Read Mizo Lushai RORELTUTE 18 Bible Online

RORELTUTE 18 - Mizo Lushai bible

RORELTUTE 18

¹Chûng lai chuan Israel ramah lal an nei lo. Israel zînga ram chanpual tûr an sem lai khân Dana thlahte chu ram chanpual tûr an ruatsak ve lo va, ram chanpual luah tûr an zawng reng a ni.

²Chuvâng chuan, Dana thlahte chuan an chite zîng aṭangin mi panga fel tak tak, Zora leh Estaol khua aṭangin an thlang chhuak a, ram ṭha zawnga en thlithlai tûrin an tîr a. Efraim tlângram an han thlen chuan Mika inah an kal a, an riak ta a.

³Mika ina Levia chi tlangvâl ṭawng an han hriat chuan a aw phawi chu an hre ta a, an pan a, “Eng nge hetah i tih? Tu nge hruai che?” an ti a.

⁴Ani chuan a chhâng a, “Mika inah ka lo kal a, puithiam atân min ruat a ni,” a ti a.

⁵“Kan kalna tûrah hian kan hmuingîl dâwn nge dâwn lo Pathian min râwnsak teh,” an ti a.

⁶Puithiam chuan, “Ngaihngam takin kal rawh u, LALPA chuan in kalna tûrah hian in hma a hruai e,” a ti a.

⁷Mi panga chu an kal a, Lais khua an va thleng a. Sidon mite ang bawkin chu khaw mite chu ngaihngam takin an awm tih an hmu a. Mi nunnêm, awm mai mai, tu mah tai nei lo, engkima intodelh an ni. Sidon khua aṭang chuan hla tak a ni a, mi dang hnêk hnai an nei hek lo.

⁸Mi panga chu Zora leh Estaol khuaa mite hnên an thlen leh chuan,

⁹“Ti rawh u, Lais khua chu i han bei ang u, a ram kan han hmu a, ram ṭha tak a ni. Hetah awm mai mai teh suh u; hmanhmawh ila, i han la ang u.

¹⁰Han thleng mah ila, an lo inrâlring lo vang. A ram pawh zau tâwk tak a ni; mihring mamawh engkim an hnianghnâr a ni; LALPA chuan a pe tawh a che u,” an ti a.

¹¹Tichuan, Dana thlahte, hriamhrei keng mi zaruk chu Zora leh Estaol khua aṭang chuan an thawk chhuak a.

¹²Judai ramah an chho va, Kiriat-jearim-ah bûk an khuar a; chuvângin, chu khua chuan Mahane-dan tih hming a la pu ta reng a ni.

¹³An kal zêl a, Efraim tlângram Mika in chu an han thleng a.

¹⁴Lais leh a vêl ram han en thlithlaitu mi panga khân an ṭhiante hnênah, “Hêng in pakhat chhûngah hian thing milem tangkaruaa luante a awm tih in hria em? Milem dangte leh Efod pawh a awm, engtin nge ti ila ṭha ang?” an ti a.

¹⁵Levia chi tlangvâl awmna Mika inah chuan an kal a, chu tlangvâl chu, “I dam em?” an ti a.

¹⁶Kawngkhâr bulah chuan hriamhrei kengin Dana thlahte chu mi zaruk an ding a.

¹⁷Mi pangate kha erawh chu inah chuan an lût a, tangkaraw luan thing milem te, a chhûna chhûn milem te leh Efod te chu an la a; puithiam chu mi zaruk zîngah chuan an dintîr a.

¹⁸Mi pangaten Mika ina thil serh awmte chu an lâk laiin puithiam chuan, “Engtin nge in tih dâwn?” a ti a.

¹⁹“Ngawi mai rawh, ṭawng ve suh, kan hnênah lo kal zâwk la, kan puithiamah ṭang ang che, Israel hnam pum puithiam nih chu chhûng khat puithiam mai nih ai chuan i duh zâwk lâwm ni?” an ti a.

²⁰Puithiam chu a lâwm hle a; tichuan, thil serhte chu amah chuan a keng a, an zîngah chuan a kal ve ta a.

²¹An lo kalna lamah an kîr a, an naupangte leh rante nên chuan an chhuak ta a; a kal hmasaten an bungruate chu an lo kalpui a.

²²Thui fe an kal tawh a, Mika chuan a ṭhenawm khawvêngte a pun a, bei tûrin a ûm a.

²³Dana thlahte chu an va ûm pha a, an au va. Dana thlahte chu an lo hawi a, Mika hnênah, “Eng nge ni ta, in va tam ve?” an ti a.

²⁴“Eng nge ni ta te in han ti a; ka puithiam min chhuhsak a, pathian, ka siamte chu min rûksak a, eng mah hnutchhiah in nei hlei nêm,” a ti a.

²⁵Dana thlahte chuan, “Thu dang eng mah sawi teh suh, hêng mite hi an thinur hlauh ang a, an bei mai ang che. In chhûngkuain an timang mai ang che u asin,” an ti a.

²⁶An kal ta zêl a, Mika chuan a aiin an chak zâwk hle tih a hriatin a kîr a, a haw leh ta a.

²⁷Mika milem siam leh a puithiam chu an hruai a, Lais an va thleng a, ngaihngam taka an awm hle hle chu an bei a, khandaihin an sât hlum a, khua chu an hâl a.

²⁸Rawn chhan tûr tu mah an awm lo, Sidon khua aṭangin hla tak a ni a. Khua chu an din ṭha leh a, an awm ta a.

²⁹An thlahtu Dana, Israela fa hming chawiin chu khaw hmingah chuan Dan an sa a, a hming hmasa chu Lais a ni.

³⁰Dana thlahte chuan thing milem tangkaruaa luan chu an be ta a. Mosia fa Gersoma fapa Jonathana chu puithiamah an hmang a; chu mi thlahte chu saltân thleng khân Dan-ho puithiamah an ṭang a;

³¹Mika milem siamte chu a awm ta reng a. Inbiakna bûk, Pathian an biakna kha erawh chu Silo khuaah a awm.