siam nân an hmang ta a, ban pahnih inkârah an thlung a.

²⁶Samsona chuan a kaitu naupang hnênah chuan, “He in innghahna banpui ber hi min dehtîr hrâm teh, ka han nghêng teh ang?” a ti a.

²⁷Inah chuan Filistia hruaitu, mipa leh hmeichhia an awm khat hmur a; a chhâwng chungah pawh chuan mipa leh hmeichhia sângthum lai an awm a. Samsona nuihza siam nâna an hmang chu an thlîr a.

²⁸Samsona chuan LALPA a au va, “Aw LALPA Pathian, min hre reng la, mi han tichak teh; aw Pathian, tûn ṭum chauh hi mi han tichak teh; ka mit khinghnih phuba hi Filistia mite chungah hian ka han la teh ang,” a ti a.

²⁹Chu in innghahna banpui pahnih chu a bân ding lam leh vei lamin a kuah a, a rinchhan a,

³⁰“Filistia mite hi ka han thihchilh teh ang,” a ti a, ban chu theihtâwpin a nawr vak a, in chu a chim ta rup a, an hruaitute leh a chhûnga awm zawng zawng chu a delh hlum ta a. A dam laia a thah ai chuan a thihchilhte chu an tam zâwk a ni.

³¹A unaute leh a pa chhûngte chu an lo chhuk a, a ruang chu an la chho va, a pa Manoa thlân Zora leh Estaol inkârah chuan an phûm ta a. Israel-te chu kum sawmhnih a ho a ni.