Read Mizo Lushai RORELTUTE 17 Bible Online

RORELTUTE 17 - Mizo Lushai bible

RORELTUTE 17

¹Efraim tlângramah mi pakhat a awm a, a hming chu Mika a ni.

²A nu hnênah chuan, “Miin i tangkaraw tlang sângkhat leh za an rûksak che a, ânchhia i lawh a, kei pawh min hrilh kha, ka lâk a ni e, ka la kawl vek asin,” a ti a. A nu chuan, “E, ka fapa, LALPA chuan mal sâwm che rawh se,” a ti a.

³Tangkaraw sângkhat leh za chu a nu a pe leh a, a nu chuan, “Ka ânchhia ka fapa chunga a tlâk loh nân keimah ngeiin hêng tangka hi LALPA tân ka hlân a ni. Thing milem luan nân leh a chhûna chhûn milem siam nân hman tûr a ni. Tangkarua chu ka pe kîr leh ang che,” a ti a.

⁴A nu a pêk kîr tangka chu a nu chuan tlang zahnih a la a, themthiam hnênah thing milem tangkaruaa luan tûr leh a chhûna chhûn tangkaraw milem siam nân a pe a; Mika inah chuan an dah a.

⁵Mika chuan pathian in a sa a, Efod leh milem a siam a, a fapa pakhat chu puithiam atân a ruat a.

⁶Chûng hun lai chuan Israel ramah lal an nei lo, ṭha an tih ang angin mi tin an awm mai a ni.

⁷Judai rama Bethlehem khuaah tlangvâl pakhat Levia chi hi a awm a.

⁸Chu mi chuan awmna tûr zawngin Judai rama Bethlehem khua chu a chhuahsan a, Efraim tlângramah a lo kal a, Mika in chu a lo thleng a.

⁹Mika chuan, “Khawi aṭanga lo kal nge i nih?” a ti a. Ani chuan, “Judai rama Bethlehem khuaa awm Levia chi ka ni a, awmna tûr zawngin ka lo kal a ni” a ti a.

¹⁰Mika chuan a hnênah, “Ka hnênah awm ve mai la, ka pa leh puithiam atân ṭang ta mai che; kum khatah tangka tlang sâwm ka pe ang che, i silhfên sin khat leh ei pawh ka tum ang,” a ti a. Levia chi tlangvâl chu a awm ve ta a.

¹¹Chu mi inah chuan Levia chi chu lungawi takin a awm a, a fapa pakhat ang maiin a awm ve ta a.

¹²Mika chuan Levia chu a serh hrang a, tlangvâl chu a puithiamah a ṭantîr ta a; Mika inah chuan a chêng ve a.

¹³“Levia chi ngei puithiamah ka nei ta a, LALPA chuan min tiṭha ngei ang maw le!” a ti a.